كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )



شكراً يارب

لآنك دايما بتريحني
مهما تعبت
وبتداويني مهما انكسرت
انا بحبك أوي يارب

~~~~~

وآسفة يارب

آسفة اني معرفش ليه فجأة فقدت الأمل
مع ان جوايا كان مرتاح ومطمن !
بس استسلمت للشواهد والظروف
ونسيت الأمل
بس منستش انك كبير يارب
منستش انك قولت
إن بعد العسر يسرا
بس فقدت الأمل بس ان اليسر دا هو اللي انا بتمناه وبحلم بيه

~~~~~

سامحني يارب

مش هعمل كدا تاني
مش هيـأس تاني
مش هنكسر تاني

هحاول يارب
وانت هتقويني أكيد

~~~~~

بس يا الله

سامحني لو يوم اتوجعت وقولت آه
مهما قولت الـ آه دي
عارفة وواثقة انك هتداويني
وهتخليني أقولها تاني
بس بفرحة
مش بـ ألم

******

بحبك يارب

ونفسي اصرخ دلوقتي بـ أعلي صوت
" مع اني صوتي رايح اصلا ^_^ "
واقول
شكــــــراً يااارب

.........................


  • وع الــهامش بقي

دا تقريباً أول بوست في حملة تدوين شهر فبراير
مش عارفة هستمر في التدوين الشهر كله ولا لاء
بس هحاول إن شاء الله
لأني اصلا بحب الشهر دا
وزي ماكان في تدوين أكتوبر " شهر أحزاني كما أسميه دائما "
فـ انا متفائلة بتدوين فبراير " لأن دايما في حاجات حلوة بتحصلي برده في الشهر دا "

  • ملحوظة بقي في هامش جديد

انا اكتشفت ان النهاردة 31 يناير مش 1 فبراير
فـ ولا هيهمني -_-
وهنزل البوست برده
وهعتبره يتبع تدوين فبراير
(ايموشن رخم وبيطلع لسانه :P )


ودُمتــمْ ^_^




 * مللتُ التظاهر بأني غير قابلة للكسر
_ ( سارة درويش )
~~~~~

تعبت من اخفائي لجروحي والآمي
تعبت من الابتسامة التي تُخفي الكثير من الوجع

...

أنا مكسورة

نعم

كسرني الحزن الذي يقتحمني بقوة
كسرني الفراق الذي أخشاه
كسرني الألم 
كسرني البكاء المخفي خلف الابتسامات الشاهقة !

...

نعم اثق في الله
وثقتي هذه تداويني احياناً وغالباً وابدا

ولكن في داخلي شرخ عميق
اخشي ان يزيد
فتظهر كسوري
التي أحاول جاهدة الا اظهرها !!

بالرغم من اني حقاً
~
مللت التظاهر بأني غير قابلة للكسر


~~~~~
* ازاي في عالم كله معمول من ازاز ماتترعبش لـ كل حاجة تتكسر !!
_ (أحمد العسيلي)


بمــا اني صاحية بدري علي غير العادة
وكأن يوم 25 يناير دا لازم يكون متفرد ومختلف :)
حبيت ارغي شوية بالمناسبة السعيدة دي
( مش اني صحيت بدري هع ، لاء بمناسبة 25 يناير :-) )


****

سنة عدت علي الثورة

سنة
دقنا فيها طعم الحرية
ودقنا فيها برده معني الضرب ع القفا ولا مؤاخذة :D

سنة
مات عشان الثورة ناس كتير
ماتوا عشان مصر وبس
ماتوا عشان يشوفوها نضيفة
ويعيشوها نضيفة
لكن قدّر ربنا انهم ماتوا

وركب الثورة ناس كتير
جم ع الآخر
زي الفلاح اللي بيزرع وبيشقي وبيتعب
ويجي واحد ياكل المحصول من غير ماحتي يدفع ربع تمنه !!

سنة بالظبط
علي ثورة اتعملت
وانقلاب اتعمل
ورئيس اتخلع
( وهيطلع براءة وهيطلعلكم لسانه نياهاها )
وناس هربت
وفســاد
كان نفسنا ينتهي

ومنتهــاش !!

ليه ؟

لأن النفوس هي هي !!
فقط الأسامي هي المتغيرة !!


لما نقول ديمقراطية واختلاف الرأي لا يفسد للود قضية
ونلاقي ان الحياة مهلبية في الملوخية !!
ولو مكنتش معايا تبقي عليا

الله عليا بصراحة بقول درر :))

همممم
حقيقي يعني
فين اخلاق الثورة
وهنا بقول الثورة بمعناها العام مش المقتصرة علي مصر فقط !
فين هي الأخلاق دي
لما بنقول لاء علي حاجة
واحنا بنعمل زيها !!

لما بنرفض الفساد
وجوة كل انسان في جزء كبير من الفساد اصلاً !!

ازاى نختلف ودا العادي بما اننا بشر
بس اللي مش عادي اننا منحترمش بعض باختلافتنا !!

ازاي بقينا أحزاب
ودا شئ جميل للديمقراطية
بس مش جميل ان كل حزب يحارب الآخر
وكل جماعة تكره التانية

ازاى بقينا بنخوّن بعض بصورة أكبر
بنشكك بسهولة في وطنية بعض
بنستهون اصلا بأخلاق بعض !!

ازاى لسة بنكدب
لسة بنسرق
لسة بنظلم
لسة بنجرح
!!

ازاى عيوبنا بتكتر ومبنحاولش نمحيها !
او علي الأقل نقللها !!

ازاي فرحانين بثورة
وازاى منتظرين يتغير حاجة
طول ما النفوس لسة زي ماهي !!
ولسة مـ ثورناش ع اللي جوانا !

قلتها كتير
وبقولها
وهفضل أقولها
والكلام مش من عندي
دا من عند رب العزة والكرامة والانسانية والحرية
*
( إن الله لا يغير ما بقوم حتي يغيروا ما بأنفسهم )
*
إسعوا لتغيير ما بأنفسكم
حتي يتغير ما حولكم


بعتذر
وبعترف اني ربما أكون متشائمة بعض الشئ
بس اللي متأكدة منه
ان البلد دي مش هينصلح حالها
الا لما الناس اللي فيها يتعدلوا

وبــس !

~
أيامكم حرية ان شاء الله

ودمتم
:)
~




علي هذا الجسر
تمنيت كثيراً ان تمطر السماء لتكون أبوابها مفتوحة فيُستجاب دعائي

~

فـ
هنا
رأيتك
وهنا
دعوت أن أكون معك
وهنا
تمنيت أن تظل معي
وهنا
عشقت حُبك وحنانك
وهنا
بكيت من قسوتك
وهنا
غضبت من سوء تصرفي
وهنا
تواعدنا
وهنا
كان خصامنا
وهنا
اتفقنا من جديد

~

فـ هـا أنا الآن
هنا ..
اتذكر كل ما بيننا
وانتظرك
أن تعود
وألا تفارقني مجدداً


....

التدوينة الآخيرة لحملة دوّن لصورة :)
( الصورة الموحدة)






انك تقرأ
مش معناها انك بتتسلي
مش معناها انك بني آدم فاضي ومش لاقي حاجة تعملها
مش يعني حابب تعمل فاهم وتقول اسامي كتب وكُتاب مجعلصين وخلاص

القراية
يعني روح

كل كتاب بتقراه
لاء مش كل كتاب
كل جملة بتقراها
وليها معني
دي روح بتسكن جواك
دي خبرها بتكتسبها
وحياة بتعيشها
ومكان بتزوره
وعمر بتقضيه بحاجة مفيدة

بحب اوي مقولة عباس العقاد
اللي بيقول فيها
لا أحب الكتب لأنني زاهد في الحياة .. ولكنني أحب الكتب لأن حياة واحدة لا تكفيني..
ومهما يأكل الإنسان فإنه لن يأكل بأكثر من معدة واحدة ،
ومهما يلبس فإنه لن يلبس على غير جسد واحد ،
ومهما ينتقل في البلاد فإنه لن يستطيع أن يحل في مكانين.
ولكنه بزاد الفكر والشعور و الخيال يستطيع أن يجمع الحيوات في عمر واحد،
ويستطيع أن يضاعف فكره وشعوره و خياله ، كما يتضاعف الشعور بالحب المتبادل , و تتضاعف الصورة بين مرآتين

فعلاً بحس كل حرف بيقوله فيها

انا بقي كنت ميتة لمدة كام شهر
معقول مكنتش بقرأ كتب !!

يمكن اللي كان مصبرني ومخليني عايشة
اني كنت بقرأ تدوينات اصحابي
كنت بقرأ مقتطفات من علي صفحات الفيس بوك

القراءة يعني حياة
مش تضييع وقت

للي مش بيحبو يقرأو
اقرأو حتي لو عناوين
جمل قصيرة

بس لو عينيكو جات علي حاجة جواها معني
عيشو فيها
دي فرصة كبيرة ادامك
انك تعيش اكتر من حياة
وتستمتع بكل حاجة حواليك أكتر من مرة
وتتعلم من غير ماتبذل مجهود

الخبرة ممكن تكتسبها من القراءة
مش شرط التعامل مع الناس والمواقف بس هي اللي بتكسبك خبرة

اصلاً بستغرب يعني
احنا ازاي ( أمة اقرأ ) وأغلبنا لا يقرأ
!!

اتمني اني ان شاء الله مبعدش عن القراءة تاني
وأعود ولادي علي القراءة
من قبل ماتيجو اهو بقولكم
هتقرأو من دلوقتي اذا كان عاجبكم بقي
:D

وشكراً لاصحابي الحلوين اللي بيشجعوني ع القراءة
سواء اصحابي زمان اللي دلوقتي مشغولين في الامتحانات او اختفو شوية
واصحابي دلوقتي اللي رجعوني لايام زمان فعلا
:)

~~~~~~~~~~~~

ملحوظــة نسيت اقولها امبارح
بوست امس واليوم وغداً
تبع حملة
دون لصورة




الله كبير
بقولها بابتسامة
وقلب كبير
ومهما كان
وبرغم ما هيكون
هابتسم
وارفع ايدي
وابص للسما
وهيكون جوايا
/ أكيد /
أمل كبير
:)






البوست دا رغم انه يعتبر حديث مع الذات
الا اني بطلب ان اللي يقرا يكون رايق لأن دا فيه دروس مستفادة
البوست دا من البوستات اللي في اعتقادي الشخصي لازم نقراه
حتي لو من باب تضييع الوقت
يمكن ربنا يجعلني رسالة من ربنا لأحدٍ ما لا اعلم مكانه او زمانه أو هويته
..............

برود !!
فعلا كنت فاكرة نفسي باردة
وفقدت الاحساس بالألم

كنت بكلم سها صاحبتي من كام يوم وللاسف انا بعترف اني مقصرة معاها بقالي كتير
ووانا في سلسلة اعتذاراتي لتقصيري معاها
وبتسألني اخبارك ايه ؟
قولتلها ولا حاجة انا بقيت باردة !
مبقتش ابكي ، مبقتش اصرخ ، مبقتش استنكر اللي بيحصلي / وكأنني نحسّت !

في نفس اليوم تقريبا وانا سهرانة بالليل بقلب بغباء غير معهود في قنوات التليفزيون
سمعت د.احمد عمارة في برنامج النهاردة مع دعاء عامر
بيتكلم عن الدعاء وعلاقته بالثقة بالله
شبهها بانك تكون محتاج فلوس ومديون وبتبيع اللي وراك واللي ادامك ويا اما هتتسجن
وكلمت ناس كتير محدش معبرك او محدش قادر يساعدك
وخلاص الليل جه
وبيفصلك كام ساعة عن النهار اللي هتكون فيه نهايتك كـ مفلس علني !
واذ فجأة تلاقي واحد صاحبك بيسأل عليك
فتطلب منه ينجدك
فيطمنك ويهديك ويقولك فوت عليا الصبح هتلاقي الفلوس اللي محتاجها وزيادة جاهزة ليك
ياتري لما تقفل التليفون معاه هتحس بايه !!

وسكت لحظات

جوا نفسي قولت ياااه أكيد هنام وانا مطمنة :))

كمل د.احمد عمارة وقال اكيد هتنام مطمن لأنك واثق في صاحبك وعارف انه مش هيخذلك وهيديلك الفلوس اللي انت محتاجها

ولله المثل الأعلي

ياتري ممكن نثق في البشر أكتر من ثقتنا في الله ؟!

طب اصلا يعني ليه بنرفع ايدينا وبندعي ربنا ولما بنزلها ناس مننا وانا كنت واحدة منهم بفضل قلقانة وخايفة !

.......

افتكرت كلامي
اني نحسّت من النكد والهم !
وصلحت كلامي واقتناعي فوراً
بعد ما تذكرت اني الفترة دي صلحت حاجات كتير بيني وبين ربنا !
ودايما كنت بقول يعني لما احزن واتعب وامرض من الحزن هيتغير حاجة من قدري ؟!
فـ الآخر اللي ربنا كاتبهولي هيكون


اكتشفت ان اللي انا فيه دا
مش اسمه برود وتنحيس

اسمه ثقة بالله ♥

الدروس المستفاد من الرغي دا

1_لما تدعي .. لازم تكون واثق ان ربنا هيحققلك مرادك
وهيستجيبلك

لأنه سبحانه وتعالي قال :
وقال ربكم ادعوني أستجب لكم

يعني الاجابة جاية جاية .. بس انت متستعجلش


2_ لو دعيت ومحستش براحة جواك .. يبقي في حاجة غلط وانت مش جواك الثقة الكافية في الله
أو ..
مش دا وقت اجابة دعائك
فـ لا تيأس / وأعد الدعاء مراراً وتكراراً

3_ افتكر دايماً
انك طول ما انت عايش
لازم .. تثق في الله / تحسن الظن بالله / متبطلش دعاء .
.......

آخيراً بقي

شكر خاص للآتي ذكرهم

* نيللي :
لأنها بعتتلي النهاردة " صدفةً " رابط يوتيوب فيه محاضرة لـ د.احمد عمارة بتتكلم عن اليقين في الدعاء وفكرتني بالحلقة اللي اتفرجت عليها وكنت بدور عليها ومش فاكرة اسم المحاضر
شكراً يانيللي
والرابط اهو لمن أراد الاستفادة ولمشاركة نيللي في الاجر :))
http://www.youtube.com/watch?v=ecpCENcLPSs&feature=share

* رنا :
في الفترة الأخيرة كنتي شعلة أمل ليا
بجانب كونك انتي ونيللي من اجمل الرسايل اللي ربنا بيبعتهالي وقت الضيق والرخاء

* نائلة :
رفيقتي في الألم المتشابه أحيانا وغالباً
شكراً لأنك نصحتيني بالمداومة علي الاستغفار اللي غير حياتي فعلاً
لأني بعد ما داومت علي الاستغفار ظنيت اني نحسّت وبعدين اكتشفت ان دي نعمة من ربنا عليا :)

* مها :
اللي بحب استمتع بشقاوتها ونظرتها للأمور بشكل برئ / بتحسسيني ان الدنيا بخير
برده شكراً

* شيرين :
اللي بنلحق بعض لما بنحزن ولما بنغلط / انا وهي بنراقب بعض وبندفع بعض للأمل دايماً

* سها :
ويكفي انك ياصديقتي مستحملاني الفترة دي كلها


.......

وشكراً لاتساع صدركم جميعاً :))))


لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات