كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )


http://imaginationconversion.files.wordpress.com/2008/03/revolution.jpg


مبدأياً كدا .. مبروك ولو انها متأخرة لتونس وأهل تونس
والله يرحم الشاب المنتحر اللي انتحاره كان نواة ثورة وتحرير من الظلم وربنا يكملها عليهم بالستر

بس مش معني كدا اننا نقلد وخلاص وكل يوم يكون في بالاربع والخمس حالات انتحار يعني ؟
عيب أوي كدا ..
ربنا ادالنا عقل نفكر بيه

هو مش كل شهرين تلاتة نسمع عن واحد انتحر بسبب الظروف المهببة بطين !
حد بيتحرك منه شعرة ؟
اخرنا بنقول ربنا يرحمه ويغفرله وبنرجع ننام تاني يعني عادي وبناكل عادي وبنشرب عادي وبنعمل بيبيه عادي برده !

هي مش الحكومة بتموت العشرات والميات كل فترة من الفترات
اخرهم خالد سعيد والسيد بلال وماخفي كان اعظم ؟
عملنا ثورات ؟
اخرنا ندمع دمعتين ع كام وقفة صامتة وخلاص!

الثورة هتقوم بإرادة كاملة لشعب كامل ..
مش تقليد أعمي لأحداث خارجية .. لجو تاني غير جو مصر !

الثورة هتقوم بتفكير سليم وعاقل ، بخطوات محسوبة .
مش نموت نفسنا ونستسلم ويبقي خسرنا دنيا واخرة !

الاعلام الهايف بتاعنا المفروض يعمل توعية شاملة
بس اعلامنا المحترم بيولع الدنيا
اعلامنا المحترم دلدول للحكومة ..
اعلامنا دا لذوذ وطيوب آخر حاجة !

حاجة تانية بئة
الناس المعارضين للي هيحصل " والله اعلم " يوم 25 يناير .
بتعارضو ليه؟
انتو مالكو !
من كان يؤمن بالله واليوم الآخر فليقل خير او ليصمت
--> حديث شريف .

مش هتعملو حاجة يبقي تخرصو
سيبو اللي يعمل يعمل ..
سيبو الناس تحاول
وخلينا احنا " وانا معاكو " نتفرج
ولو حصل ثورة بجد
نبقي نهيص في الهيصة ونثور احنا كمان <_<

لكن بلاش احباطات وحياة ابوكو
تفائلوا خيرا اللهي يخليكو
وبلاش انتحارات بالله عليكو
الجو برد آه .. بس البنزين غالي
مش عاوزين نار
احنا بنحب البرد من غير حريقة وولعة
الله يهديكو ..
ويهدينا ..
ويهدي الحكومة " طويلة العمر اللهي يتقصف عمرها بدري "

وسلام بئة ..
هروح اشتري لترين بنزين ينفعو وقت الزنقة <_<

الا انا سمعت ان البنزين هيغلي !

 

11 CoMeNTaToOoOoZ:

MR.PRESIDENT يقول...

هع هيع هوع هع هع هع
يابوي أنا أشتري سولار أرخص وبالمرة مش بيولع بسرعة زي النزين ، وحتة لو مستعملتوش أهوا أشتري لمبة بجاز وتنفع بدل الكشاف أبو بطارية .

وعايز اقول كلمة .. وأبصم بصوابعي العشرة عليها إن كلمك فله وزي القشطة ورغم عدم إيماني بحدوث جلل ها هنا ، إلا أنني هيص مع الهيصة لو هاصت .

المشكلة إنك متقدرش تغير من شعب مش عايز يتغير .. ومرعوب من بكره خايف إنه يكون أسوء راضي بالذل والخنوع والخوف والإستبداد والحق المهضوم بالرشوة والمحسوبية .

معنا الله

شمس النهار يقول...

انا لا عايزة مارينة

ولا فاضية يوم 25

:))


ان الله لايغير مابقوما حتي يغيروا مابأنفسهم

لازم احنا الاول نتغير علشان نعرف احنا عايزين ايه

شعب تونس لما واحد حرق نفسه ثاروا

احنا واحد شنق نفسه والتاني مات من الضرب ماعملناش حاجه
احنا شعب خلاص زي عادل امام ماقال متعواااااادة دااايما

sal يقول...

بعد كلام الريس
مش لاقى حاجة اقولها

واحد من الناس يقول...

عندك حق

واحد من الناس يقول...

عندك حق

واحد من الناس يقول...

عندك حق

بنـوتــــة يقول...

بصي أنا معاكي في النص الأولاني جداااااااا لإن أنا نفسي قرفانة أوي من اللي بيحصل ده و موضة البغبغانات
و ده سبب معارضتي لموضوع 25 يناير
لإن برضه الفكرة فجأة ظهرت بعد تونس
يعني يتوافر فيها عوامل التقليد العبقري زيها زي التواليع اللي كل شوية نسمعلنا واحد منها
فأنا معترضة جداً على الانتحارات الغبية دي و لو اترحمت على بو عزيزي مش مقتنعة إن اللي عملوها في مصر زيه أياً كانت الأسباب
و برضه ضد 25 يناير
لإن كل مظاهرة بينزلوا لو مشيوا كويسين مبيمنعوش أي مندس من بتوع الأمن إنه يدخل وسطهم و يقوم ماسكله طوبة و للا خشبه و ينزل تكسير في اللي أدامه
عايزين تقنعوني إنكم نازلين تصلحوا
يبقى تمنعوا الإفساد اللي في وسطكوا الأول
لكن متحلمش بقصر عالي
و انت مش راضي أو مش قادر تنضف أرضك اللي هتبني عليها
اختلاف الرأي لا يفسد للود قضية
بس حبيت أقولك إني موافقاكي
بس برضه معترضة عليهم

سندباد يقول...

احسنتي فعلا
كلام منطقي مش لازم اللي يحصل عند غيرنا ينفع معانا ومش لازم نقلد وخلاص ومش لازم نفقد ايمانا بربنا عشان حاكم ظالم
وربنا سبحانه وتعالي عنده العفو والرحمة

100TOPBLOG يقول...

برجاء اعادة وضع الاسكربت الخاص بينا الى مدونتكم الكريمة يا اعقل مجنونة
100TOPBLOG
والا سيتم حذف مدونتكم من قوائمنا

Podoomda يقول...

http://100topblog.blogspot.com/

sony2000 يقول...

بصي
احنا ناس سلبين ذي ماقال الشيخ الشعراوي الله يرحموا
فمته]الي مافيش حاجه هتتغير ولا مليون سنه
بس لسا عندي امل ان بكرا احسن

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات