كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )





صباح الحرية ..
مساء نسائم الحرية ..

11-2-2011

تاريخ مميز ..

11-2-2011

يوم مميز ..

11-2-2011

أحداثه مميزة ..

اليوم اللي هيذكره التاريخ دومــاً
اليوم اللي هنفتخر لما نحكي لولادنا اننا عشنا فيه

اليوم اللي نجحت فيه اعظم ثورة شعبية في تاريخ البشرية
اليوم اللي تنحي فيه الظلم وأخذ جانباً بعيداً عن المظلومين
يوم رحــل مبارك ..

اليوم اللي تم الأخذ فيه بثأر كل مظلوم .. بثأر كل شهيد
اليوم اللي نام خـالد سعيد والسيد بلال وكل الشهدا مرتاحين في قبورهم
اليوم اللي زُهـق فيه البــاطل
اليوم اللي وضح فيه مين المنافق ومين المخلص
مين الوطني ومين الخسيس
!

افرحــوا يا أهــل الشهداء
افــرح يا كل مصــري
ارفعــوا راسكم لفــوق
فقد مضي عصر مبــارك

اللي جاي احنا اللي مسئولين عنه

http://www.redcodevb.com/smiles/smiles/40/www.hh50.com-Photos-Images-Lines-2843.gif

امبارح قبل ما انام فكرت في الرساله اللي كتبتها علي لسان خـالد سعيد بعد وفاته
- دوس هنـآ -
وقتها كانت نفسيتي فوق المتدمرة

وقتها كتبت:

 حقك هيتاخد
من قتل يقتل ولو بعد حين
ودمك مش رخيص
وهتاخد بتارك
هتلاقي اللى ياخد بتارك اكيد ياخالد
دا كلام ربنا .. العدل يا خــالد 

واتخيلته انهاردة !
ياتري ايه احساسه !


مش قولتلك يا خــالد
هيتاخد بتارك
هيرجع حقك

دلوقتي والدتك واهل السيد بلال وغيركو هيرتاحو

انت اللي كنت شرارة الثورة زي بو عزيزي في تونس
انت اللي حركت مشاعر الملايين بموتك
انت يا خــالد !
http://www.redcodevb.com/smiles/smiles/40/www.hh50.com-Photos-Images-Lines-2843.gif

النهاردة صحيت .. حسيت براحة قلب أم خالد
وراحة عيلة السيد بلال كلهم
وكل مظلوم

النهاردة صحيت .. عاوزة اذاكر وانفع بلدي
عاوزة ابوس ايد ابويا وامي واقعد تحت رجليهم
عاوزة اعلم اختي ازاى تحب بلدها
عاوزة أحب خطيبي واراعي ربنا فيه أكتر
عاوزة اتعلم ازاى اربي عيالي في المستقبل ع اللي ينفعهم وينفع بلدهم
ازاى اخلي كل اللي حواليا يحبو مصر بجد !
ازاى يراعوها بجد !
أنا فخــورة اني عشت لـ يوم زي دا
ومكســوفة اني مشاركتش فيه بوجودي
بس شاركت فيه بقلبي ووجداني !
" أضعف الايمــان !"

http://www.redcodevb.com/smiles/smiles/40/www.hh50.com-Photos-Images-Lines-2843.gif
آخيــراً
للشعوب الأبية ..
تعيشوو في انتصــار وحب للوطن

ولزعماء العرب الظالمين ..
تعيشــو في ثورات وهزائم
ويحيــا الوطـــــــن








حد فاكر الشيزوفرانيا اللي اتكلمت عليها فـ البوست اللي فات !

اهي سنة 2011 تحديداً عندها شيزوفرانيا جامدة جداً

سنة بدأت من أول ساعة فيها بنكد كبيررررر

" انفجار كنيسة القديسين "

سنة بدأت بفتنة كان ممكن تحصل بين مسلمين ومسيحين ..

بس اللي حصل العكس تماماَ

وزاد التقارب اللي بين قطبي الأمة !

وفي نفس الشهر ..

كانت ثورة 25 يناير

الثورة اللي كانت غريبة جداً ..

ثورة متحدد معادها ومكانها من قبلها بأسبوع

وهنا اختلفت الاراء ..

مابين التريقة --> ايه الشباب الفاضية دي ومفاضلش الا بتوع الفيس بوك كمان اللي يعملو ثورة !

ومابين التشجيع والثقة الكبيرة في ان هيحصل حاجة من خلال الشباب دي

ومابين الحياد ..
سيبو اللي يثور يثور .. يمكن يعملو اللي احنا مقدرناش نعمله !

وقد كان ..
وحصل اللي محدش يتخيله ..

ثورة شعبية شبابية كبيرة
رعب النظام واقالته وعمل حكومة جديدة
وقطع النت والموبايلات
وحالة شيزوفرانيا تانية مابين الناس دي مصريين بجد ولا قلة مندسة بأجندات خارجية !

ومن أهم الحاجات اللي حصلت في الفترة اللي فاتت
ان المصري رجعتله كرامته

اعتقد ان المصري هايعيش بعد كدا مرفوع الراس
بعد ما الكرامة كانت متهانة في كل حتة
مابين دكاترة مجلودين في السعودية
ومعدومين في ليبيا
ومعتقلين في الكويت

المصري اللي عاش 30 سنة من عمره ميعرفش عن الكرامة الا كلام في اغاني
" لو سألتك انت مصري تقولي ايه ؟
قولي مصري وطالع عين ابويا وامي في العيشة دي ! "

المصري اللي عايش دايماً في العسل " الاسود " ..
بيحب مصر .. لكن من سوادها اتغم نفسه

المصري اللي كره بلده وطفش منها لبلد تانية بيتهان فيها بس ع الاقل بياخد فلوس
ماهو بيتهان في بلده " وبرده بيجوع "

المهــم نرجع تاني " ولامؤاخذة الحماسة خدتني شوية "

احنا لسة في تاني اسبوع من تاني شهر في 2
وكل يوم بيحصل حدث جديد
فخر جديد لمصر وابناء مصر
اللي شاركو واللي مشاركوش

فخر خلي الشباب والبنات اللي قعدو في بيوتهم يقولوا
" احنا فخورين اننا من جيل الفيس بوك "
فخر خلي الابهات والامهات يقولوا
" شباب زي الورد عملوا اللي مقدرناش نعمله "

سنة 2011 دخلت التاريخ من أوسع الابواب
سنة دسمة جداً
افراحها اكتر من احزانها

علي اد الحزن اللي عم البلاد بعد تفجير كنيسة القديسين
علي اد الفرحة اللي جمعت الكل لما شوفنا الهلال جنب الصليب

وعلي اد الحزن اللي عم البلاد من تخريب بلطجية " النظام " المندسين في وسط " المظاهرات "
علي اد الفرحة اللي خلت الكل ايد واحدة
اللي خلتنا ننام واحنا مطمنين عشان في ناس بتحرسنا في الشوارع
مش مهم مين كان مخاصم مين !
بس الكل كان ايد واحدة

المسيحي كان بيحرس المسلم وهو بيصلي
والمسلم كان مخلي باله من المسيحي وهو بيصلي

سنة جميلة علي اد صعوبتها
وهي دي الشيزوفرانيا !

علي اد ماكان عندي شيزوفرانيا من اسبوع بس
ومين اللي صح ومين اللي غلط ؟
مكنتش عارفة !

دلوقتي ..
بعتذر لو كنت شكيت في اي " محترم " حط روحه في كفه ونزل دافع عن بلده !

ويارب يعدي السنة دي علي خير
وتمر صعوبتها بأفراح !

تمسكـــوا يا شباب التحرير
فـ إن مع العسر يسرا

http://a3.sphotos.ak.fbcdn.net/hphotos-ak-snc4/163398_121202694616059_100001789867694_122268_4464105_n.jpg



الواحد مش عارف يبدأ منين ويقول ايه ؟!
بجد كلنا بقينا عايشين في حالة ترقب وخوف ودعاء مستمر ان ربنا يستر ويحافظ علي مصرنا الغالية

مصر الغالية اللي مكناش بنحس بقيمتها الا لما المنتخب يلعب في ماتش كورة !

مصر الحرة اللي ياما اتبهدل اهلها ذل ومهانة !

مصر دلوقتي اللي بتمر بحالة شيزوفرانيا كبيرة أوووووي أد الدنيا دي

مصر دلوقتي بتبكي وبتنزف

مصر دلوقتي مش عارفة تروح يمين ولا شمال

مصر دلوقتي مش عارفة تصدق قنوات اخبار مصر ولا قنوات البي بي سي والعربية والجزيرة !

مصر دلوقتي مش عارفة اللي حصل فيها دا ثورة ولا تدريب ع ايد يهود !

مصر دلوقتي نفسها تفهم !

وبما اني بنت مصر
ومصر هي أمي ونيلها جوة دمي
بقول تعبت
جالي شيزوفرانيا زي امي " مصر يعني "

لما بتفرج ع القنوات المصرية بلاقيهم في وادي والقنوات التانية في وادي تاني
مش غريبة عليهم
ماطول عمرهم كدا مغالطين للحقيقة !
الجديد انهم حاليا بيطلعو القنوات الاخري عملاء
ومصرين ع ان شباب 25 او بمعني اصح الشباب اللي لسة موجودة ف التحرير لحد دلوقتي عملاء يهود !!

الاغرب بقي ..
ان معظمنا مصدق ..
لدرجة اني دلوقتي كل ما ادخل صفحة ع الفيس بوك بتنقل اخبار ميدان التحرير حاليا ادمنها بيتشتم وبيتوصف " باليهودي العميل / بكلب اسرائيل "

طب اصدق مين انا ؟
انا عندي ميول نفسية عاطفية نحو الشيزوفرانيا
مبقتش فاهمة والنعمة
مين اليهودي ومين المصري
مين الصح ومين الغلط
مين بيحب مصر ومين عاوز خرابها



 http://a6.sphotos.ak.fbcdn.net/hphotos-ak-ash1/hs786.ash1/167660_126569837412678_100001789867694_146770_4447519_n.jpg



مفيش عندي الا الدعاااااااء
يارب احمي مصر
يارب انصرها يارب
يارب ابعد الشر عن ابنائها " الشرفاء "
يارب امحي عدوها "سواء كان منها او بعيد عنها "

ارجووووكووو
عاوزة مصر تشفي من الشيزوفراااانيااا

عاوزة اعرف راسي من رجليـــــــــا

عاوزة احس باستقراااار تاني
وانام وانا مرتاحة
مش حاسة بدوشة في دماغي
مش خايفة من اي حاجة ولا علي اي حاجة !

يارب استجيب يارب مننا واحمي مصرنا


--- كلامي دا مجرد فضفضة كنوع من الشيزوفرانيا اللي مسكت فيا ومش عاوزة تسيبني ---

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات