كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )


من غير مقدمــات ..
اسمعوا .. أو اقرأوا القصيدة دي .. لـ هشام الجخ 

ومحدش يستغرب اني بنت وعاجبني الكلام دا جداً

-----------------------------------------------

" غيرت الفيديو للكلام من غير موسيقي - ولا تزعلوا - ^_^ "


لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير ♥
واللي قالولك غيرة الراجل
قِلّة ثقة او قلة فَهم
خَلْق حمير

غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها
يبقى يا غُلْبها

اصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخلّيها مداس للناس؟؟
ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل

كل الفرق ما بيني وبينك اني صعيدي
ينعل ابو ده اليوم الاكحل
اللي لا ليه اخر ولا اول
اللي طلعت لقيتني صعيدي

لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟
هو انا كلب ؟؟

ثم العبرة ماهيش في اللبس
اصل المشكلة عَندك .. عٍندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت

ماشي صداقة وماشي زمالة
بس ماجَتْش على الرجالة
ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير

اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير

-----------------------------------------------

ع الهــامش بقي ^_^
وأنا بموت في غيرتك دي ♥

14 CoMeNTaToOoOoZ:

eng_semsem يقول...

اولا خلفية المزيكا معرفتش اسمع منها كلمات الشاعر ولا صوته بس على فاكره انا سمعتها قبل كده الغيره بتيجي مع الحب وملهاش علاقه بالثقه وانا راجل بغير حتى على امي وطبعا اخواتي البنات فما بالك بحبيبة قلبي
تقبلي تحياتي

أنا - الريس يقول...

وأنا كمان بغير .

هشام الجخ فلته .

تكرمي

بس انا سمعتها قبل كدا من غير موسيقي أو تقدري تقول موسيقي هادية

غير معرف يقول...

هشام الجخ ده رائع
ايوه بخير جميلة جدا
و قصيدة جحا اكثر من رائعة

تخاريف مترجــِــمة يقول...

جميلة جدااااااااااااااااا جداااااااااااا


وطبعا طبعا طبعا كمان مره هو عنده حق

:) :) :)


تسلمي يا قمر

صيدلانيه طالعه نازله يقول...

الراجل ده مالوش حل
اما بيقول قصايده بياخدنى لدنيا تانى
ميرسى على اختياراتك الجميله

مراهق استثنائي - زيكو يقول...

لم يعجبني نهائيا

يمكن لأن الكلام غير مفهوم كثير لي

او أيضا لانها ليست لهجتي الأصلية

تحياتي

و بالتوفيق

^_____^

ZAKARIA

مذكرات موززه عانس يقول...

تحفه طبعا وليه فكرانا هانستغرب من انها عجبتك طبعا الرجل اللى مش بيغير ده مش رجل اصلا مع احترامى لكل الرجاله

شخابيط يقول...

انا كمان عاااااجبني جداا كلاماته وطريقه الالقاء بس معترضه بس علي الشتايم
حمير وكلب بس بصراحه خلتني ابتسم :)

شمس النهار يقول...

هو الرجل اللي مايغرش علي حبيبته ومراته يبقا راجل

سوري يعني يبقي مش....

ده من فضل الايمان الغيرة علي الاهل والدين والوطن

كل سنه وانتي طيبه

سندباد يقول...
أزال المؤلف هذا التعليق.
سندباد يقول...

انا صعيدي
وبغض النظر عن الصعيدي او غيره الغيرة في الراجل اشد من غيرة النساء زي ما الحب عند النساء اقوي من حب الراجل
احسنتي الاختيار
تقديري واحترامي

MaNoO يقول...

هشام رائع بجد عموما ودى من ضمن الحاجات الجميله الكتير اللى بيعملها
اه بالمناسبه دى
بدعيكى لبدايه العام الجديد فى مدونتى كما ادعو كل اصدقائى المدونين اتشرف بزيارتك طبعا

همزة يقول...

sooo very nice

قلمي دليلي.. يقول...

السلام عليكم

كلمات رائعه وبراقه..

يسعدني عزيزتي القاء نظره ع مدونتي..

وجعلها ضمن مدوناتك المتابعه لها..

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات