كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )

http://www.90at.com/uploads/90at12857030751.jpg


خليك أستك ..
لا تزعل ولا تتشنك
وان مرة جالك الهم
نفضله واتنك

~_~

عيش كــوول
وابتسم علي طــول
فكها بئة ياعم
دا الفرح أكيد ع وصــول




http://www.90at.com/uploads/90at12857032561.jpg

http://www.90at.com/uploads/90at12851696651.jpg


طب اكتب ايه ؟

دا انا بقالي فترة عازلة نفسي عن هم الاخبار وبرامج التوك شو

مش سلبية والله !!

بس خلاص جالي ضغط من الزعل <_<

ماصدقت الصداع خف .. والضغط اتظبط

ارجع انهاردة اشوف خبر يخليني اجيب الجديد والقديم !

ايه اللي احنا فيه دا ؟

هي مصر بقت خربانة كدا ليه من كل ناحية

لا الناس بقت ناس طبيعية ولا الحاجة الحلوة اللي كانو بيقولو انها في المصريين بقت موجودة !

امبارح واللي حصل بين جماهير الاهلي والزمالك
" دووس "

هي الرياضة بقت بالضرب والشتيمة والتكسير والهبل والعته المغولي دا ؟

هو دا الصح يامصريين يامتحضريين !

لاء .. اسفة <_<

مانا لازم اقول للبهايم اللي عملو كدا ياهمج

لكل همجي بيشتم عشان فريقه
وبيضرب ويكسر ويبهدل

جاتكو ستين نيلة <_<

والله البلد دي ماهتتقدم طول مانتو فيهـــا

اللي استوقفني ف الخبر الجملة دي

وفى أمر غير مفهوم.. لم يشهد موقع الحادث أى تواجد أمنى لفض الاشتباك على الرغم من وجود "سيارة نجدة " تستقر فى مدخل الشارع وسيارة بوكس فى أحد الشوارع الجانبية.

ماهو فعلا مش بعيد الحكومة هي اللي مدبرة كل دا " كالعادة " عشان تلهي الهُبل " اللي هو احنا " عن اللي بيحصل فـ البلد !
بالذات ان فـ نفس ذات الوقت كان في مظاهرات ضد التوريث في وسط البلد !
" دوس كمان هنا"


والحكومة تلطش ف المتظاهرين هنا ..
والجماهير المتخلفة بيضربو ف بعض ومفيش أمن هنا ..!!
والبلد تتقلب والدماغ تتوجع فنخلينا ف اللي احنا فيه ف اخر <_<

محبوكة ياولاد اللذينة :@

بس دا ميمنعش ان في مشجعيين متعصبين لدرجة انهم عاوزين الحرق والرجم بالجزم في خرابة مليانة فيران وياحبذا لو كانت فيران متوحشة من أكلي لحوم البشر<_<

برده جاتهم ستين نيلة <_<

---------------------------------

زمــــــــان كنت بقول مصر فـ الضياع !

دلوقتي اقول مصر ضاعت خلاص !


هافقد الامل ..؟ .. انا اللي بقول ان دايما في أمل ؟

أسفة .. مانا مش هاقول البرادعي هو الحل
" مش واثقة فيه ومش شايفاله اي فعل "

ومش هاقول المحروس ننوس عين مامته جيمي هو الحل ! <_<
ومش هاقول الاخوان هما الحل ..
لاني برده مشفتش منهم حاجة ف الهبل اللي احنا فيه دا <_<

لكن هاقول الحل ف كتاب ربنا

" إن الله لا يغير مابقوم حتي يغيروا ما بأنفسهم "

افهموها دي أوي
---------------------------------

مكنتش عاوزة اتكلم عن موضوع كاميليا شحاتة

بس بما اني اتكلمت عن الخراب والضياع اللي مصر فيه

يبقي نتكلم <_<

ومش هاتكلم برده عن قضيتها الشخصية ..

لاني من كتر الاخبار المتضاربة ف الموضوع دا كرهته <_<

بس هاقول الفتنة موجودة ومش هاننكرها

انا بشوف صفحات ع الفيس تشيب <_<

صفحات المسيحيين بيشتمو المسلمين
والمسلمين بيكفروا المسيحين :O

انا مش هاقول كلام رسمي واقولكو ان ليا اصحاب مسيحيين كتير والكلام بتاع البرامج دا

لالالا

انا قولت قبل كدا ان مليش الا 2 اصحاب ومكتفية بيهم والحمدلله

بس هاقول اصحابي كتير ع النت " فيس ومدونين "

بعزهم وبحبهم


مسألتش مين فيهم مسلم ومين مسيحي !

مقولتش مسيحي يبقي مش هاقراله حاجة ومش هاعلق عليه ولا علي كومنتاته >_<

مقولتش هامسحه من ع الفيس

عارفين ليه ؟

مش عشان انا ملاك بجناحين وطوق !

بس عشان انا ماشية بقول الرسول عليه الصلاة والسلام
واللي ذكر فـ القرآن الكريم
عندما قال للكافرين ..

" لكم دينكم ولي دين "

فمــا بالكم بـ أهل الكتــاب الاقباط ..!!

اللي فـ دينهم برده

" الله محبــة "

وبرده فـ ديننـا ..

" الدين المعاملة "

بالمناسبة ..

المصريين كلهم أقباط

لان قبطي اصلا يعني مصري !

المسلمين مش محتليين لمصر .. بل بالعكس معظم المسلمين فـ الاصل كانوا مسيحين وجدودهم أسلموا " بكــامل ارادتهم " !

نستنتج من دا كله .. ان كلنا لينا نفس الاصل
الاصل المصري أولا وأخيرا 


فياريت نحترم نفسنا ونرجع لاصلنا
نرجع لطينتنا ودمنا
نرجع تاني نحب بعضنا
نرجع تاني ايد فـ ايد ..
مسلم ولا مسيحي وايه الجديد !
المهم نكون من جوانا صافيين
مش للكره والحقد الدفين شايلين
نقولها بـ أعلي صوت
أنـــا مصري
" مسلم ولا مسيحي "
أنــــا مصري !

---------------------------------

آآهـ .. جالي صداع اهو الله يسامحكو <_<
http://www.90at.com/uploads/90at12851707321.jpg

http://www.gamesmuseum.uwaterloo.ca/VirtualExhibits/electronic/console/TV%20Set.jpg
قليلا بل نادرا ..
لما بهاجر أوضتي " سريري وكتبي وكمبيوتريايا :D "
وانفرد بالريموت لاشاهد التلفاز !

وفي كل مرة بشوفه فيها .. بحس ببوادر تخولوف عقلي " زي ماقال الاديب الكبير اللمبي ! "

زمــان في بداية التدوين كتبت " في بيتنا كباريه "

واليوم أكتب ..
أنا والاعلانات وشللك

-----------------------------

حقيقي شئ سو أوفر يامان " او ياوومن حسب نظامكو " ..
انك تشوف اعلانات تسد النفس وتجيب المرارة

هتقولولي طيب وبتكملي فرجة عليها ليه ؟.

هاقولكم .. لان بيجيلي شلل مؤقت مبقدرش احرك فيه ايديا علي الزرار عشان يغير القناة
-----------------------------

امبارح مش فاكرة كنت بتفرج ع ايه " اعذروني الزهايمر وفقدان الذاكرة المؤقت " ..
واذ فجأة يجي فاصل ..
خير اللهم اجعله خير الاقي اعلان فيه راجلين بيعرضو عن منتج مــا
ومــا ليه ؟
ما اقول انه موبايل :D

كانو بيعلنوا عن موبايل

موبايل كحيان <_<

بس طريقة الاعلان نفسه مستفزة

خدو مثلا ..

* موبايلنا انهاردة ياجماعة فيه مميزات خطيرة جدا جدا جدا
فيه بلوتووووووووووووث
" ملامح الدهشة علي وش التاني اللي معاه .. وملامح الفجأة ع وشه :O "

وكمان فيييه شبــــكة

لا وايـــــــه ممكن يتحطله نغمات صوتية .. والمفاجأة المفاجأة .. انه بينووووووور !!!

ممكن تحط فيه خط
 
طب اقولكو مفاجأة تانية !

ممكن تحطو خطييييييييييين !!! :O

وبيرقص كمان هههه اقصد ممكن تعمله فيربريشن

لا والمفاجأة الكبري انه من صنع شركتنـــــــــــــا ^_^


عــــــــا يامراااااااارتي !!
-----------------------------

مرة أخري من المرات ...
اعلان شيبسي ديلايتس " السوداني "

السوداني مش هيتمرمط تاني <_<

ف الاول عجبني الاعلان ..

ولما دوقت السوداني

ععععععععععععععع
-----------------------------

الاعلان اللي حبيته أوي أوي

اعلان اتصالات .. قالوا الناس مجانين ..

الاغنية عجبتني <_<

بس لما عرفت الفلوس اللي اتدفعت فيه
كرهته أد ماحبيته

عــــــااااااااا

26 مليون جنيه يامفتريين

عشان الموف والطيارة والجناحات والبدلة الشيك بتاعة عز والبنطلون الفحلقي بتاع منير !!!

حسبي الله <_<
-----------------------------

اعلانــــات تانية كتير .. هتكلم عنهم كلهم أكيد

مانا فاضية بئة " بس مش أوي :D "

بس آخر حــاجة  ..

اعلان بيريل !!

استرجل واشرب بيريل

:@

علامة تعجب مندمجة مع سمايل طالع من ودانه دخان !:@

هي دي الرجولة ؟

السؤال .. هما مقتنعين بجد ان دي الرجولة ؟

طب الشباب اللي بتاخد افكارهم الهباب دي تعمل ايه ؟

طيب البيرة دي مثلا بتخلي الواحد راجل ازاى ؟


بـ عااااااااااا اللي بيقولوها ف الاخر زي اسد الغابة الي دخل ف رجله شوكة ؟

ممممممممممم

سؤال فكرو فيه لحد البوست اللي جاي لانه هايتكلم عن شوية صفات ذكورية ارعة .. !

هسألكو يعني ايه راجل .. وايه الفرق اللي بينه وبين الذكر !
-----------------------------

وارجوووووكوووو ..
بلاش تغلطو غلطتي وتتفرجو علي اعلانات تاني :D:D

** ع الهــامش ..

** البوست اللي فات قصة قصيرة .. عشان محدش يفتكر اني بحكي حكايتي الشخصية لا قدر الله <_<
** وارجوكم كل اللي مش فهمها يقراها تاني بتأني ^_^
ويركز فـ آخر سطرين فيهــا ^^,
وآخــر كلامي ســلآم


http://www.90at.com/uploads/90at12847214171.jpg


إسمــي حيــاة ..

أخبرني أبي أن أمي من أختارت لي هذا الاسم وطلبت منه أن يسرع في تسجيلي ..

ضمتني إليها بشدة وقالت له :

" سميها حيــاة .. لأنها بداية حياة جديدة لأسرتنا الجميلة "

فقد عاشوا يحلمون بهذا اليوم طويلاً
..
أسرع أبي في تسجيلي وعندما عــاد إليها وإليّ وأنا رضيعة .. وجدهــا ميتــة ..!!

عندمــا حكــي أبي لي هذا ..

ارتبطت الحياة عندي بالموت ..!!

---------------------

عشت يتيمة الأم ..
ولكن عوضني الله بصديقة مخلصة ..
في بداية الصف الثاني الثانوي أحبت شاباً ..
وتمت خطبتهــا إليه ..
وفي يوم الخطبة .. توفيت !

فكــانت الصدمة ...!

وتكررت عندي الفكرة ..

ارتبــاط الحيــاة بالموت .!
---------------------

ســاعدني أبــي علي الخروج من هذه الحــالة ..
أعانني علي استذكار دروسي ..
أخبرني أن أمنيته أن ألتحق بالجامعة ..
وعدني أن يوصني إلي باب الجامعة في أول يوم دراسة ..
ونجحت في الثانوية العامة ..
وعندما أيقظته أول يوم دراسة كي يوفي بوعده ..
وجدتـــه ميتــاً ..

فبداية حيــاة أخري لي ..
ومرحلة جديدة في حياتي ..

ارتبطت أيــضــاً بالموت
---------------------

لـذا قررت أن أحيــا ميتة ..
أن أنسي الحيــاة ..
ألا أبدأ أي حياة جديدة ..!


عرفت بعض اصدقاء السوء ..
استخدمتهم في حياتي الميتة هذه ..

سنوات تمر ... وأنا أحيــا ميتة ، وأموت حيــة ..!!

واليــوم ..
اكتشفت أني تائهة !
لا أنا ميتة .. ولا أنا حية ..
---------------------


قررت التوقف ..
قررت أن أعيد صلتي بالله واستغفره واخبره اني راضية بما قدره لي ..
اليوم قررت ..
أن أبدأ حيــاة جديدة مع الله ..
اليوم قررت ..
الندم عمــا فــات وبناء كل ماهو جيد في ما آت ..

قضيت يومي في الصلاة والبكاء ..
أمسكت بالمصحف وقرأت فيه كثيراً ..
---------------------

اليوم ..
بدأت حياة نقية

رغم يتمي ..
إلا إني أملك ربــاً عظيمــاً ..
---------------------

قضيت نهاري وليلي هذا اليوم
بين يدي ربي ..

وانتهــت حيــاتي هذا اليوم ..
ايضاً بين يدي ربــي ..!
---------------------

ارتبطت حياتي الجديدة بالموت أيضاً ..!!

ولكني اليوم راضية عن هذا الارتباط المؤلم !

اليوم أستطيع رؤية أبي وأمي وصديقتي ..

اليوم أستطيع أن ارضي عن ذاتي لأني عدت إلي الله ..!!

اليوم علمت ..
أن مهما طالت الحيــاة أو قصرت .. فـ دائماً وأبداً ترتبط بالموت .. وعلينا الرضا والاستعداد حتي يأتي دورنا في هذا الارتباط الابدي
 ---------------------


تمت
6-9-2010


أنا مش فارس ولا فتى أحلام

أنا زحمة .. وربكة .. وشغل جنان
 
نصي بيضحك والتاني زعلان
 
أنا شيخ فلتان
 
طيب .. شرير .. وجريء .. وجبان
 
أوقات مشرق وأوقات بهتان
 
وساعات سلم وساعات تعبان
 
مفتري جدا وكمان غلبان
 
شبابيك وبيبان

توهة عنوان

أنا م الأخر

عفريت لابس بدلة انسان
 
 
 

http://thawra.alwehda.gov.sy/images/NEWS3%5CM08%5CD07%5C8-4.jpg

للسرقة ألوان وفنون 
والحرامي موهوب بطبعه

  • فـي الاتوبيس ممكن تتسرق ويتنشل محفظتك ومتحسش الا وانت بتدفع الاجرة :D


  • وانتي ماشية ف الشارع ممكن حد يجي يلطش شنطتك ويجري

والناس تتفرج عليكي وتمصمص ف شفايفها وبس !

ولان الحرامي حرامي!
ولان السرقة ممكن تكون مهنة وممكن تكون هواية

فـ العادي ان الحرامي يواكب التطور التكنولوجي الموجود حاليا !

فمثلا اذ ربما نلاقي حرامية الافكار المنتشريين في جميع شوارع وحارات وأزقة الانترنت الحبيب

ع الفيس توك.. وع المدونات .. وع المنتديات ..وعلي اي حاجة بئة

هواية ان حد يشوف اي حاجة تعجبه ياخدها ويكتبها باسمه ولا كأنه عمل حاجة !

الغريب انهم بيصدقو انهم موهوبين وان الكلام دا كلامهم 

ويردو علي الناس اللي بتشكرهم علي مواهبهم الفذة دي بتواضع شديد قائلين 
" دا أقل ماعندي "

سـارة درويش بنوتة لاسعة اتكلمت عن الموضوع دا قبل كدا
وعملت بيدج ع الفيس بوك اسمه امسك حرامي!

وعلي صفحتها كانت بتمسك فـ حرامية كتير:D

انا اتعرضت لسرقة كتير .. قبل ما اعمل المدونة

ودلوقتي لو شوفت موضوع واحد منقول ف اي مكان تاني ممكن اعض اللي اخدها :D

الحرامية دول بئة كدابين متأصلين برده

لانهم بيحاولو ع اد مايقدرو يقنعو اللي ادامهم انهم اصحاب الموهبة الفذة دي !

وفي حرامية انفوهات " جمع انفو"

من كام يوم لاقيت واحدة واخدة الانفو بتاعتي بالنص

بعتلها رساله .. وطبعا ولا عبرتني :D :D

في حرامية تانيين وكدابين متأصليين بيلعبو بالانفو

  • يعني مثلا واحد معاه ابتدائية .. يكتب انه معاه ماجستير فـ كيفية استغلال الموارد الانترنتية


  • وواحد كان فـ مدرسة كولامبور الصين الشعبية ..

يكتب انه من مدرسة امريكانا للتعليم الاروبي

  • وواحد خريج معهد لاسلكي .. يكتب انه خريج هندسة اتصالات


وهكذا وهكذا

:D

وفـ الاول والآخر ..

للسرقة فنون ^_^

فـ ارحمونا بئة ياحرامية ياتييييييييت 
مليتو البلد

الحرامي ف الحاجات الهايفة دي بكرة يكون حرامي ف حاجات كبيرة

اللي معندهوش امانة ف حاجات صغيرة كدا بكرة يخون امانات كبيرة ومهمة

مش هتتعبو ف حاجة لما تكتبو المصدر 

بلاش.. اكتبو منقول لو متعرفوش المصدر

بلاش تعيشو الدور دا

عشان منظركو بيبقي وحش اوي

انا واحدة من الناس لما بشوف اي حاجة بتعجبني من ناس اول مرة اقرالهم حاجة ومش عارفة اسلوبهم

بعمل سيرش علي اللي بيكتبوه

وبينزلو من نظري جامد لما اعرف انهم ناقلينه ويقولو انهم اللي كاتبينه !

وعلي فكرة

اللي بيعمل كدا بيكون عنده عقدة نقص رهيبة
حاسس انه ناقصه حاجة كبيرة ..
فبيحاول يعوضها ف انه يقول انه يملك موهبة زي الكتابة او التأليف
عشان الناس تهتم بيه وتشكر فيه

هاقولكم مرة كمان " والكلام للحرامية بس "

اتلمو .. جاتكو ستين نيلة




 عيد سعيد عليكم كلكوو

رمضان خلص ومشي بالسلامة

والعيد جاي بفرحته وببهجته

رمضان السنة دي تقريبا أحلي رمضان عدا عليا في خلال 21 سنة وشوية عايشاهم !

احلي رمضان راضية فيه عن نفسي أوي !

وأحلي سنة تقريبا بعد فلترتي لكل الناس اللي بيجيبوني ورا :D

وبالتالي حاسة بصفاء ونقاء حلو أوي :D

المهم في حاجة اكيد عارفينها كلنا لازم نتكلم فيها عشان ندعي بدعاء معين الفترة اللي جاية دي !

احنا تعبنا في رمضان

صمنا .. وصلينا بخشوع .. وقمنا الليل .. ودعينا كتير .. و ..  و .. و ..!!

كل دا مش عاوزينه يضيع بعد رمضان ..عاوزين نستمر عليه

فياريت ندعي سوا .. اللهم ثبتنا بعد رمضان ..!!

اكيد عارفين كمان ان ثباتنا بعد رمضان معناه قبول ربنا منا اعمالنا اثناء رمضان !!

علشان كدا لازم ندعي ونحاول نثبت 

ان شاء الله ربنا يتقبل مننا كل اعمالنا الخيرة ويبعد عننا اي شر ..

بحبكـــو في الله ..♥♥♥

كل سنة وأنتم طيبين

واسيبكم مع اغنية العيد فرحة :D



رمضان قرب يخلص ..

هيوحشني أوي ..

مش عارفة ربنا هيطول ف عمري لرمضان القادم ولا لاء !

بس هادعي .. اللهم بلغني رمضان القادم

--------------------------

ليلة امبارح كنت حاسة انها ليلة القدر

مش عارفة ليه

ولما النهار طلع وشكل السما كانت منورة اوي من الساعة 6 !

والساعة 7 بقي نور وشمس رهيبة ولما ابص للسما عيني توجعني من كتر النور

حسيت انها فعلا ممكن تكون ليلة القدر

يارب تكون ليلة القدر بجد !

وبرده اللهم بلغني ليلة القدر لو مكنتش هي دي !
--------------------------

مسلسلات رمضان ..

كتيرة اوي اوي

اول اسبوع قولت مش هتابع الا عايزة اتجوز .. لانها للمدونة غادة عبد العال

وقولت هتابع معاها كمان كليوباترا لاني اثرية قديمة زي مانتو عارفين :D :D

بس كليوباترا معجبنيش علي الاطلاق للمغالطات الكتيرة الموجودة سواء ف اللبس ولا الصور ولا المناظر !!

تاني اسبوع ابتديت ااتفرج علي شيخ العرب همام .. لانه بيكون شغال علي الفطار وماما وبابا واخويا بيتفرجو عليه !

عجبني جدا ..

اذكر اني مبحبش اتابع حاجة ليحيي الفخراني .. ولما بتفرج علي مسلسلاته حلقتين ورا بعض بلاقيها حلوة جدا :)

مشهد موت الشيخ سلام خلاني ابكي

كنت حاسة فيه بطيبة وقرب من الله غريبة .. يارب اكون نص كدا :)

تالت اسبوع .. زودت علي الشوية دول مسلسل برة الدنيا بتاع شريف منير

عجبني ..

وحيرني دور حسام المهدي " احمد زاهر " .. طيب ولا شرير ولا واطي ولا ايه بالظبط !!

وبنته زي العسل " ليلي أحمد زاهر " بجد ربنا يوعدني ببنوتة شقية وجميلة زيها كدا

أخيرا بئة ودا المهم

في رابع اسبوع ابتديت اشوف العااااااار

بجد لاقيته تحففففففففة جدااااااااااا

مصطفي شعبان عامل دور يجنن بجد

شخصية الراجل اللي عامل نفسه متدين ادام الناس لكن من جواه واطي واطي واطي

والغريبة انه مقتنع انه صح مليون ف المية وان البني آدم خطاء لكن الايمان ف القلب :D :D

" شوفتي فين الشخصية دي قبل كدا يابنت ياريمو :D "

شدني لمتابعته اني سمعت وانا متدبسة في المواعين :D

والتليفزيون شغال .. انه هيتاجر ف غشاء البكارة الصيني

وبعدها بحلقتين باين اللي هو امبارح او اول

اتفرجت وشوفته وهو هيتجوز علي مراته واحدة مركبة نفس ذات الغشاء دا !!

وياسبحان الله .. حامل كمان !!

شوفو ..

يمهل ولا يهمل

ومحدش يفتكر انه بعملة عملها هباب هيفلت !

كلــنــا كدا مننا لله ..

فانحترم نفسنا أحسن

ومن يتق الله يجعل له مخرجــا

:)
--------------------------

أخر حاجة بئة

مش عارفة حاسة ليه انكو بتوحشوني اوي ^_^

وعاوزة اقولكو خبر جديد عن سموي حفظني الله

بعد ما قولت باي باي للتعليم بأكمله و17 سنة من عمري ضاعو في التعليم المصري !

ولان ربنا بعتلي صاحبة انتيمة زي سها صاحبتي صاحبة مدونة الشط التاني من نفسي ..

ولان ربنا مديني أم حنينة زي أمي ..

قررت بعد خوف ورعب وعلي غفلة ..

اني اكمل واعمل دراسات عليا في كليتي المصونة " اثار "

فــادعولي

لاني غير الموضوع دا محتاجة الدعوات جدا

ومش لازم كل شوية اقولكو ادعولي

ادعولي منكو لنفسكو بئة بعد كدا

دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ ، عِنْد رأْسِهِ ملَكٌ مُوكَّلٌ كلَّمَا دعا لأَخِيهِ بخيرٍ قَال المَلَكُ المُوكَّلُ بِهِ : آمِينَ ، ولَكَ بمِثْلٍ

هــا .. مين هيخلي الملائكة تقوله ولك مثله !

يالا كفاية رغي ..

والكلمتين والسلام زادو شوية

بس يالا

اهو كلام والسلام

^_^

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات