كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )


البوست دا رغم انه يعتبر حديث مع الذات
الا اني بطلب ان اللي يقرا يكون رايق لأن دا فيه دروس مستفادة
البوست دا من البوستات اللي في اعتقادي الشخصي لازم نقراه
حتي لو من باب تضييع الوقت
يمكن ربنا يجعلني رسالة من ربنا لأحدٍ ما لا اعلم مكانه او زمانه أو هويته
..............

برود !!
فعلا كنت فاكرة نفسي باردة
وفقدت الاحساس بالألم

كنت بكلم سها صاحبتي من كام يوم وللاسف انا بعترف اني مقصرة معاها بقالي كتير
ووانا في سلسلة اعتذاراتي لتقصيري معاها
وبتسألني اخبارك ايه ؟
قولتلها ولا حاجة انا بقيت باردة !
مبقتش ابكي ، مبقتش اصرخ ، مبقتش استنكر اللي بيحصلي / وكأنني نحسّت !

في نفس اليوم تقريبا وانا سهرانة بالليل بقلب بغباء غير معهود في قنوات التليفزيون
سمعت د.احمد عمارة في برنامج النهاردة مع دعاء عامر
بيتكلم عن الدعاء وعلاقته بالثقة بالله
شبهها بانك تكون محتاج فلوس ومديون وبتبيع اللي وراك واللي ادامك ويا اما هتتسجن
وكلمت ناس كتير محدش معبرك او محدش قادر يساعدك
وخلاص الليل جه
وبيفصلك كام ساعة عن النهار اللي هتكون فيه نهايتك كـ مفلس علني !
واذ فجأة تلاقي واحد صاحبك بيسأل عليك
فتطلب منه ينجدك
فيطمنك ويهديك ويقولك فوت عليا الصبح هتلاقي الفلوس اللي محتاجها وزيادة جاهزة ليك
ياتري لما تقفل التليفون معاه هتحس بايه !!

وسكت لحظات

جوا نفسي قولت ياااه أكيد هنام وانا مطمنة :))

كمل د.احمد عمارة وقال اكيد هتنام مطمن لأنك واثق في صاحبك وعارف انه مش هيخذلك وهيديلك الفلوس اللي انت محتاجها

ولله المثل الأعلي

ياتري ممكن نثق في البشر أكتر من ثقتنا في الله ؟!

طب اصلا يعني ليه بنرفع ايدينا وبندعي ربنا ولما بنزلها ناس مننا وانا كنت واحدة منهم بفضل قلقانة وخايفة !

.......

افتكرت كلامي
اني نحسّت من النكد والهم !
وصلحت كلامي واقتناعي فوراً
بعد ما تذكرت اني الفترة دي صلحت حاجات كتير بيني وبين ربنا !
ودايما كنت بقول يعني لما احزن واتعب وامرض من الحزن هيتغير حاجة من قدري ؟!
فـ الآخر اللي ربنا كاتبهولي هيكون


اكتشفت ان اللي انا فيه دا
مش اسمه برود وتنحيس

اسمه ثقة بالله ♥

الدروس المستفاد من الرغي دا

1_لما تدعي .. لازم تكون واثق ان ربنا هيحققلك مرادك
وهيستجيبلك

لأنه سبحانه وتعالي قال :
وقال ربكم ادعوني أستجب لكم

يعني الاجابة جاية جاية .. بس انت متستعجلش


2_ لو دعيت ومحستش براحة جواك .. يبقي في حاجة غلط وانت مش جواك الثقة الكافية في الله
أو ..
مش دا وقت اجابة دعائك
فـ لا تيأس / وأعد الدعاء مراراً وتكراراً

3_ افتكر دايماً
انك طول ما انت عايش
لازم .. تثق في الله / تحسن الظن بالله / متبطلش دعاء .
.......

آخيراً بقي

شكر خاص للآتي ذكرهم

* نيللي :
لأنها بعتتلي النهاردة " صدفةً " رابط يوتيوب فيه محاضرة لـ د.احمد عمارة بتتكلم عن اليقين في الدعاء وفكرتني بالحلقة اللي اتفرجت عليها وكنت بدور عليها ومش فاكرة اسم المحاضر
شكراً يانيللي
والرابط اهو لمن أراد الاستفادة ولمشاركة نيللي في الاجر :))
http://www.youtube.com/watch?v=ecpCENcLPSs&feature=share

* رنا :
في الفترة الأخيرة كنتي شعلة أمل ليا
بجانب كونك انتي ونيللي من اجمل الرسايل اللي ربنا بيبعتهالي وقت الضيق والرخاء

* نائلة :
رفيقتي في الألم المتشابه أحيانا وغالباً
شكراً لأنك نصحتيني بالمداومة علي الاستغفار اللي غير حياتي فعلاً
لأني بعد ما داومت علي الاستغفار ظنيت اني نحسّت وبعدين اكتشفت ان دي نعمة من ربنا عليا :)

* مها :
اللي بحب استمتع بشقاوتها ونظرتها للأمور بشكل برئ / بتحسسيني ان الدنيا بخير
برده شكراً

* شيرين :
اللي بنلحق بعض لما بنحزن ولما بنغلط / انا وهي بنراقب بعض وبندفع بعض للأمل دايماً

* سها :
ويكفي انك ياصديقتي مستحملاني الفترة دي كلها


.......

وشكراً لاتساع صدركم جميعاً :))))


11 CoMeNTaToOoOoZ:

rona ali يقول...

انتى تاجك وصل وانا بقرأ شوفتى انا شاطرة ازاى لوحدى

هى رنا تبقي انا بيجد ^_^

بصي يا ريمو من الاخر انا شايفه كلامك المرة دى طالع من تجارب وطحن واحتكاك من االحياه طالع بثقه في اللي بتقولى لانك مجربه وواثقه كمان من ربنا
بوست حلو افدنى انا شخصيا ويشرح القلب

معنديش تعليق بغير ربنا يخلى فراشه الحاج ظاظا لينا
ههههههههههه
قصدى ربنا يخليكى ليا ونفضل طول العمر اصحاب
انا لو كنت رساله زى ماتقولى ليكى فاعرفي ان ربنا هو اصلا اللي وجهنى اشوفك علشان اشوف نفسي انا كمان حزنى والمى سهلين وناخد بايد بعض
يعنى الرسائل متبادله بشكل ما ^_^


انا رغيت كتير يلا سلاموز من غير موز علشان الحساسيه :)

Alone Spirit يقول...

عجبنى البوست جدا
فى فرق بين التلبية والاجابة
اوقات بندعى بحاجة وهى مش خير لينا
لكن ربنا من رحمته بينا لو اخر حاجة عننا فهو شايلنا احسن منها
جميلة جدااا اعترافاتك وربنا يجعله فى ميزان حسناتك وناس كتير تستفيد من كلامك

Aya Mohamed يقول...

ثقتنا فى الله هى اساس حياتنا
واجمل احساس فى الدنيا لما نرفع ايدينا بعد الصلاة وندعى بكل حواسنا
تلاقى قلبك بيقول يارب قبل لسانك ودموعك بتأمن وراكى وعقلك واثق ان كدا الخير جاى وان ربنا هيختارنا الاحسن لينا لانه العليم الحكيم الرحيم
ربنا يجازيكى كل خير ودايما تبقى شعلة امل لكل اللى حواليكى :)

شمس النهار يقول...

كمان الدعاء بيريح
والدعاء مخ العبادة
بنبقا مصحصحين اوي واحنا بندعي

بوست جميل
واخدت اللينك شيرته عندي علي تويتر وطبعا منه للفيس العائلي

Mohamed Amer يقول...

جزاك الله خيراً

MR.PRESIDENT يقول...

أكرمك خالق العباد
ورفع قدرك وأذهب بأسك
وأسعدك وجعلك أكثرًا قربا
ورضى عنك .. وجعل حروفك في كتابك

صبح يقول...

بوست جمييييييييييييل لا بل راااااائع

الحمدلله على نعمة الاسلام و كفى بها نعمة

ربنا يحفظك

نهر الحب يقول...

حلو اابوست ده ريحني اوي
:))

هو المشكلة ان كتير الحياة بتاخدنا ومش بنبقي مركزين حتي في علاقنتنا بربنا وده بيبقي شيء وحش اوي اوي

اصعب حاجة اننا نبعد عن ربنا وبس احلي حاجة لما نرجعله ونعرف اننا ملناش غيره

نهر الحب يقول...

اه معلش نسيت اقولك انا كنت بتوه شوية عندك ومش بعرف اوضل للتعليقات فاعذريني عن التأخير
:)
الحمد لله اني وصلت

غير معرف يقول...

ما شاء الله عليكي ربنا يا رب يثبتك و يجعلنى من المستفيدين بجد من بوستك الرائع ده و ربنا يديم عليكي و علينا الصحبه الطيبه و الصالحه

غير معرف يقول...

أكثروا من قول استغفر الله الذي لاإله إلا هو الحي القيوم وأتوب إليه .
سبحان الله والحمد ولاإله إلا الله والله أكبر.
الله يرزقنا الرضا والقبول والعزة والكرامة والرفعةوالنجاح والتوفيق في أمري الدنيا والآخرة. آمين آمين آمين

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات