كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )





الحياة عبارة عن مشاهد منفصلة / متصلة !
كل مشهد زي ما هو بيمر فـ حياتك 
بيثبتلك أن الحياة مستمرة ..
وهـ تستمر !
بيك أو من غيرك ..

و لما يكون فـ حياتك ناس بتحبهم وبيرحلوا
( سواء بمزاجهم بيفارقوك .. أو ربنا أرادلهم أنهم يفارقوا الحياة كلها )
هـ تستغرب ..
أزاي الحياة بتستمر بعدهم !
ازاي الشمس بتطلع كل يوم فـ ميعادها كدا !
ازاي الناس بتقدر تفرح !
ازاي بتاكل وبتشرب عادي كدا واعز انسان ليك راح من حياتك ؟؟

اسئلة كتيرة ..
اجابتها فـ سطر واحد

# طـول ما ربنا مقدرلك يوم زيادة ف حياتك تحياه .. لازم حياتك تستمر برضاكـ أو غصب عنك !

..

الحياة مش هتستناك ترضي عنها عشان تمشي أو تقف
الحياة كدا كدا مستمرة وماشية 
وانت اللي بـ ايدك تعديها صح لحد ما توصل لـ خط النهاية " بالنسبة ليك " وتدرك انها هتستمر كمان بعديك !
أو تثبت في مكانك ف الدايرة .. 
بس هتلاقي الدايرة بتلف من حواليك !
وبكدا هتبقي بتعترض عن قضاء ربنا اللي قدرلك ان الحياة تفضل مستمرة !!

..

# الفراق صحيح بيوجع " جداً " / لكن للأسف .. الحياة بتستمر !

..

* ع الهامش ( اعتراف ) /

للأسف ..
الحياة مستمرة
رغم انها وحشة من غيرك أوي
.. ربنا يرحمك يامحمد ..







المشكلة ..

انك لما بتحب حد أوي / مبتتخيلش انه يروح منك ويختفي من حياتك فجأة

لو بمزاجه هتنساه او هتعمل نفسك ع الاقل بتنساه!
بس هتفضل مصدوم انه ازاي يبعد ويتخلي عنك كدا !
فما بالك لو مش بمزاجه ..
بتفضل طول العمر مصدوم ومجروح

طب لو بمزاجه كنت هتقدر كل فترة تتصل بيه وتسمع صوته وتقفل !
تتطمن عليه من بعيد لبعيد !
تشوفه لو حتي صدفه وتختلق اي سبب عشان تسلم عليه !

انما لو مش بمزاجه !
هتسمع صوته ازاي ؟
هتشوفه حتي لو من بعيد ازاي !
هتلمس ايديه ازاي ؟؟


# الخلاصة ... المفروض نتعود ع الفراق ونـسستم نفسنا عليه / بس مهما النظريات اتعملت .. صعب التطبيق ،،
 الفراق دايما بيوجع / دايما بيوجع :(







جرب ..

لما ربنا يكرمك بحاجة كان نفسك فيها اوي
احمده
وادعي لكل الناس ربنا يرزقهم بنفس الحاجة دي !

...

لما ربنا يبتليك بمصيبة تهز كيانك
تجرحك وتألمك !
احمد ربنا برده ! ملكش غيره واكيد ربنا له حكمة فـ حدوث المصيبة دي
واستغفره
وادعي لكل الناس انهم ما يمروش باللي انت مريت بيه .. وميتجرحوش نفس الجرح وميتوجعوش من نفس الألم ..

...

الدعاء بظهر الغيب سحر 
بيريح القلب
وبيكبر الفرحة
وبيخفف الحزن والمصيبة !


ع الهامش //
~~~~~~~~

* ربنا يرزق كل البنات الازواج الصالحين اللي يقدروهم !
ويرزق كل أنثي الذرية الصالحة وميحرمهاش من انها تشوف طفلها بين ايديها 

* يارب محدش فـ الدنيا يفقد انسان عزيز وغالي علي قلبه ويجرب وجع الفراق الأبدي ابداً

...









اللهم نفسي نفسي ..
لم أرق إلى مستوى حبيبك القائل ( أمتي .. أمتي ) ..
يا حبيبي يا رسول الله .. حتى في وسط أشد المواقف يوم القيامة تقول ( أمتي .. أمتي ) ..
فداك نفسي و روحي و كياني يا حبيبي يا رسول الله ..
لم تعش لنفسك قط .. اعذرني إن خذلتك أو خذلت أمتك ..
و كلي أمل في قلبك الرحيم أن تستقبلني يوم القيامة على ضعفي و ذنوبي فتقبلني على ما كان مني من خذلان و ضعف ..
فأنت أرحم من خلق و أرحم من مشى على الأرض .. 

أقبلني و ضمني إليك في وسط هذا الزحام .



مالك يا نفس واهمة بما تسمعينه من إطراء ؟! 
لا تجعلي مديح الناس يغرك .. 
لا تجعلي نظر الناس إليك يلهيك عن حقيقتك ..

انظري إلى نفسك .. نفس صغيرة ضعيفه ..
ما هي إلا نفس من بلايين الأنفس و إني لأجدها في قعر تلك البلايين من ضعفها و هوانها ..
ما أقبح الشهرة الخادعة ! 
و ما أخطر المديح الذي يعمي عن رؤية حقائق الأمور ! .. 

لا تغتر بنفسك في وسط هذا الزحام .



يا الله ..
ما أراني إلا عبداً مقصرا في حقك ، بعيداً كل البعد عن قربك بعيداً كل البعد عن حبك ..
ما أراني إلا هالكاً قد غرتني الدنيا و أغرقتني الذنوب و الشهوات ..
أدعي حبك و لم يذق قلبي حبك قط !
فكيف يذنب من ذاق حبك و لو للحظة ؟ ..
لا و الله ما عرفتك و لا عبدتك حق عبادتك .. 
سيطرت الدنيا على قلبي الضعيف .. 

اللهم أخرجني من وسط هذا الزحام ! .




أشعر بيأس شديد .. بضعف كبير .. بوهن عظيم .. بإحباط رهيب ..
أشعر و كأن كل يوم يزيدني منك بعدا يا الله !!
و الله إن هذا لهو الخذلان العظيم في وسط ما أنعمت علي من نعم ..
أكرمتني بأن خلقتني مسلماً من غير حول مني و لا قوة ..
و قربتني من خير دعاة الأمة ..
فواحسرتاه على ما أضعته من فرص و على ما أضعته من عمر .. 

أشعر بضجيج و ضياع في وسط هذا الزحام .


يا رب ..
المصلون كثير .. و الصائمون كثير .. و المتصدقون كثير ..
كلهم قد زحموا أبواب الخير .. و لا أجد لي بينهم مكاناً ..
سبقني ملايين الناس إليك و ما أنا إلا واحد من ملايين تبغي رضاك ..
وما أنا إلا واحد من ملايين تتوجه إليك بالدعاء كل يوم ..

فأين أنا من بين هؤلاء ؟ .. أين أنا وسط هذه الحشود ؟
أين أنا في وسط هذا الزحام ؟



أعلم أنه ليس لي خلاص إلا بأمرك كن فيكون ، و لكن كيف لي أن أحصل على أمرك ؟ ..
كيف لي أن أحصل على شرف حبك و قربك ؟.. 

كيف لي أن أدخل في عبادك المقربين وسط هذا الزحام ؟



رياء .. ذنوب .. تعلق بالدنيا .. كبر .. غرور .. قلة حب ..
من ينجيني من كل هذا الزخم من الذنوب ؟
والله مالي طاقة على كل هذا
 والله إن قلبي ليعتصر ألماً على حالة الوهن التي قد أصابته ، كل هذه الذنوب 

 من يخرجني من وسط هذا الزحام ؟


_ من كتاب " خواطر شــاب " لـ أحمد الشقيري






كم يبدو الصباح ثقيلاً حين يأتي محملاً برائحة موت عبر حيطان قلبك / منزلك !!
لا شئ يستيقظ مع أول نقطة للضوء سوى الحزن والدموع 
ولا شئ يستقر بعينيك سوي صور من رحلوا 
تشعر حينها أنك ثقيل علي الحياة .. وأنها ثقيلة عليك 
هل أحتاج لحياة أطول والنهايات واحدة ؟!!

تسأل حزنك بلا فائدة !!


_ من كتاب نوافذ بلا قمر / لـ إيمان أحمد


~~~~~~~


.. ملحوظة علي جنب ..
اليوم هو ذكري وفاة الساخر جلال عامر

الساخر الذي مات حزناً علي الوطن !

رحمك الله ورحم جميع أمواتنا 






يارب فرح كل القلوب
وارزق كل مشتاق الحاجة الـ مشتاقلها أوي !!

...

يارب ارحم ابراهيم الفقي
وجلال عامر
وخالد سعيد
ومحمد أخويا 
ارحم كل اقاربي المتوفيين

...

نفسي ارجع تاني للجنان !!

...

عاوزة الحيوية ترجع تاني جوايا !
انا بقيت ميتة بتتحرك وبتاكل وبتشرب بس !!

...

مستمتعة باحساس الأمومة !
يارب اشوفه وأحس بيه فـ حضني بقي <3

...

عاوزة ربنا يحسن خاتمتي !

...

عاوزة اكتب عن حاجات كتير
لما باجي باكتب
بنساها كلها
وبرجع اخرف تاني !!

...

مكنتش عاوزة حد يقولي كل سنة وانتي طيبة
كنت عاوزة اسمع : كل سنة وانتِ رحمة !
مش ناس كتير قالتلي كدا السنة دي :(

...

وحشني صوت فيروز وحمزة نمرة 
وماليش نفس اسمع اي حاجة بمزاجي
" هو لازم يعني صدفة وعنوة ! "

...


سيب نفسك لو حتي يوم .. لو كل الناس هيقولو عليك مجنون !!

هو ازاي صوت عايدة الايوبي حلو كدا !!








عن انه يكون يوم ميلادي وانا مش عاوزة حد يفكرني بيه !!

7 فبراير
هو أول يوم صرخت فيه وانا باجي للدنيا دي !
كل سنة اقول امتي اكبر امتي اكبر !
فاكرة لما كان عندي 16 سنة
قولت امتي اكمل الـ 20 واوصل للـ 30 بقي !
انا مش عاوزة ابقي عيلة .. انا عاوزة اكون كبيرة كدا !

لما كملت الـ 20 سنة
فرحت :)
وحسيت اني كبرت وشيلت نفسي كدا :))

بس من وقتها والدنيا بتحط فيا وبتوديني وبتجيبني !
سنة ورا سنة والعمر بيجري
مش حاسة اني بحقق شئ مفيد !
حياتي عادية جداً
مش عارفة ايه هدفي اصلا !

...

من سنتين
وكل سنة بيجي فيها عيد ميلادي من السنتين دول ودي تالت سنة
اضايق لما حد يقولي عقبال 100 سنة !
للمرة المليون بقولها
انا عاوزة اخلص بدري بدري

السنتين اللي فاتو
كل مايقرب يوم ميلادي
احس بـ ان الموت قريب مني أوي
امتي هموت وازاي؟

فبراير اللي فات
احساس الموت كان واصلني اوي
وبعد عيد ميلادي بـ 3 او 4 ايام
ابراهيم الفقي و جلال عامر ماتو !

فبراير السنة دي
عدي عليا وانا من غير اخويا
اخويا اللي احتفل معايا السنة اللي فاتت

مكنش معايا اليوم دا !

أنا حزينة اوي :(


الدنيا وحشة اوي من غيرك يامحمد ..

...

أنا ملخبطة
ومضايقة
انا لسة صاحية من النوم
وعاوزة اكمل الشهر كله نوم
!

فبراير ..
طير أنتـ <_<

////

ملحوظة ع جنب
 7 فبراير كمان عيد المدونة التالت :)
كل سنة وانتي طيبة ومعايا يامدونتي :))

////

ملحوظة أخري ..
بعتذر للمدونة عن الهري اللي بكتبه فيه !
:)

وبقالي يومين مهبلتش فيكي يامدونتي العزيزة .. حاسة بافتقاد شديد :)









محمد وحشني اوي 

...

نفسي ماما ترتاح بقي من كل حاجة وحشة 

...

احساس جميل وانا جوايا كائن بيكبر كل يوم 
نفسي اشوفه اوي بقي 

...

بفرح لما بحلم بمحمد أوي 
بحس بحضنه وبلمسته وبفضل كدا كتير لحد ما بفوق وبستوعب انه مجرد حلم !

...

انا حاسه انه ولد
بس لو بنت هفرح أووووي 

...

وابني هيكون اسمه علي اسمك
هيعرف صورتك ويحفظ قصصك
" يارب تكون مبسوط فـ مكانك / اغنية لمحمود العسيلي "

...

التدوين اليومي دا شئ عظيم !

...

بحب جوزي أوي
وبحب أبوس ايديه
وهجيب عيال يبوسو ايديه زيي
وزي ماهو بيعمل معايا دايما 

...

زهقت ومليت !

...

عيد ميلادي بكرة !
مش عاوزة افتكر
مش عاوزة أكبر اصلا !
انا عاوزة أموت صغيرة 

...

أنا فعلا كبرت !!

...

أنا هابقي أم !!
أنا مش مصدقة !!

...

يارب صبرها وعوضها خير

...

ربنا كبير أوي أوي أوي أوي 

...

لسة بحب أقعد لوحدي كتير !

...

مبحبش الظلم

...

الطيبين بيموتوا كتير أوي

...

الأشرار لسة بيستبدوا .. مابيتعظوش ابداً !

...

أنا هموت ازاى ؟؟

...

مبحبش اتصور 

...







شكر خــاص جداً

شكراً للإنسان اللي ربنا بعته ليا عشان يكونلي زوج
شكراً لأنك مبتتعاملش معايا كـمجرد حبيبة بس 
شكراً لأنك أخويا وأبويا وابني وصديقي  
شكراً لأنك كل يوم بتثبتلي إنك سندي وضهري بجد !
شكراً لأنك مبتتخلاش عني 
شكراً إنك بتعمل كل اللي في وسعك عشان نكون مع بعض
شكراً انك بتيجي علي نفسك كتير وبتتحمل كتير علشاني 
شكراً إنك أول ما شوفتني شوفتني (مراتك)
شكراً إنك استحلمتني لما طلعت فيك لما قولتلي أول مرة "بحبك ! "
شكراً إنك بتحتويني حتي لو فلتت منك الحكاية دي شوية احياناً 
شكراً انك مبتحبنيش ازعل / حتي لو زعلتني مبتسبنيش زعلانة كتير !
شكراً اصلاً انك مستحملني بجانب كونك مستحمل نفسك :D
دي اصلاً معجزة :P
شكراً انك بتستحمل سخافتي أحياناً
شكراً انك بتحبني بجد وكل يوم بتثبتلي كدا بجد

يارب تفضل دايماً عند حسن ظني وأفضل عند حسن ظنك

شكراً يارب
انك بعتهولي
وخلتني أوافق أشوفه 
وقبل ما اشوفه خلتني أحلم بيه
وأحلم بالمشاكل اللي عايشنها
واللي كان بيطبطب عليا فالحلم
زي مابيطبطب عليا دلوقتي !
وأحلم بزفافنا
وفي نفس ذات الحلم
أسمع كلمة الحمدلله !

شكراً يارب انك بتحققلي كل حلم حلمته بيه 

الحمدلله يارب
وشكراً ىَ زوج المستقبل القريب بـ أمر الله

....

أحم ..
اللي فوق دا لقتني كتباه بتاريخ 1 فبراير 2012 

بعد سنة من كتابة الكلام دا

وبعد أكتر من 7 شهور زواج 

بعترف
إني مكنتش غلطانة في ولا كلمة وولا فكرة
إنت فعلا سندي وضهري ودنيتي 

أنا فعلا مقدرش أعيش من غيرك
بالذات وأنا شايفة حبك ليا اللي بيزيد كل يوم
واللي زاد الأضعاف وأنا شايلة منك حتة جوايا ♥

شكراً لـ حُبك .. شكراً لأهتمامك بيا
شكراً علي كل حاجة بتعملها معايا







عارفين ..
ربنا في سورة الطلاق قال " سيجعل الله بعد عسر يسرا "
وبعدها في سورة الشرح قال " إن مع العسر يسرا " وأكدها بالتكرار

كأنه بيقولنا فـ الأولانية ان الصعب فـ الدنيا ممكن يكون شديد بس ربنا هيسرها علي قلبك بعدها
وفي سورة الشرح .. حب يقولك ان ممكن وانت في عز الكرب والمصيبة ربنا يطبطب عليك بحاجة حلوة اوي
" مع العسر يسرا " يعني الاتنين في نفس التوقيت !!

ربنا كبير وجميل اووي
اللهم لك الحمد علي كل حال يارب العالمين 
وظني فيك ياسندي جميل  









...

عارف ..
الست اللي بتدي دايماً ومبتاخدش !

عارف ..
الست اللي كل ما تفرح أو تفرد ضهرها شوية
تيجي حاجة تكسرها
وبرده تصمد !

عارف ..
الست اللي بتعمل كل حاجة عشان تسعد ولادها 
حتي لو دا علي حساب نفسها !

طب عارف ..
الست اللي استحملت كل حاجة فـ الدنيا حتي القرف والذل
عشان أعز الناس ليها !

وعارف كمان ..
الست اللي لما مات ابنها
أول ماعرفت صلت وسجدت وقعدت تحمد ربنا وتستغفره !

عارف ..
الست اللي ملامحها كلها حزن وتعب 
حتي لما بتضحك شوية / الدموع بتنزل من عينها 

عارف اصلا
كل دا وأكتر
في أمــي 
اللي استحملت
وبتستحمل
وان شاء الله ربنا هيديها القوة وهيعوضها عن كل حاجة وحشة

ربنا يطولي في عمرك ياست الحبايب
أنا من غيرك هتعب أووي

ساعات بقول يارب اموت قبلها لأني بعد الشر عنها مش هستحمل لو جرالها حاجة
بس لما بفتكر ألمها وتعبها ووجعها بعد موت محمد
بخاف أجرحها اكتر ماهي مجروحة

" وأعشق عمري لأني
إذا مِت /
أخجل من دمع أمي "
_ محمود درويش

بحبك يـا أمي 
ربي يخليكي ليا 










اترددت اني اكتب النهاردة أصلا
وقولت هـ أكسر التحدي من أول يوم !

جوايا كلام نفسي أكتبه وفي نفس الوقت مش عاوزة .. رغم انه دايما بيتردد جوايا

ذكريات
حكايات
مناوشات
مغامرات
حاجات كتير أوي 

قبل زواجي بفترة بسيطة جداً
كنت هاكتب فـ المدونة بوست بنفس العنوان
وعند اللحظة الحاسمة 
مكتبتهوش :)

ياتري لو كنت كتبته كنت هاكتب ايه دلوقتي !!

كنت هاحكي عن ايه ولا ايه //

~~~~~~~~

* اخويا الأصغر مني بسنتين تقريباً
كان طولي مرتين تقريباً :)
كانت ملامحه جميلة وبيتعاكس مني :)
آه وربنا ^_^
كانت ايديه ناعمة وجميلة 
كان بيمسك ايديا دايما ويقولي 
" انتي ايديكي صغيرة أوي ، ايه الصوابع دي :)) "
فـ أرد عليه برخامة
" انت اللي ايدك ايد ديناصور "

* أخويا الصغير ..
اللي كان وانا نازلة الجامعة الصبح بيديني مصروفي زيه زي ماما !
واحيانا كان يقول لماما
" وفري فلوسك .. مصروفها النهاردة عندي "

* أخويا الصغير .. 
اللي وقف جنبي في جهازي وأغلب حاجتي كانت منه هو !

* أخويا الصغير ..
اللي كنت بسرق منه الرصيد بالليل وبعدها بيومين افتكر فـ أقوله اني خدت منه رصيده ^_^

* أخويا الصغير ..
اللي كان ولآخر لحظة أحن عليا من أبويا 

* أخويا الصغير ..
اللي كان روحه فـ سلمي " اختي الصغيرة " وروحها فيه !
كان طفل معاها اوي
افتكر مرة لما بتهزر معاه وقالتله ياحمار
زعقتلها أوي 
رد عليا وقالي " انتي مالك تقولي اللي هي عاوزاه ! "
# يابني ازاي دا انت اكبر منها ب 9 سنين يعني تحترم نفسها معاك
# ياستي سلومتي تقولي اللي هي عايزاه
ويحضنها ويبوسها وانا اتغاظ واشتمهم هما الاتنين !

* أخويا الصغير ..
اللي كنت اتصل بيه وأمليه ليست طلبات وأقوله تجيبهالي وانت جاي ياواد
ويقولي لاء ..
وبرده يجيبها =))

* أخويا الصغير ..
اللي لما ماما تعمل اكل ماليش نفس ليه
اتصل بيه واقوله اطلبلي ديلفري كذا وكذا 
فيجيبلي بنفسه ويجي :))

* أخويا الصغير اللي آخر ايامي قبل زواجي
كان بيصلي بيا إمام وبيرتل القرآن بصوت جميل
كان بيحب سورة الرحمن
كان ناوي يحفظ القرآن

* أخويا الصغير سناً
الكبير احتواءاً واحساساً ومسئولية
راح في المكان الأحسن من هنا
سبقنا ع الجنة ويارب نحصله عن قريب 

* أخويا الصغير الكبير
سابنا مكسورين من فراقه
فرحانين بخاتمته اللي احسبها جميلة وربنا حب يطمنا بيها عليه

* أخويا الصغير الكبير
سابلنا كل الذكريات الجميلة بقلبه وحنيته وكرمه 
وسابلنا الدمووع والآهــة من وجع القلب علي فراقه

# ربنا يرحمك يا حنين 
ويـ رب ـا تكون مبســوط في مكــانك




وللذكريـــات بقية ,,,






مدونتي الحبيبة اللي وحشاني جداً
حبيت ارجعلك عشان انفض التراب عن حيطانك
وخيوط العنكبوت المدلدل من سقفك :))

اعذريني ، قصرت معاكي كتير 
اصل انا فـ آخر فترة اتعودت علي اني اجي هنا افضي طاقة حزني وبس
" نكدية بقي تعملي ايه ! "
لما مريت بفترات كتير فـ حياتي حلوة اوي مكنتش عارفة اجي اكتب ايه ولا ايه !
أصل زي ماتقولي كدا الدنيا ضحكتلي فجأة وادتني كل حاجة حلوة
بس ..
تأتي الرياح بما لا تشتهي السفن
والدنيا عمرها مابتمشي علي وتيرة واحدة
ورجعت تاني اتوجع واحزن !
...

أنا من قبل ما ارجع تاني لنوبة الحزن دي بفكر ارجعلك والله :)
بس مكنش في تشجيع نفسي لازم .. 
غير اني حاسة اني مبقتش اعرف اكتب
لاء .. دا مش احساس ، دا حقيقي جداً

ودا لأسباب كتيرة اوي يامدونتي
مثلا مثلا / انا لما بقرأ دلوقتي اللي كتبته زمان " جزء كبير منه ! " بحس اني مش هوصل لنفس المستوي دلوقتي
انا دلوقتي بكتب مجرد فضفضات مش أكتر !
اه زمان كنت بفضفض برده او بكتب اللي يمسني واللي بحس بيه جدا واللي بمر بيه .. بس كنت بحس كـ قارئة ممكن اقراه من غير ما أمل
أنا دلوقتي لو قريت اللي بكتبه ، هــ أمل :@

وتاني حاجة ان بسم الله ماشاء الله كمية الموهوبات بقو كتير اوي ع الفيس
والتدوين اصبح مكانه الفيس بوك
بكتابة كل الأفكار الجميلة الحلوة 
فـ كل ما افكر اكتب حاجة الاقي 100 كاتبينها أحسن مني مليون مرة
فـ بكتفي بالقراءة والتشجيع ومن هنا نسيت الكتابة اصلا :)

عموماً
انا قررت ارجع 
وهـ اكتب 
وهـ أهبل 
ومطالبة انتي بانك تستحمليني
من غير ماتطرديني :))

...

شكراً لحاجات كتير بتشجعني اني أرجع تاني للمدونة
انا هحاول ادون بشكل يومي او شبه يومي :))
بس مش هسجل اللينك فـ الحملة ومش عارفة ليه O.o

وشكراً لـ نيللي علي
صاحبة مدونات " يوم من عمري " و " عطر الأحباب "
شكراً لأن مكالمتك ليا كل فترة فيها حث علي اني ارجع تاني للمدونة والكتابة واخرهم النهاردة :)

وشكراً لـ هبة فريد صاحبة مدونة " يومــاً ما سأكون
بتشجعني بشكل مباشر وغير مباشر 
انتي اصلا موهوبة يابنوتة :))

وشكراً لمدونتي اللي مستحملة غيابي :))

وأشوفكم بكرة " إن وفيت وعدي يعني :D "

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات