6/24/2010 11:17:00 ص | 
مـ دمـاغ ــن
أع ـقل مـ ج ـنـونــة
امبارح خير اللهم اجعله خير سمعت اغنية اخترت صح بتاعة تامر حسني
حسيتها متناقضة فرجعت اسمعها تاني
و ....
بغض النظر عن شخصية تامر ولا اغانيه انا مش بنقد حد
بس انا سمعت الكلمات واستفزتني شوية .. وقررت ارد عليها بطريقتي
التفسير اخر البوست ^_^
الاول كلمات الاغنية
انا ودعت كتير في حياتي
من غير ما احس بأي جرح
واما حكتلك ذكرياتي
قولت عشان مخترتش صح
لومتي قلبي ع اللى فاته
لحد ما قالك انتي صح
وبعد شوية سيبتي حياته
بس سيبتي فيها جرح
يعني فعلا مانجرحتش
الا لمـا اخترت صح
كلمة بحبك غالية عندي
مقولتهاش قبلك وجتلك
اقولها ليكي من جوة قلبي
وكرهتها لما اتقالتلك
لومتي قلبي ع اللى فاته
لحد ما قالك انتي صح
وبعد شوية سيبتي حياته
بس سيبتي فيها جرح
يعني فعلا مانجرحتش
الا لمـا اخترت صح
نفسي ينسي قلبي حكايتك
نفسي ينسي انه قابلك
وارجع اغلط في اختياري
نفسي ارجع للي قبلك
ودا ردي عليها وركزو فيها عشان اللي هاقوله بعدها
اخترتني صح
بس سبت في قلوب كتير قلبي ميت جرح
كرهتني دلوقتي صح !
او حتي مكرهتنيش
دا لو حطيت في عيونك حبة ملح !
انت السبب .. انت اللى خلتني اكرهك
ماهو مش اول ما احبك والمحك
تقولي عيوبك .. تقولي بلاوي قلوبك
مانت بميت مليون قلب
ولا عمرك عرفت يعني ايه حب
مثلت كتير علي غيري
معلش ..معاك خانني تعبيري
وضيعت معاك حبة من وقتي
واكيد دا كتر خيري
كنت فعلا اخترتني صح !
وانا بقولك اهو .. مش هتلاقي زيي
دا مش غرور .. دا كلام صح
انت صغير اوي في عيوني
آه .. صدقني ..
دا بجد حقيقي صح
ايوة انت منجرحتش الا لما اخترتني صح
فاكر انت الدنيا سهلة !
لآء مش صح !
فاكر زمان اد ايه ندمو بسببك ؟
أكيد ناسي .. ما انت جبان
مش صح ؟
نفسك تنساني ..
نفسك ترجع لقذراتك مع ناس تاني
نفسك تكمل مسيرتك في دور الاناني
انت معايا كنت هاتنضف
وكنت عارف كدا او حتي كنت هاتعرف
حاولت اكمل معاك ..
بس لاقيتك شخص تقرف
بعد ما اخترتني صح
قررت انا الصح
انك ولا حاجة
ولازم تكون في حياتي
بـــــــح
الفكرة باختصار ..
ليه الشاب بيعمل كل الاخطاء المتوقعة وف الاخر بيكون عاوز يختار بنت خام !
بنت هبلة وعبيطة وام بدوي ؟
لو حاولت تفهم وتكون ذكية تبقي مش كويسة !
ولو حاولت تتمرد علي خبثه وجبنه .. تكون عدوته وجرحته !
ليه الشاب بيجرح قلوب كتيرة ..
ووقت ما ينجرح يعمل زي الفرخة الدايخة
ويكره فيها الوقت اللى حب واختار صح !
والاغرب انه بيحاول ينسي الجرح دا بانه يجرح قلوب تانية جديدة !
مبيحاولش يعرف ان اللي حصله دا مجرد بؤ من الكاس اللى شربه لناس كتيرة اوي !
كلمات الاغنية بتاعة تامر حقيقية وبتحصل كتير جدا بين الشباب دلوقتي
يجرحو كتير .. ولما ينجرحو .. يحسو انهم مظلومين !
مع اني اعتقد ... لا انا متأكدة
انه أكيد هو السبب ف جرحه دا !
ما انا مستناش واحد من اول ما احبه وارتبط بيه يقولي انا معنديش غالي !
حتي لو خلاني الغالي بتاعته فيما بعد ..
بس كدا هو اخترني صح .. وانا اخترته غلط
مستناش واحد يقولي انا ودعت كتير ي حياتي من غير ما احس باي جرح
واستني لما يودعني وميحسش بالجرح دا !
مستناش واحد يسلبني حريتي .. عشان يعيش حياته هو بالطول والعرض علي انه " لآموآخذه راجل "
مستناش واحد يقولي انا بشتغل وبتعب عشانك !
علي اساس انك لو وحدك ياسيد امك مكنتش اشتغلت وتعبت .. دا انت عبد للفلوس --> كلامي دا للشخصيات دي !
مختصر كلامي ..
- للشاب العايش دور المظلوم ..
شوف انت ظلمت اد ايه ف حياتك
وهتعرف انك باحساسك دا بتكمل بظلم نفسك
- اللي بيتوب عن معصية بيبان عليه
يعني الشاب لما يعرف مليون بنت .. او البنت لما تعرف مليون ولد
وتيجي تتوب لربنا .. هتتقي ربنا في اللي معاها
هيحافظو علي بعض
مش هايجي ولد يقول للبنت انا توبت عن كل اللى عملته قبلك
وهو معاها علي طول ماسك ايدها وهات يا بوس !!!!
بالذمة دا اسمه كلام ؟
يــلآ .. آهــو كــلآم والســلآم
^_^
الكلام دا تبع ..
الاشتراك في:
تعليقات الرسالة (Atom)
22 CoMeNTaToOoOoZ:
بعد السلام والتحية
طبعا شخصية تامر بالنسبة خنيقة مليش دعوا بذنوبه فانا عندي اكتر منه مليار
-----------
لكن حته البنت الخام دي والولد الخام احيانا .. فعلا بقت مشكلة .. ودا بسبب البعد عن اخلاق الدين ..
ومن ضمن الأخطاء غلاء المهور ..
يارب يتوب علي الجميع
ويهدي الجميع
ويجوز المحبين
عشان ميرزلوش علينا
بأي اغنية خنيقة
------
وفي النهاية أقولك
اهو كله كلام اغاني
كلام اغاني بس دا حصل في الواقع كتير ادامي
واكيد ادامك
شوفت بنات وولاد بنفس الكلام كدا
^_^
لا هو مش كلا م وخلاص
انا مسمعتش تامر حسني
وفهمت فكرتك
عندك حق بس هما علي الطرفين زى ماقولتي
وعموما مش الحب والهجر بس اللي بيجرح الدنيا مليانة
وانا شايف ان الشبابا والبنات في مصر بقوا هايفيين زيادة عن اللزوم
وعندهم الحب بس بشكل عكسي بقي مقزز
يعني فرغوه من روحه
تحياتي للفكرة
بسم الله الرحمن الرحيم
أنا ماأدري على ايش البنات ميتين في تامر المعفن
والله سخيف وأغانيه هابطه
علي فكرة ياريمو انتي عُنصرية...
ايووووون عُنصرية...
لان نفس كلامك ده كله بينطبق برضه علي البنات.. مش الشباب بس... كلً حسب تربيته وشخصيته...
فمتجيش تعممي الكلام علي الشباب.. علي اساس ان البنات ملايكة بجناحات...
____________
بالنسبة لتامبورة .. مش عارف انتي بتسمعيه ليه بصراحة طالما عندك تحفظات عليه...
انا عن نفسي بطلت اسمعه... اغانيه بقت كلها عاااار زي تصرفاته... ولا كلمات ولا مزيكا...
عايش دور الروش في اختياره للكلمات بس بتوصل معاه للاسفاف... ما علينا...
_________________
سيبك من ده كله... انا عاوز ابركلك انك خلصتي امتحانات... وعقبال منباركلك علي النتيجة ان شاء الله...
والله كلامك مقنع يا ريمو بس والله أنا عن نفسي عندي مبدأ بحاول أطبقه في حياتي وهو مبدأ عدم التعدد في العلاقات العاطفية .. أنا مقتنع ان جوا كل واحد فينا طاقة حب وحنان واشتياق ، لو فضل يدي منها كل بنت شوية والآخر يسيبها هاييجي وقت ما يرتبط بالإنسانة اللي المفروض تعيش معاه بقيت حياته يحس بفتور وملل لأن مفيش جديد .. ودي بتبقى درجات .. يعني أسعد الناس في حياته الزوجية هو اللي مجربش أي حاجة إطلاقاً من متعتها في الحرام قبل الزواج .. والعكس صحيح فأقل الناس شعوراً بمتعة الحياة الزوجية هم الذين قاموا والعياذ بالله بارتكاب كل المحرمات قبل الزواج .. بالإضافة إلى أنهم قاموا بتحميل أنفسهم بدين عظيم يخشاه كل عاقل وهو ( كما تدين تدان ) هذه النقطة قد لا يفكر فيها كثيراً ولكنها تحدث بالفعل ، ومن لم يكن له اخوات بنات فستحدث لزوجته أو ابنته عاجلاً أم آجلاً .. نسأل الله العفو والعافية
@ هيثم ..
المشكلة ان الشباب والبنات دول يفرغو عواطفهم ومستنين الحياة هتكون فلة شمعة منورة من غير مصاعب
ولو فكرو انهم ميعملوش الغلط بيكون كلام ظاهري لا باطني
زي ماقولت ف اخر البوست
الولد يقول انه تاب ومش هايعرف بنات تاني
وف الحقيقة هو معاها ازبل ماكان معاهم
والعكس طبعا للبنات <_<
البرنسيسة ريماس :
بنات فاضية يا ريماس :D
معلومة بس انا مبحبش تامر ولا بحبه
انا مالي بيه هو ليه شخصيته بعيوبه ومميزاته زي كل البشر
وف النهاية ربنا يهدينا جميعا ^_^
اتمني اسمع رائيك ف الفكرة نفسها
عزيزتي العلاقات الانسانية ليست حربا وسجالا والمفروض ان لاتكون كذلك هي ليست حربا لابد فيها من منتصر ومهزوم بل العكس هو الصحيح هي سلام نفسي وذوبان في الاخر
تحياتي وودي
ابوو علي ..
هرد عليه من تحت لفوق :D
الله يبارك فيك بس انا مخلصتش امتحانات لسة ناقص اسبوع :D :D
-----------------
انا قولت بعيدا عن نقد تامر وهو شخصيته خنيقة ولا لاء وتافه ولا لاء .. ف الاخر بني آدم زي زييه وميصحش انا اللى احاسبه لاني هلاقي اللى يحاسبني ولا ارضي لمحاسبتي الا الله
كلامي دا مش دفاع عنه طبعا
بس وججهة نظري بخصوص كل البشر عموما
بالنسبة لكلمات اغانيه وموسيقته وبسمعه ليه :D
والله يا ابو علي انا بقالي زمن مبسمعش الا فيروز .. بس بسمع الحاجات الجديدة مرة واركن :D
ودا كان ضمن اللى اتسمع لمرة واتركن بس الاغنية دي اتسمعت مرتين <_<
-----------------
اخيراااااااا بئة يا ابني ركز
انا ف اخر البوست قولت ان الكلام ع البنات كمان
انا عارفة ان اي حاجة دلوقتي مبقاش الواحد يفرق ف عمايلها لبنات ولا ولاد
بس الكلام برده بينطبق بكترة شوية علي الولاد
يعني مفيش بنت بتطلب ولد خام معرفش حد قبلها ومحبش :D
وبرده مردتش علي الفكرة الاساسية بتاعة البوست :D
Ahmed Amin
باختصار يا احمد انت اختصرتها في جملة " كما تدين تدان "
وياريت كل الشباب والبنات يفكرو ف النقطة دي قبل مايعملو اي حاجة
خواطر شابة
انا مقولتش انها حرب
بالعكس انا اعترف ان لما الامور توصل للمرحلة اللى ف البوست دي يبقي كان مشروع حب وفشل قبل ما يبدأ
او مكنش حب من الاصل من البداية :)
تحياتي ليكي ياقمراية
انتى كلامك صح يا قمر
مينفعش كل واحد يبقى عامل مصايب فى حياته و معى كده عايز يتجوز قطه مغمضه
مينفعش طبعا
لانه كما تدين تدان يا كابتن
و بعدين انا متفقه مع اول تعليق ان معظم الاغانى اللى بيكتبها تموره او بيغنيها خنيقه زيه
متعرفيش بيجيب كلماتها منين
تحسى انه بيسيح للبنت اللى يعرفها
حاجه غريبه بجد
تحياتى ليكى
برافووووووووووووو
=D>=D>=D>=D>
الشخصيات اللي زي كدة ميتردش عليها الا كدة ...
لولا
سلامو عليكو..
ليه حسه انك وخده الكلام على صدرك اوى كده؟؟؟؟؟؟
الكلام ده يا بنتى بيحصل من زمااااااااااان اوى
بين بنات وشباب اللى عايزين يتخدعوا ويعيشو دور المظلومين ويسمعو اغنية حليم يخونو
الحلال بين والحرام بين مفيش حب ولا حتى كلام فيه بين البنت والولد ولا صحوبية
كل ده كلام عنب
لك تحياتى
كنت فعلا اخترتني صح !
وانا بقولك اهو .. مش هتلاقي زي
دا مش غرور .. دا كلام صح
انت صغير اوي في عيوني
آه .. صدقني ..
دا بجد حقيقي صح
هههههههههههههههه تصدقى يا ريمو
والله انتى زى السكر
وبجد عجبنى ردك اوى على تامر
ومش هناقشك مقتنعة برأيك وشايفاه
صح ونفسى كل الناس تفكر زينا كده
بدأت احس اننا كمدونين كائنات
عجيبة ف الزمن ده
تسلم ايدك وصح لسانك
دمتى حبيبتى :*
@ حالة ملل
علي فكرة انا مقصدش انه كدا هايعرف واحدة مش قطة مغمضة يعني لفة وصايعة وكدا
لا انا اقصد انه يعرف واحدة فاهمة .. دماغها شغالها وف نفس الوقت محافظة علي نفسها :)
بالنسبة لتامر بئة :D
الله يسامحه علم الشباب التشريد :D :D
مبقاش في شاب دلوقتي مش بيشرد وحياتك يا داكتورة :D
نورتيني والنحمة ^_^
@ لولا
والله يا اوختي دا انا شايلة من المناظر دي :D :D
كترو اوي وبئو اوووووووفر
سو اوفر وحياتك :D :D
نورتيني ياقمراية ^_^
ست* جنى* الحسن)
وعليكم السلام ورحمة الله وبركاته
الكلام دا شوفته كتير يا ست الحسن
زمان كنت بقول زي مابتقولي عشان علاقات محرمة وصحوبية
بعد كدا اشوفه بين مخطوبين عادي ؟
عمرك شوفتي واحدة خطيبها يقولها انا مكنش عندي غالي .. وخلاص انتي دلوقتي الغالي بتاعتي !
عمرك شوفتي واحدة " جوزها " " مكتوب كتابها " .. انا بشتغل عشانك انتي وبس وانتي ولا بيتمر فيكي
ايه النــــــاس دي
بقو اوفر اوي زي ماقولت للولا كدا :D :D
عاوزين لهم ابادة جماعية :D
منونتي يا أوحي :D
انتي اللي سوكرة والنحمة ^_^
ههههههههههه حلو اوي
بقينا كائنات عجيبة غريبة :D
محدش عاوز يعترف بينا للاسف ^_^
بس اي خدمة اي حد مدايقك قوليلي وانا اطسهولك رد يطلع من نافوخه :D :D
هادي أحسن تدوينة قراتها ليك
كلام كثير حلول بجد انت اعقل مجنونة
اللحن جميل جدااا لاكن الكلمات لم تعجبني ايضا خدت بالي من الكلمات بعد ما كنت ارددها من قبل
انا قلت ليك هادي احسن تدوينة قراتهااا
إرسال تعليق
♥
WelCome To
~ A32l MaGNoNa ~
♥