أعقل مجنونة ^_^ رح ـمة 🫰

ساعات بشتاق ليوم عشته وأنا صغير ، لشكلي قبل ما اتغير
لآيام فيها راحت البال
عشان كنا ساعتها عيال

هممم
كانت ايام
وانا هادية أوووي
وأمي تعبت من هدوئي
فودتني حضانة وانا عندي سنتين وشوية عشان اتكلم والعب مع العيال
ومن وقتها ..
مبطلتش جنان !!

كانت أيام
لما كان بابا بياخدني كل يومين تلاتة فسحة جديدة
لما كان بيجيبلي فساتين لما بشوفها فالصور بتجنن

واما كانت عيوني دايماً بتلمع " ومعرفش ليه لما كبرت بقت حزينة ! "
لما كنت برمش بعيوني الرمشة اللي برمشها لحد دلوقتي وببص البصة اللي ببصها لحد دلوقتي لما بغلط
" ودي من الحاجات القليلة اللي كملت معايا لحد ماكبرت "

كانت أيام
لما كنت بفرح وبمرح
ولما كنت بسرح
كنت بقول لنفسي : ..
نفسي اكتب بالجاف بقي زهقت من الرصاص
ولما كبرت فهمت ان ع الاقل الرصاص بيتمسح لما بنغلط
لكن الجاف !
بيشوه الدنيا !!!
زي اخطائنا واحنا صغار
ممكن اللي حوالينا ياخدوها بتفاهم ويقولو عيلة وغلطت
لكن دلوقتي ؟
صعب لما نغلط " مع اننا بني آدمين ، وكل بني آدم خطاء "
بس نادرا لما بنلاقي اللي بيتفاهم او بيسامح في الغلط
وكأننا كبرنا
واتحولنا
من عيال .. لملايكة!

كانت أيام ..
لما كنت بفكر
هاخد عيدية اد ايه فالعيد
وهاعمل بيهم ايه؟
وبالرغم اني لحد دلوقتي باخد العيدية
حتي من اخويا الاصغر مني
الا ان عيدية زمان ليها طعم تاني خالص ؟؟

ياااااااه
لو اتكلمت عن الأيام دي
مش هخلص كلام
بس الأكيد
ان لولا الأيام دي
مكنتش كبرت
مكنتش اتعلمت حاجات كتير
مكنتش بقيت مجنونة كدا
ولا عاقلة كدا
ولا أعقل مجنونة كدا

لو مكنتش الأيام دي عدت
مكنتش لقيتك
مكنتش حبيتك
مكنتش اكتشفت اني حياتي مكنتش هتكمل ولا هيكون ليها طعم من غيرك

وبكرة الأيام تعدي وتعدي
وفي كل فترة
وانا معاك
هاقول ياااااااااه كانت اياااااام
بس معاك
برده ..
انا عايشة في أحلي أيام
بس
" خلي بالك من ريمو "

بغض النظر ان 2011 سنة معجزات ومش ممكن نتوقع ايه هيحصل فيها

فـ أعنا علي أنفسنا وأحسن خواتمنا يارب العالمين

أمنية ..

نفسي ابقي مصفآ

عشان اصفي همومي أول بأول وارتااااح

ونفسي ابقي استيكة سحرية
عشان امسح كل حاجة متعجبنيش في الدنيا دي

ونفسي يكون فيا اوبشن كدا .. زرار يخليني سايلنت !!

علشان لما احب اصرخ ، ازعق ، اعيط
ادوس عليه واعمل اللي انا عاوزاه من غير ما اصدع اي حد 

ولا اصدع انا شخصياً

:)

حقيقة ..

انا اتغيرت
مبقتش انا
والحلو اتقلب وحش
والوحش اتقلب غريب
وبقيت شخصية غريبة
غريبة عني انا شخصياً
من الآخر
انا مش عارفني
:-)

اعتراف ..

ناقص يومين ونكمل نص رمضان علي خير :)
اعترف اني نجحت في اني امشي علي جدول العبادات بنسبة 90%
واعترف اني مقدرتش اقضي علي عيوبي
مش هدور علي شماعة اعلق فيها فشلي !
بس واضح اني هافضل كدا كتير
!!
واللي حواليا .. لو بيحبوني هيستحملوني لحد ما أرجع تاني رحمــة
الـ مجنونة  بس بعقلها
والـ عاقلة ومحتفظة بجنانها

شكر واجب ..

لـ ناس بيحبوني
بيستحملوني
مبيزعلونيش
بيقدروني
بيخافو علي احساسى

!!!

 

 

 

وآخر كلامي
سلآم