أعقل مجنونة ^_^ رح ـمة 🫰

نفس الانقسام
بلطجية وثوار
مؤيد ومعارض
شهداء ولا مش شهداء
احنا اسفين ياريس واحنا اسفين يامجلس
وسلسلة الولولة اللي في برامج التوك شووز ولامؤاخذة !!
وصور البلطجية ع التليفزيون المصري وصور البطلجية الاخري امثال الشيخ عماد عفت وطالب الطب علاء عبد الهادي " بلطجية فايف ستارز !! "



المجمع اللغوي اللي 95% من المصريين ميعرفهوش واللي اتحرق و الغريبة انه مكان اثري زي دا ميكونش متأمن ضد الحريق .. وعادي عادي .. اصل الخراطيم لرش الثوار بس مش لرش الحرايق !!
البنات اللي بتتسحل وتتعري ونسيب جسمهم اللي بان ونقول ايه اللي نزلهم !!
نزلو علشان ارجل من ميت راجل واجدع من ميت بنت !!

.. في بلطجية / ايوة في بلطجية ،، لكن الثوار مش بلطجية
اه بلطجية اللي حرقو الدنيا كدا .. لكن في ثوار جدعان اوي كانو بيحاولو يطفوها في الوقت اللي المجلس كان بيولع في الاحرار الاشراف دول وسايب البطلجية

التليفزيون المصري اثبت نظرية ديل الكلب عمره ماهيتعدل !
شوية أشكال باين علي كلامهم مأجروين وهنا يرقد شريف الروبي / ابويا وامي اتخانقو معايا فروحت رميت الطوب ع الجيش / مازن ادالي مية واكل وياقوت ومرجان وبطيخ وبتنجان !!
واللي لسة متابع هيلاقي نفس السياسية : الكدب الحصري ع التليفزيون المصري !!



وزود عليهم خيري رمضان اللي قال علي خالد سعيد حشاش وبعدين رجع يقول عليه الشهيد تميمة الثورة المصرية " طبّل طبّل ، يافرحة مامتك بيك !! "



وزود كمان توفيق عكاشة وزبايدر اللي هيقولولك دا مخطط ماسوني وبيخططو لهدم مصر يوم 13-13-2013 !!
وكمان شوية اراجوزات بيدورو علي مصالحهم فين ويلعبو حواجبهم حسب اتجاه مصالحهم !!

..

الفكرة ان في حاجة غلط بتحصل دلوقتي
مش ممكن الجيش اللي كان بيقول عمرنا ماهنضرب في اخواتنا يطلعو دلوقتي يسحلو ويموتو ويهتكو اعراض البنات كمان !!
واساسا لو اتفرجتو ع الفيديوهات هتلاقو شكل افراد الجيش مش طبيعية  / اشبه بالبلطجية !!

طيب نفترض ان في ايادي خفية ،، فين المسئولين يعرفو مين وفين وامتي ؟
ولا انتو فالحين تتشطرو ع الاضعف !!!

كفاية بأة
ليبيا خلصت من القذافي وقتلته وارتاحت من شره وابتدت تقف ع رجلها
تونس .. اثبتت ان " بسم الله الرحمن الرحيم الاجابة هي فعلاً تونس " .. وأصبح لها رئيس يحكمها
واحنا زي ما احنا بنقزقز لب وبنشتم في اللي بيدافعو عننا واحنا متدفيين تحت البطانية !!

لكل مسئول ..
لكل مخرب سواء من الشعب او الجيش او الشرطة او اي بتنجان اسود
لكل بني آدم مصري حر عنده دم ونخوه وكرامه سواء كان مسئول كبير برتبة او حتي أبسط بني آدم فيكي يامصر
متنساش انك بني آدم
واتقي الله في بلدك


وكفاية كدا
علي رأي زلطة
عااان ابوهم كلهم
<_<