Blog Archive

كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )




لما بتفرج علي صوري انا واخويا واحنا صغيرين
كنت بسأل ماما دايماً
احساسك ايه واحنا بنكبر ادام عنيكي
ازاي اصلا كنا بنكبر كدا وشكلنا بيتغير وانتي بتاخدي بالك كل يوم
ولا فجأة بتلاقي تغيرات
وكانت دايماً بتضحك
وتقولي مش هعرف اوصفلك كلام لانه لازم يتحس
لما تبقي ماما هتفهمي وهتعرفي

...........

لما كان عندي 11 سنة
عرفت ان ماما هتجيبلي اخ او اخت !
كنت وقتها يعتبر لسة طفلة
وكنت بدعي يكونلي اخت علشان العب معاها
علشان " محمد " ولد وانا مبحبش ومبعرفش ألعب مع الولاد
وفعلا مامتي جابتلي " سلمى " ..
كنت مبسوطة اوي
وبعاملها كأنها عروستي اللي بحب البسها واكلمها والعب معاها
وكنت باكل اكلها كمان
"اصلي كنت بحب طعم السيريلاك اوووي"
كنت بعملها كل حاجة
الا اني اغيرلها
" كنت بقررف اووي ومازلت :D "

وعقبال ما سلمى كبرت شوية
انا كمان كنت كبرت !
 
اكتشفت اني مش هلعب معاها
لاني بقيت كبيرة
3 اعدادي
شهادة ياناس
وثانوي
مرمطة
وبعدين جامعة
بقيت كبيرة اوي

لما اتعلمت سلمى الكلام
علمتها تقولي ياماما
وفضلت تقولي ماما كتير
وكنت بعاملها كـ أمها مش أختها !

عرفت أسباب حاجات كتير ماما كانت بتعملها معايا وكانت بتضايقني
بس ماما كانت صح !
وانتي كمان ياسلمى
بكرة تعملي مع عيالي زي مابعمل معاكي بالظبط

بس انا كنت مصحباها برده
كنت مقررة بيني وبين نفسي
اني لازم اكون لسلمى الطاقة الايجابية اللي في حياتها
لازم اقنعها بأن الشطار والمتفوقين مش احسن منها في شئ
وانها تقدر تعمل كل حاجة
ومفيش حاجة متقدرش عليها
ادخلي مسابقات
كوني رائدة الفصل متخافيش من المسئولية
قولي رأيك بصراحة
اشتركي في انشطة
بتحاولي ترسمي بس رسمك وحش؟
مفيش مشكلة ارسمي
بتكتبي قصص
جميل .. تعالي اعملك مدونة

اكتشفت اني بتعامل معاها كأني بتعامل مع بنتي
بالرغم من انها مبقتش تقولي ياماما
لأني بقيت اتكسف لما كنا نمشي فالشارع والاقيها تقول ياماما والناس تبص
وعودتها ترجع تقولي رحمة تانية
بس الاحساس جوايا
انها بنتي
حتة منى



النهاردة
لاقيتها مطلعة شوية صور ليها
ابتديت ابص عليها
وهي صغنتوتة خالص اوي
ولما كبرت شوية
ولما كبرت شوية كمان
لحد ما هي دلوقتي كدا ادامي
11 سنة
بنوتة بين الطفولة والمراهقة
بتتعامل زي الكبار

ياااه وانا بتفرج ع الصور
وبفتكر
سلمى
عقلة الصباع
اللي كنت بنيمها علي رجلي وعلي بطني وانا نايمة
هي دي سلمى؟؟!!
اللي خلاص شوية صغننين وتبقي طولي
" زي مابتقولي .. ناقصلي دماغ وابقي طولك ! "

افتكرت سؤالي لماما زمان
وسألته لنفسي؟
ايه احساسي
وازاي كنت باخد بالي منها وهي بتكبر كل شوية ادام عيني؟

هممممم 
برده معرفتش اجاوب
لأنه احساس يتحس
ميتقالش !

سلمى ..
كتكوتي الجميلة اللي بكرة تكبر
بحبك

ونفسي تكوني احلي بنوتة فالكون
واشطر بنوتة
وأذكى بنوتة

متزعليش مني لو قسيت عليكي
انا جوايا بيحبك اوي
لأني حسيت بالامومة معاكي بدري
ومعتقدش اني هاحب ولادي في المستقبل ان شاء الله زي مابحبك كدا
بس اللي متأكدة منه انك هتحبيهم
زي ما انا بحبك
وهتعامليهم زي ما انا بعاملك

متأكدة انك مش هتخيبي ظني فيكي في يوم
ويارب دايماً اشوفك متفوقة
وتبطلي عناد وعصبية
" احم .. عارفة انك ورثاهم مني .. بس حاولي تبطليهم برده :@ "

وبــس كدا
كفاية
علشان هعيط :D

....

ع الهامش
دي مدونة سلمي
ولما تفضي هتشتغل فيها أكتر
♥ كتكوتة بكرة تكبر ♥



8 CoMeNTaToOoOoZ:

rona ali يقول...

اول تعليق هيه هيه

ونبي يا ريمو تبقي وصيه عليا لحد ما اكبر انا يعنى مش كتكوته ممكن فرخه صغنوته بس لسه محتاجه اكبر ههههههههههههههه

مش تعيطى بقي انتى وصفتى احاسيس حلوة برضه ولو انى كان نفسي تردى علي السؤال دة لانه سؤال كل الاطفال تقريبآآ:):)

ربنا يخليلك اختك ويخليكى ليها يارب
تحياتى ليكى وليها :)

سواح في ملك اللــــــــــــــــــه- يقول...

ماشاء الله ربنا يحفظها

اسمها جميل

beautiful mind يقول...

ربنا يخليهالك يارب
وان شاء الله تكبر وتبقي عروسه
وتفرحي بيها

amiraali يقول...

ربنا يخليكوا لبعض يارب

Lobna Ahmed Nour يقول...

كأنك بتتكلمي عني أنا وإيثار
http://madenatalhob.blogspot.com/
لما جت كان عندي 11 سنة و7 شهور
هي بالنسبالي بنتي مش أختي
وهي صغيرة كانت عايزة تقولي ماما بس أنا اللي رفضت بردو :D
الفرق بس إنها بقت أطول مني دلوقتي :))

ربنا يخليلك سلمى ويفرحك بيها يا رب دايما

Unknown يقول...

ربنا يخليكم لبعض :)
و مايحرمكوش من الدفا و الحنية :)

رحاب صالح يقول...

يا مساء الورد
بجد استمتعت اوووي
يمكن لاني حاسة الاحساس ده وجربته مع اخواتي الاصغر مني
يمكن لان طريقتك بتعجبني
يمكن لاني مدخلتش مدونتك ببقالي فترة كبيرة
مش عارفة
بس اللي اعرفه اني استمتعت اووي
تحياتي

احمد عمرو يقول...

ممتز اوي الصفحة دي

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات