Blog Archive

كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )




قبل اي كلام
عاوزين نقرا الفاتحة
علي روح الثورة !
وشهداء الثورة !
وعلي مصر ، والغلابة اللي فيها !

أما بعد ،،
من غرابة البني آدمين
ان كل الناس تتثقف سياسياً بعض الثورة
وانا ووش كله خجل أنتخت !!
انتخت من كتر ما اخدت تخمة في فترة معينة ، غير شوية الشيزوفرانيا مين صح ومين غلط ومين مع مين وانا فين وكل التناقضات دي ، بالاضافة الي بهارات الاعلام الشقية اللي تخلي الراكز تايه !!
وانا بصراحة ربنا توهت اوي بالذات اني حاسة اني بقيت بطيخة في كل حاجة !
ويارب الحالة دي تعدي بقي عشان الواحد زهق

مش عارفة ليه مكنتش حابة اكتب تاني في السياسة
خصوصا ان كل الناس دلوقتي بتكتب وتتكلم وتشجب وتندب و و و و
..
بس اللي حصل امبارح
لازم نتكلم فيه شوية
ولازم نسأل !
ليه بيحصل كل دا؟؟
ليه الانظمة الحاكمة كلها تتبع نفس المبدأ بدون أي تغيير ؟؟
 
ليه لما يحصل اي بلوة
يا اما يقولو ماس كهربائي يا مختل عقليا يا ارهابي يا فتنة !!

ليه كل فترة لازم يتكرر سيناريو الفتنة تحديداً !!

ليه ميكونش دا كله شئ منظم ومدبر " ودا مش سؤال دا حقيقة واضحة وضوح الشمس في عز الضهر ؟؟! "

ليه المسلمين المتعصبين بيقولو ع المسيحين كفرة !
وليه المسيحين المتعصبين بيقولو المسلمين هراطقة ؟؟

سبحان الله
هاكررها تاني
مع اني قولتها زمان
هو مش رسولنا الكريم عليه الصلاة والسلام قال وظهر كلامه في القرآن الكريم قائلاً: لكم دينكم ولي دين !

وفي الانجيل : الله محبة
!!

بتتكلمو في ايه انتو؟
وليه كل واحد نصب نفسه ملك المحاسبة وبتحاسبو مين وليه وازاي
ماتحاسبو نفسكم وشوفو انتم اعمالكم هتوديكم لفين !!


في نظام المخلوع
لما يحصل تدبير لحاجة معينة واتفاقات وصفقات تحت الترابيزة
كانو يطلعولنا بماتش
او بتفجير كنيسة !!

وفي الحالتين كان بيحصل الخناقات
اهلي وزمالك
او مسلم ومسيحي

وفي الحالتين
بننسي اننا كلنا مصريين
!!

دلوقتي مين السبب في اللي بيحصل دا كله؟
مسيحيين راحو مسلحين وموتو الجيش ؟؟
ولا نظام عامل نفسه جديد بس الحقيقه انه ماشي علي نفس نظام المخلوع !!

انا مش هقول المجلس العسكري غلبان ومحتاج الطبطبة
ولا هقول دا ظالم ومحتاج ضرب الجزم
!

بس هقول فين العقل ؟؟

الاقباط اللي رايحين يعتصمو هما واهاليهم ايه اللي هيخليهم يمسكو اسلحة ويضربو نار؟؟
وايه اللي يخلي الجيش يكرر مأساة 28 يناير " جمعة الغضب ؟
والفلول والبلطجية وبياعين اللبن والسمك والتمر الهندي اللي بيلعبوها صح !

واللي احنا فاهمينه بس مش قادرين ندركه صح
اننا كلنا في مركب واحدة
مسلم زي مسيحي
لو حاجة حصلت في البلد دي
كلنا هنضيع
ووقتها مش هتفرق
مين المسلم ومين المسيحي !!


اللي استشهدوا في الثورة
مسلمين ولا مسيحيين؟؟

حد عمره سأل السؤال دا؟

مسألناهوووش طبعا لأنه في مش في دماغنا
لأن اللي في تفكيرنا هو شئ واحد
كلنا مصريين

يبقي ليه دلوقتي بنفكر في مسلم او مسيحي

وليه الهبل ان مذيعي التليفزيون المصري يستنجدو بالمسلمين لحماية الجيش من الاقباط !!
نعمين يعني ؟؟؟؟؟؟؟؟
مين كدا اللي بيرمي البنزين علي نار الفتنة
مين اللي بيفجر قنبلة التخلف العقلي يعني؟؟

ليه افتح الفيس بوك الاقي كله بيكفر كله
وادخل منتدي الاقي المسيحين بيشتمو المسلمين والمسلمين بيشتمو المسيحين
ودول يقولو انتو كفرة ومش احنا اللي بنقول القرآن اللي بيقول
ودول بيقولو انتو كفرة وهراطقة ومش احنا اللي بنقول الانجيل اللي بيقول

طيب كفاية رغي
وكفاية كلام

وهـ انهي بنقطتين


* لازم لازم لازم لازم
" شوفو كام مليون لازم ممكن تتحط ! "
لازم مسلم + مسيحي = ايد واحدة = مصري وبس
لازم نفهم اننا كلنا في مركب واحد
ولو حصل حاجة احنا اللي هنغرق
والكبار محضرين لنفسهم سفينة نوح تنجيهم !!

* تاني حاجة
لكل مسلم
لكل بني آدم بيتقي الله
الرسول عليه الصلاة والسلام وصانا باهل الذمة
وصانا بالاقباط
وحرم قتلهم وحرم ظلمهم

وشوفو الاحاديث دي
قال صلى الله عليه وسلم: «ألا من ظلم معاهداً أو انتقصه أو كلفه فوق طاقته أو أخذ منه شيئاً بغير طيب نفس فأنا حجيجه يوم القيامة»

قال صلى الله عليه وسلم: «من قتل معاهداً لم يرح رائحة الجنة وإن ريحها يوجد من مسيرة أربعين عاماً»

ولسة في كتير واللي عايز يعرف احاديث اكتر يدور ع جوجل

فـ لو سمحتم يا مصريين يامسلمين
بلاش اسلوب التكفير
واعملوا بوصية الرسول عليه الصلاة والسلام
ومتكفروش ولا تظلمو قبطي


وشوفو اللينك دا
شهادة حق من صحفي في جريدة البديل


و .....

آخر كلامي سلام
ويارب نلاقي السلام :)
    


 


5 CoMeNTaToOoOoZ:

سواح في ملك اللــــــــــــــــــه- يقول...

بصي ياست اعقل

هجيبلك من الاخر

ميت راي+ميت ائتلاف +نخبة سياسية مش فاهمة حاجة اصلا +فقدان الامن +التراخي في تطبيق القوانين = فوضي

اعقل وان كنت اشك انك بتقري التعليقات

لكن معلش ادعوكي لقراءة هذا البوست

وهذا رابطه


http://sawahmasry.blogspot.com/2011/07/blog-post_28.html

rona ali يقول...

استاذ سواح متقلقش هى هتبص اكيد بس اديها وقتها وتكون رايقه كدة هتلاقيها متواجده :):)ان شاء الله صح يا ريمو

بصي يا ريمو الواحد ساكت والله ومش عايزة يتكلم لانى من النوع لما بتفتح بجد مابتكمتمش :(

المقاله بتاعت الصحفي زودتنى تحيير اكتر غير ان معلوماته اغلبها غير مؤكده والرؤيه غير مفهومه اللي ماتوا دوال من انى طرف وهو مصورهم مش فاهمه؟؟؟؟

والجيش هيدخل في البنى آدمين دى مع نفسه ولا حصل استفزاز طب ازاى واغلب القتله من الجيش ؟؟؟


اسئله كتير تعالي بقي نسبنا من كل ده واقولك بغض النظر عن اللي حصل البارح واللي لن ينسي نهائي

احنا طول عمرنا في فكرنا بنفرق بين مسلم وقبطى هما بيعرفونا واحنا بنعرفهم بس بحدود وطول الوقت مستعدين لاهى هجوم اقليه مننا بيتعاملوا معاهم علي انهم من ملتهم واقليه منهم كذلك بالظبط والباقي يفرق ويسد ودى الحقيقه

علشان تقولى مصر حرة عادله واجهه التغيير بجد

تقبل الاخر بكل افكاره+ حلول جديه نهائيه+ عم تعتيم الخبر مهمها كان+ حياد من جميع الاطراف+ عدم تعصب = مصر حره فعلا ونقدر نقول مرت بثورة

وكالعاده حكومتنا ................. لانها معملتش حاجه اصلا :(

لورنس العرب يقول...

تسألي وتقولي فين العقل


هو مفيش عقل

فيه برامج توك شو لمدة 7 ساعات يوميا على 100 قناه
وفيه 100 صحيفه
وفيه 1000 موقع اخبار
وكله بيتكلم
وكله بيقول اخبار
وكله بيفتي
واحنا فاتحين دماغنا وبنستقبل!

AHMED SAMIR يقول...

و شرفك يا بلدي....سحابة وتعدي

وجع البنفسج يقول...

اللهم أنى أستودعتك مصر..♥ رجالها و شبابها .♥.

نساءها و فتياتها .♥. أطفالها و شيوخها .♥.

اللهم أنى أستودعتك ممتلكاتها و مبانيها و منشآتها .♥.

اللهم أنى أستودعتك نيلها و اراضيها و خيراتها .♥.

اللهم أنى أستودعتك أمنها و أمانها و أرزاق اهلها .♥.

اللهم أنى أستودعتك حدودها و بحورها و جنودها .♥.

فأحفظهم بحفظك يا من لا تضيع عنده الودائع و أنت خير الحافظين .

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات