كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )




حد فاكر الشيزوفرانيا اللي اتكلمت عليها فـ البوست اللي فات !

اهي سنة 2011 تحديداً عندها شيزوفرانيا جامدة جداً

سنة بدأت من أول ساعة فيها بنكد كبيررررر

" انفجار كنيسة القديسين "

سنة بدأت بفتنة كان ممكن تحصل بين مسلمين ومسيحين ..

بس اللي حصل العكس تماماَ

وزاد التقارب اللي بين قطبي الأمة !

وفي نفس الشهر ..

كانت ثورة 25 يناير

الثورة اللي كانت غريبة جداً ..

ثورة متحدد معادها ومكانها من قبلها بأسبوع

وهنا اختلفت الاراء ..

مابين التريقة --> ايه الشباب الفاضية دي ومفاضلش الا بتوع الفيس بوك كمان اللي يعملو ثورة !

ومابين التشجيع والثقة الكبيرة في ان هيحصل حاجة من خلال الشباب دي

ومابين الحياد ..
سيبو اللي يثور يثور .. يمكن يعملو اللي احنا مقدرناش نعمله !

وقد كان ..
وحصل اللي محدش يتخيله ..

ثورة شعبية شبابية كبيرة
رعب النظام واقالته وعمل حكومة جديدة
وقطع النت والموبايلات
وحالة شيزوفرانيا تانية مابين الناس دي مصريين بجد ولا قلة مندسة بأجندات خارجية !

ومن أهم الحاجات اللي حصلت في الفترة اللي فاتت
ان المصري رجعتله كرامته

اعتقد ان المصري هايعيش بعد كدا مرفوع الراس
بعد ما الكرامة كانت متهانة في كل حتة
مابين دكاترة مجلودين في السعودية
ومعدومين في ليبيا
ومعتقلين في الكويت

المصري اللي عاش 30 سنة من عمره ميعرفش عن الكرامة الا كلام في اغاني
" لو سألتك انت مصري تقولي ايه ؟
قولي مصري وطالع عين ابويا وامي في العيشة دي ! "

المصري اللي عايش دايماً في العسل " الاسود " ..
بيحب مصر .. لكن من سوادها اتغم نفسه

المصري اللي كره بلده وطفش منها لبلد تانية بيتهان فيها بس ع الاقل بياخد فلوس
ماهو بيتهان في بلده " وبرده بيجوع "

المهــم نرجع تاني " ولامؤاخذة الحماسة خدتني شوية "

احنا لسة في تاني اسبوع من تاني شهر في 2
وكل يوم بيحصل حدث جديد
فخر جديد لمصر وابناء مصر
اللي شاركو واللي مشاركوش

فخر خلي الشباب والبنات اللي قعدو في بيوتهم يقولوا
" احنا فخورين اننا من جيل الفيس بوك "
فخر خلي الابهات والامهات يقولوا
" شباب زي الورد عملوا اللي مقدرناش نعمله "

سنة 2011 دخلت التاريخ من أوسع الابواب
سنة دسمة جداً
افراحها اكتر من احزانها

علي اد الحزن اللي عم البلاد بعد تفجير كنيسة القديسين
علي اد الفرحة اللي جمعت الكل لما شوفنا الهلال جنب الصليب

وعلي اد الحزن اللي عم البلاد من تخريب بلطجية " النظام " المندسين في وسط " المظاهرات "
علي اد الفرحة اللي خلت الكل ايد واحدة
اللي خلتنا ننام واحنا مطمنين عشان في ناس بتحرسنا في الشوارع
مش مهم مين كان مخاصم مين !
بس الكل كان ايد واحدة

المسيحي كان بيحرس المسلم وهو بيصلي
والمسلم كان مخلي باله من المسيحي وهو بيصلي

سنة جميلة علي اد صعوبتها
وهي دي الشيزوفرانيا !

علي اد ماكان عندي شيزوفرانيا من اسبوع بس
ومين اللي صح ومين اللي غلط ؟
مكنتش عارفة !

دلوقتي ..
بعتذر لو كنت شكيت في اي " محترم " حط روحه في كفه ونزل دافع عن بلده !

ويارب يعدي السنة دي علي خير
وتمر صعوبتها بأفراح !

تمسكـــوا يا شباب التحرير
فـ إن مع العسر يسرا

http://a3.sphotos.ak.fbcdn.net/hphotos-ak-snc4/163398_121202694616059_100001789867694_122268_4464105_n.jpg

9 CoMeNTaToOoOoZ:

شمس النهار يقول...

مصر كلها هناك

لازم كلنا نبقا هناك


ولو اتحدنا مصر هتبقا احلي واحلي


والحمد لله ان ملعوب القدسيين ظهر علي حقيقته

ووجود المصريين هناك سواء مسلمين او مسيحين
كان اكبر قلم يرن علي وجه النظام

MR.PRESIDENT يقول...

مصر هتقوم إن شاء الله
من جديد
آن البعث المصري من تراب الموات المصطنع .
كفاية خنقتونا .
مصر هتقوم
مصر هتتولد من جديد .
وهتبقي الليله عيد
إن شا الله .

noora يقول...

فعلا ان مع العسرا يسرا
وبيجي يوم وتشرق شمس مصر

والله مابيغيظني الا لما الاقي مصري ضد اللي حصل ويقولك احنا كنا كويسين !!!
اعرف على طول انه مثل مابنقول عندنا ولد نعمه وعمره ماحس بالظلم والجوع والقهر والغربة
لكن فعلا مايضيع حق وراه مطالب
دمتي ودامت مصر بخير

MaNoO يقول...

بفرح جدا جدا من الناس اللى استقر تفكيرها بعد حاله توهان طبيعيه لا اجندات خارجيه لا غيره الثوره رجعت الكرامه دى اول نتيجه الثوره نتائجها كتييييييييير اوى هنحس بيه بعدين دلوقتى نفتخر ونصمد ونحسس الناس يعنى ايه نثور ويعنى ايه نرجع حقنا ويعنى ايه النظام كله يرحل واللى قريب من التحرير يروح واللى فى محافظته مظاهرات ينزل مااحلى حاله الحريه واحنا ماشيين فى الشارع بنطالب بحقنا فى اطار سلمى العالم كله شافه ازاى المصريين بجد يقدروا ينظموا ثوره متحضره ومحترمه شوفوا الشباب المعتصمين فى التحرير ازاى بيغنوا ويقولوا شعر حاجه فى قمه التحضر
ياااااااارب حققلنا اهدافنا ونقدر واحفظ هذا البلد امنا مستقرا

hasona يقول...

هل نحترم شهدائنا ومطالبهم
هل تأخذنا الأنين أم تعتكف في محراب الأنانية
قد نتحاور مع الجاني وندوس علي دمائهم باقدامنا ونهدر حقهم بل نهدر كل ما تبقي لنا ولهم من حقوق خلف ستائر من الحوار التي قد لا تنتهي
وقد نسجد علي دمائهم فتترك أثراً في جبهتنا فتعلوا قامتنا فنسير معتدلي القامة لنكمل المشوار
هل نبقي علي جسر بين التشائم والتفائل

Tears يقول...

مصر رجعتلها الروح و كل حاجة ح تتغير تدريجيا و ح ترجع القيم

كلمات من نور يقول...

مبروك النصر ورفع الراس عاليه وسط كل الدنيا ......الناس في كل بلاد العالم فرحانه علشان فعلا مصر أم الدنيا

SeMo يقول...

السلام عليكم
لو أردت إدراج إعلانات جوجل أدسنس بمدونتك، من الممكن أن أعمل نافذة لك من حسابي في أدسنس، على أن نتشارك في العائد
برجاء التواصل إن كانت لديكم الرغبة في هذا
تقبلي تحياتي

الجوكر يقول...

بدون مجامله

ومش عاوز اى مشروب

إن الله الغنى

رائعة واحساسكِ طاغى

واتمنى تشريفك لمدونتى

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات