كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )


بمــا اني صاحية بدري علي غير العادة
وكأن يوم 25 يناير دا لازم يكون متفرد ومختلف :)
حبيت ارغي شوية بالمناسبة السعيدة دي
( مش اني صحيت بدري هع ، لاء بمناسبة 25 يناير :-) )


****

سنة عدت علي الثورة

سنة
دقنا فيها طعم الحرية
ودقنا فيها برده معني الضرب ع القفا ولا مؤاخذة :D

سنة
مات عشان الثورة ناس كتير
ماتوا عشان مصر وبس
ماتوا عشان يشوفوها نضيفة
ويعيشوها نضيفة
لكن قدّر ربنا انهم ماتوا

وركب الثورة ناس كتير
جم ع الآخر
زي الفلاح اللي بيزرع وبيشقي وبيتعب
ويجي واحد ياكل المحصول من غير ماحتي يدفع ربع تمنه !!

سنة بالظبط
علي ثورة اتعملت
وانقلاب اتعمل
ورئيس اتخلع
( وهيطلع براءة وهيطلعلكم لسانه نياهاها )
وناس هربت
وفســاد
كان نفسنا ينتهي

ومنتهــاش !!

ليه ؟

لأن النفوس هي هي !!
فقط الأسامي هي المتغيرة !!


لما نقول ديمقراطية واختلاف الرأي لا يفسد للود قضية
ونلاقي ان الحياة مهلبية في الملوخية !!
ولو مكنتش معايا تبقي عليا

الله عليا بصراحة بقول درر :))

همممم
حقيقي يعني
فين اخلاق الثورة
وهنا بقول الثورة بمعناها العام مش المقتصرة علي مصر فقط !
فين هي الأخلاق دي
لما بنقول لاء علي حاجة
واحنا بنعمل زيها !!

لما بنرفض الفساد
وجوة كل انسان في جزء كبير من الفساد اصلاً !!

ازاى نختلف ودا العادي بما اننا بشر
بس اللي مش عادي اننا منحترمش بعض باختلافتنا !!

ازاي بقينا أحزاب
ودا شئ جميل للديمقراطية
بس مش جميل ان كل حزب يحارب الآخر
وكل جماعة تكره التانية

ازاى بقينا بنخوّن بعض بصورة أكبر
بنشكك بسهولة في وطنية بعض
بنستهون اصلا بأخلاق بعض !!

ازاى لسة بنكدب
لسة بنسرق
لسة بنظلم
لسة بنجرح
!!

ازاى عيوبنا بتكتر ومبنحاولش نمحيها !
او علي الأقل نقللها !!

ازاي فرحانين بثورة
وازاى منتظرين يتغير حاجة
طول ما النفوس لسة زي ماهي !!
ولسة مـ ثورناش ع اللي جوانا !

قلتها كتير
وبقولها
وهفضل أقولها
والكلام مش من عندي
دا من عند رب العزة والكرامة والانسانية والحرية
*
( إن الله لا يغير ما بقوم حتي يغيروا ما بأنفسهم )
*
إسعوا لتغيير ما بأنفسكم
حتي يتغير ما حولكم


بعتذر
وبعترف اني ربما أكون متشائمة بعض الشئ
بس اللي متأكدة منه
ان البلد دي مش هينصلح حالها
الا لما الناس اللي فيها يتعدلوا

وبــس !

~
أيامكم حرية ان شاء الله

ودمتم
:)
~

7 CoMeNTaToOoOoZ:

لورنس العرب يقول...

ما هي سنة الله في الارض؟
إن الله لا يغير ما بقوم حتى يغيروا ما بأنفسهم
لو مرت سنه واثنين وثلاثه ستجدي الحال كما هو طالما اننا بقينا على حالنا
مبارك كان جزء من المشكله ولبس المشكله كلها... هذا ما غاب عن الناس مع الاسف وتخيلوا ان رحيله فقط هو الحل.. ولهذا كانت الصدمه قويه بعد مرور الايام والشهور وعدم حدوث شيء محترم.. هم تخيلوا ان الحل في ان الثوره تستمر.. لكن لا...
الحل في الناس لان المشكله تساسا فينا احنا

Nelly Adel يقول...

اتكلمتى بلسان حالى بصراحة
بتجنن لما اقابل ناس متضايقة اوى إن الثورة ماتمتش وهم نفسهم ماغيروش حاجة فى حالهم
ربنا يستر ويقدرنا على الاخذ بالحق والسير به

سواح في ملك اللــــــــــــــــــه- يقول...

كلامك في الصميم

نيللى يقول...

عندك حق ياريمو فى كل كلمة قولتيها محتاجين نعمل ثورة علي النفس.

تحياتي لكي ياريمو

rona ali يقول...

ايوة ياعم اغيب يومين

ارجع الاقيكى يتقولى درر كمان

بصي انا معاكى في كل دة

وفعلا الثورة والحريه اتفهمت غلط

لوى دراع , قله ادب , قله زوق, وبجاحه في بعض الاحيان

للاسف دايما مفهوما عن اى شئ بيبقي معكوس تمامآ عن اصله

:)

نهر الحب يقول...

تعرفي اني معاكي جداااااااااا
انا شايفة ان مش المشكلة في الجيش ولا المظاهرات ولا مين حيمسك البلد ولا اي حاجة
الشمكلة كلها في الناس اللي متغيرتش ومش باين انها حتتغير ابدا
بالعكس انا حاسة ان الناس بيتغيروا للأسوأ
:((

ريري كربكه يقول...

ربنا سبحانه وتعالى بيقول
ان الله لا يغير ما بقوم حتى يغيروا ما بانفسم
والله كلامك حلو اوي بس اللي يفهم
وانا كمان متشائمه بس انا ديه طبيعتي اساسا
مش عارفه بقى المره ديه تشائمي في محله ولا لا
تسلمي على البوست حلو جدا

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات