كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )






عن ان الدنيا تضلّم 
وتتوجع وتتألم
وفجأة تيجي نقطة نور
تغيّر كل حياتك 
وفي قلبك تعلّم 

...

مفيش حاجة بتعوض وجود حاجة فقدتها
بس في حاجة ربنا يبعتهالك عشان يطبطب بيها علي الحتة الموجوعة في قلبك !

ربك كريم وكبير
ممكن تتمنى منه الحاجة كتير
وتلح في السؤال بغباء
لكن هو سبحانه عارف الوقت المناسب لعطيته
بيديك نعمته في الوقت الصح

ودا اللى حصل معايا شخصياً

أد ايه اتمنيت طفل يكون مني 
طفل استمتع بحضنه وريحته 
طفل استمتع بأمومتي معاه 
واعيش طفولتي مرة تانية في حضنه !

لما محمد اتوفي 
آخر حاجة كنت اتوقعها اني اكون حامل فـ الوقت دا وانا معرفش !
كنت بقول كويس اني مش حامل عشان من الزعل كان زماني أجهضت لتاني مرة
كنت بقول كويس إني اجهضت في حملي الأول في أول شهر لأني كان زماني بجهض من زعلي دلوقتي علي اخويا وانا فالخامس أو فالسادس !!

كنت محطمة نفسياً بشكل خلاني مفكرش في أي حاجة تفرحني
وكنت شايفة الدنيا أسودت بموت محمد !

ويحصل اللي مكنتش متوقعاه 
ويحصل اني اكون حامل 
واكتشف اني حامل في 40 يوم !
وللصدفة .. انا اجهضت حملي الأول في اليوم الـ 40 برده !!!!

كأني ببدأ من حيث انتهيت :))

رغم وجود مشاكل كتير في أول حملي 
إلا ان كان جوايا ثقة كبيرة ان ربنا مش هيحرمني من طفلي المنتظر
طفلي اللي اعتبرته طبطبة من ربنا لمجرد وجوده جوايا فـ الوقت دا 

رغم أملي الشديد بإن الجنين يكون ولد
مش عشان الولد أحسن من البنت.. إطلاقاً !
لكن عشان كان نفسي محمد يفضل موجود معايا :)

لكن كان الجنين بنوتة شقية غلبتنا عقبال ما اتأكدنا انها بنوتة :)
بنوتة أول حركة ليها ظهرت فـ السونار كانت بوكس بايديها لفوق :D
ورغم اني معملتش ثري دي او فور دي إلا انها ظهرتلي وعرفتني انها هتكون شبه باباها !

مريـَـم ..
طبطبة ربنا عليا
وعلي قلبي
وعلي قلب أمي 

مريـَـم ..
اللي رغم انها لسة مش فاهمة حاجة
بس لما ببكي بتطبطب عليا بعفوية وتضحك 
بتطمني بضحكتها وبايديها الصغننة 

مريـَـم ..
غيرتلي حياتي 180 درجة 
عملتني ازاي معني الأمومة والسهر والتضحية براحتي عشان راحتها 
علمتني ازاي أكون تعبانة ومع ذلك اضحكلها والاعبها واحضنها

مريـَـم ..
حسستني بـ الأمان 
حضنها بالنسبة لي أمان
رغم عفويتها فـ احساسها بـ الأمان في حضني 

~ ويبقي السؤال ..
مين فينا بيدي الأمان للتاني !!؟

ورغم إن مريم معوضتنيش عن محمد 
لأني محتاجاله في كل وقت !
لكن يكفي ان ربنا بعتهالي تطبطب عليا

~ شكراً يارب علي نعمتك :)









8 CoMeNTaToOoOoZ:

خولة يقول...

ياااا رب يحفظهالك و يحفظك ليها و يخليها تكبر فعزك ودلالك

نيللي علي يقول...

ربنا كريم أوي يا رحمة..وعلي فكرة محمد هتشوفي تاني..أحنا يارحمة في رحلة مؤقتة وكلنا ماشين مجرد وقت شوية وقت وهيروحوا وتبقي آخرتنا..ويارب تشوفي مريم أحلي إنسانة في الدنيا :)

الميكروباص يقول...

الف الف مبروك- ربنا يبارك لك فيها

rona ali يقول...

تخيلي يا رحمه ان في ناس متعرفش انك اتجوزتى اساسا يابنتى\
غيبتى كتير اوى بس لعله خير هو الكاتب كده لو متاثرش ميبقاش كاتب :)

مريومه دى نور عنينا والله بحس انها جزء منى اوى علشان مامتها اختى واكتر :)

محدش بيختار يفارق حد بس انتى دايما تقولى ربنا كبير اوى ربنا كبير اوى يا رحمه لدرجه انه قدر ان اخوكى يكون شهيد بإذن الله ويدخل جنته الواسعه اللي هتكون اجمل من العالم دة اختار ان يموت بالشكل دة افضل من بعدين والوقت الحالى
وكمان هيشفع ليكم وتدخلوا الجنه معاه على حسه
في اجمل ولا اعظم من كده
ادعى انتى بس واحتسبي شهيد عند ربنا انتى وكل عائلتك وادعوله كتير وهو اكيد اكيد مبسوط في مكانه لان اللى عند ربنا دايما حلو وكويس واجمل من واقعنا دة بكتييييييييير <3

Nour يقول...

بتضايق اوي لما حد يختفي من بلوجر، بتضايق لدرجة محدش يتخيلها بجد وبتبقى فرحتي ضعاف اضعاف وانا شايفاله بوست جديد بعد غياب
وانتي من الناس دي .. فرحانة جدا بعودتك وعقبال الباقي يارب

مكنتش اعرف انتي مين بره بلوجر والحمد لله عرفت وكانت صدفة حلوة جدا
ربنا يخلي مريم وربنا يفرحك بيها دايما واكيد محمد في مكان احلى دلوقتي :))

just waiting يقول...

اولا ماشاء الله ربنا يخليها ليكي ويبارك فيها ويجعلها قرة اعينكم
احلى احساس في الدنيا لما تقولي يارب وتلاقي ربنا حققلك دعوتك
ولما تلاقي النور في اخر الممر الضلمة

دورات تدريبية يقول...

يسلمو

موضوع مرة مميز

Sam Sh يقول...

مبروك يا أم مريم :)
عقبال ماتشوفيها عروسة

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات