كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )



سورة الواقعة ..
مرتبطة معايا في عينيا بـ محمد وهو ع سرير الرعاية المركزة ..
الممرضة مش عاوزة تدخل حد 
انا بتحايل عليها
انا اخته !
مش هعمل حاجة
انا هقراله قرآن !
- طيب ادخلي
انا بقرأ قرآن .. سورة الرحمن اللي محمد بيحبها بقرأها وببكي اوي
وبين كل كام آية بتكلم معاه " وهو فـ غيبوبة اصلا ! "
قوم ياحمادة عشان تصلي بيا الفجر بسورة الرحمن زي مابتصلي بيا يامحمد !
وابكي
واسمي تاني واكمل قراءة !

الممرضة بتندهلي .. اسمك ايه ؟؟ بقولها رحمة .. بتقولي اخوكي الوحيد .. قولتلها عندي سلمي كمان 
قالتلي معندكيش ولاد غيره ؟ .. قولتلها لاء ..
دمعت .. قالتلي عنده كام سنة .. قولتلها 22 .. عنيها دمعت اكتر
قالتلي طب يارحمة .. اقريله سورة الواقعة !

بكيت من طريقة كلامها اللي كانت بتوحي انه خلاص مفيش فايدة !
ومسحت عنيا وبدأت اقرا سورة الواقعة
مع كل كلمة كنت بحس اني بتقبل الأمر الواقع !
بقرأله
 " اذا وقعت الواقعة ليس لوقعتها كاذبة "
وبدمع بسيط .. وجع قلبي " بيخف ! " 
آه كان بيخف !

كنت بتقبل اني هشيل مسئولية اني ازاى اقوي امي اللي قاعدة برة مستنية دكتور يقولها ابنك بقي كويس !
بتقبل امر ازاي افكر امي " اللي مش محتاجة واحدة زيي وانا بالنسبة ليها زيرو ع الشمال " بإن ربنا مقدر دا " إذا وقعت الواقعة ليس لوقعتها كاذبة ! "

كنت بستقوي بكل آية بقراها وقلبي مابين النار والهدوء !

" فـ أما إن كان من المقربين .. فروح وريحان وجنة نعيم 
وأما إن كان من أصحاب اليمين .. فـ سلام لك من أصحاب اليمين
وأما إن كان من المكذبين الضالين .. فـ نُزل من حميم .. وتصلية جحيم ..
إن هذا لهو حق اليقين .. فـ سبح بـ إسم ربك العظيم "

مع انتهاء سورة الواقعة .. قومت بوسته في جبينه وبوست ايديه " آخر مرة كنت ابوسه فيها رغم انها قبل وفاته رسميا بيوم ونص! " .. وقولتله ربنا يجعلك من اصحاب اليمين يامحمد 

# كل ما بسمع أو بقرأ سورة الواقعة .. المشهد دا بحذافيره بيمر ادامي !

9 CoMeNTaToOoOoZ:

لورنس العرب يقول...

رحمه الله وأسكنه فسيح جناته
وأبعد الله عنك وعن الأسرة الألم إن شاء الله
________________
كثرة التفكير في الأحزان صعبه
لن أقول لك أنسي لأن مفيش حد بينسى اخوه أو ابنه أو أي حد عزيز عليه
انا شخصيا لي اصدقاء توفاهم الله وفيهم واحد كان حارس المرمى لفريق الكرة بتاعي وانا صغير وتوفى من 13 سنه ولغاية دلوقت لسه معقدني
بس في جميع الاحوال الواحد بيحاول يتغلب على احزانه لكي تسير الدنيا

Lobna Ahmed يقول...

ربنا يخفف عنك يا رحمة

hayam hakam يقول...

أسكنه الله فسيح جناته
لازم نتغلب علي الاحزان ف الحزن في القلب
شئ كويس انك بتحبي اخوكى ومن وقت للتانى تفتكريه
بس لما تفتكريه ادعيلو بارحمة والسكينة
بلاش حزن عشان الحزن ميتغلبش عليكى
مش معنى ان الانسان فرح وضحك يبقي نسي احبابه لا
بس لازم الانسان يعرف يعيش عشان يتغلب علي مصاعب الحياه
تقبلي مروري
مع تحياتى :
هـــيـــامـــ ســـالـــمــــ

asmaa fathy يقول...

البوست ده صعب اوووي يارحمه

بجد وجعنى


ربنا يرحمه ويجعل قبره روضه من رياض الجنه ان شاء الله

صعب ننسى حد بنحبه كتير بنحس اننا مفتقدينهم

وكتير بنحس اننا محتاجين نتكلم معاهم

بنتحط في مواقف نتمى انهم يكونوا موجودين جنبا وناخد رائيهم

عموما ربنا يصبرنا علي فراق الأحبه

تحيــــــــــاتي
كانت هنا ورحلت

Asmaa Fathy

سواح في ملك اللــــــــــــــــــه- يقول...

رحمه الله واسكنه فسيح جنانه يارحمة

rona ali يقول...

كلامك رهيب يا ريمو :(

ربنا يرحمه ياحبيبتى ويسكنه فسيح جناته

Bent Men ElZman Da !! يقول...

وجعتينى أوى يا رحمة
ربنا يقويكى ويصبرك ويدخله فسيح جناته يارب

نسمة عابرة يقول...

رحمه الله و لا قاكِ به في الفردوس الأعلى يا رب

richardCatheart يقول...

ديما فى رائى ان النوع دا من البوستات بيكون مكتوب لينا احنا اللى كتبينة يمكن نوع من التسجيل لحدث واحساس ما معرفناش نشيلة لوحدنا بس اتشال مافيش تعليقات ممكن تليق بالبوستات دى او كلام

ربنا يرحمة ويتقبلة ويصبر امك قبل مايصبركم كلكم ويجعله فى صحبة نبينا المصطفى

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات