Blog Archive

كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )




امبارح قولت احتمال ابعد شوية عن المدونة عشان مش متظبطة وماليش نفس اوساسا اكتب ايتها حاجة

لكن بقدرة قادر كدا اشوف خبر يطلع من نافوخي

الحظ اني شوفته وانا صايمة ..

وعشان احافظ علي صيامي ..
قولت :

اني صائم اني صائم 

واستغفرت وسكتت

واستنيت لبعد الفطار بئة عشان ابعبعلي بالكلمتين اللي في واقفين في الحنجرة 

*********************

بيقولك ياسيدي محافظ القليوبية .. سي عدلي حسين ..

ان ازمــات الكهرباء والمياة والأسعار تضاعف من ثواب الصائم !!

شوفتوا يابني ادمين يا جاحدين

الحكومة قلبها عليكو ازاى؟

بتضحي بنفسها عشان تدخلكو الجنة

ياوحشين

يا وحشين

ياللي مش عاوزين ثوابكو يتتضاعف

شوفو الراجل بيقول ايه كمان !

يعتبر ازمات المياه بأنها إنذار إلهي للمصريين يستوجب ترشيد الاستهلاك في ظل خلافات دول حوض النيل، والتي تسعى للانتقاص من حصة مصر التي تكفي بالكاد

شوفتو الراجل التقي

جابها وهي طايرة !

اتعلمو الترشيد جاتكو الارف

علي اساس انكو اساسا مش بترشدو منكو لنفسكو

فاتوة الكهربا بتيجي شئ وشويات .. مع اننا بنرشد !

بنتسرق وبنتنهب .. ونقول معلش المهم اننا بنرشد

الغاز والكهربا بيتصدرو للي ميتسموش

ونقول معلش .. خليها علينا

احنا ضحايا اتفاقيات السلام !

المية تقطع .. نقول دا انذار الهي !

امتي هايخدوا مننا الهوا عشان نقول اننا سفهاء ومش بنرشد الشم والتنفس !!!!!!!!

ياشعب نمرووووووود
اسمعو كلام اولي الامر ..
اللي خايفين عليكو وعاوزين مصلحتكو

شوفو كمان الراجل الغلبان بيتحايل عليكو ازاى وبيطلب من المواطنين أن  .. ..
 
 يعذروا الحكومة، ويعطوها فرصة حتى العام المقبل لمواجهة هذه المشكلات الطارئة

عارفين اسلوب فوت علينا بكرة ؟ ..

لاء دول بيقولو فوتو علينا السنة الجاية نكون عرفنا نشوفلكو مصيبة تانية نلهيكو فيها جاتكو ستين مصيبة

ادعي عليهم بايه وفيهم كل العبر

حرامية .. مرتشيين .. نصابين .. ولاد تيت ..

حسبي الله ونعم الوكيل

بما اننا في رمضان دعواتنا مستجابة ..
وجهو دعاكم
ان ربنا يرحمنا من اللي احنا شايفينه دا
ويصبرنا
وياخدهم من وشنا بئــــــــــة

خدوا دي وقولو اميييييييييين



--------------------------------

عشان منساش ..

حلقة رحلة للسعادة أهي 

.. دووس ..

وتفريغها اهي

.. دووس ..

وآخــر كلامي ســلام ^_^

الحلقة 13 .. دوووس ..

---------------------------

واعتذر عن تقديم الملخص ابتداءا من اليوم 

حيث اني اكتشفت ان تفريغ الحلقات موجود كامل " بكل حرف يقوله الاستاذ عمرو خالد في الحلقات " علي موقعه

هنــا .. دووس ..

كمــا اني أمر ببعض الظروف التي سوف تمنعني عن الانتظام في كتابة الملخصات

ارجــو الدعــاء لي دائمــاً

واتمني أن القاكم في تدوينة من كتابتي الخاصة قريبا .. 

لاني افتقدت كثيرا الكتابة وخصوصا الساخرة :)

رمــضــان كريم ^_^


الحلقة 12 .. لا للذل _ اوعي تهين نفسك

.. دووووس ..

------------------------------------

أحيانا في ناس كتير بتتنقل نقلة غريبة وسريعة بين التعاسة والسعادة
ياتري ايه اسباب النقلة الغريبة دي ؟

السعادة زي الايمــان

الايمان يزيد وينقص
والسعادة كمان تزيد وتنقص :)

لكن اكيد في اسباب بتخليني اتحول فجأة من سعيد لـ غير سعيد !

والحلقة النهاردة هتتكلم عن السبب اللي بيخلي الانسان يتحول من سعيد لتعيس !

------------------------------------

في البداية في سؤال ..

انت بتحب نفسك ؟

مش معني حب نفسك انك اناني ومش بتحب الاخريين
لكن في معني تاني ..
انك بتعز نفسك .. انها غالية عليك وبتقدرها اوي

.. لو نفسك غالية عليك ومقدرها .. مش هتفكر تهينها ..!!

وهو دا موضوع حلقة النهاردة !

أوعي تهيـــــــن نفسك !

أوعي تذل نفسك !


------------------------------------

في احصائية عن اكثر كلمة يستخدمها الناس في التليفونات
طلعت كلمة " انــا " !
لان دي طبيعة النفس البشرية
طبيعة النفس البشرية إنه يحب يحس بنفسه معزز .. مكرم

 إوعى تهين نفسك ادام الناس وإوعى تهين نفسك ادام نفسك
 إوعى وإهانة النفس إوعى تذلها إوعى تهينها..

اول مابتهين نفسك .. ادام نفسك او ادام اي بني ادم
هتلاقي نفسك وكأن روحك اتسحبت
اسانسير السعادة هبط هبوط مفاجئ !

------------------------------------

ربنا لما خلص الانسان
خلق فيه 3 غرائز


- الاكل والشرب
- الجنس
- الاعتزاز بالنفس

الاتنين الاولين معروفين !
لكن ايه غريزة الاعتزاز بالنفس دي ؟

يعني الانسان بيحب انجازاته .. يكون مكرم .. معتز وفخور بنفسه !

الغريزتين الاولين .. هدفهم معروف
وهو استمرار بقاء الانسان !

لكن هدف غريزة الاعتزاز بالنفس دي ..
عشان ربنا بيحبنا
عشان الارض متنحرفش !
ماهو جزء من الناس خايفة علي صورتها ..
حريصين علي تجميل انفسهم .. وتحسين انفسهم باستمرار

تخيل لو الغريزة دي مش موجودة
كمية الفساد اللي هايحصل ف الارض وبمنتهي البجاحة !

فالغريزة دي ربنا حطها فينا عشان يخلي الارض اكثر رحمة للناس ببعضها
وكل واحد يخاف علي صورته .

اول لحظة اهانة النفس ..
امام الناس او امام نفسك
فجأة .. تسقط من عين نفسك !

عرفتوا سبب تغيير المود من السعادة لمنتهي الضيق والتعاسة فجأة ايه ؟

عملت حاجة .. اهنت نفسك ! .. حد أهانك !
سقطت من نظر نفسك في حاجة !!

------------------------------------

بعض الدول لما تكون بتشتري حاجة من المحل وواحد سرق حاجة
وهو طالع من المحل ومادفعش تمنها
وهو على باب المحل بيحصل إيه؟
في جهاز محطوط بيعمل زمارة..
حرامي حرامي حرامي إجري إمسك
 تصدق ربنا مركب جواك حاجة زي كدة
 أول ما تهين و تذل نفسك..
حاجة إسمها الضمير .. ربنا مركبها جواك
تبدأ تزمر .. تعرق ويحمر وشك وعنيك تزيغ وتهبط وتقع
 
------------------------------------

مدمن المخدرات بيهين نفسه !

شارب الخمر بيهين نفسه !

ولذلك ياشباب اوعو تصدقو الاعلان اللي بيقولك اشرب ** واسترجل !

لانه كدا بيهينك !
وبيخليك تهين نفسك !
" طبعا قصده ع الاعلان المقرف بتاع بيريل <_< "

------------------------------------

عاوز تعيش سعيد ..
اوعي تهين وتذل نفسك
حافظ علي نفسك
درب نفسك علي انك مش هتيهينها
وقبل ماتاخد اي خطوة فكر كدا هاهين نفسي ؟

اوعي تفتكر ان بالكلام دا بيقولك خليك مثالي
كلنا بشر .. وكلنا بنغلط
بس لو سمحت ..
او اهنت نفسك في موضوع معين قبل كدا بلاش تهين نفسك بيه تاني !!

مش معقول واحد بينزل من بيته كل يوم بيلاقي حفرة
وكل يوم بيقع فيها !!

------------------------------------

احنا في زمن صعب
الناس دلوقتي هانت عليهم نفسهم


** اه هاخد رشوة .. هعاكس بنات .. هاعمل كذا وكذا !!

ربنا بيقول :
ولقد كرمنا بني آدم ..!!

لما ربنا غرز جواه الاعتزاز بالنفس !

احنا دلوقتي بقينا في زمن اصبح فيه اهانة النفس حاجة عادية
ودا بقي من اسباب شقاء الانسان وتعاسته
واصبح في مجاهرة
يقول النبي "ص"

كل امتي معافي الا المجاهرون

المجاهرون بالمعاصي .. مالهمش معافاه
لا في الدنيا ولا في الاخرة
في الاخرة نار .. والدنيا تعاسة وشقاء وضلال !
" مش جدعنة يعني انك صايع او انكِ تعرفي شباب كتير !
مش شجاعة انك بتعمل حاجات غلط .. مش رجولة انك ... ! "

متهينش نفسك
واستر نفسك !
واوعي تجاهر !!!

------------------------------------

ربنا سبحانه وتعالي خلق الكون ..
وانت " يا بني آدم " .. ثمرة الكون !
 كرمنا بني آدم ..

انت مش ثمرة الكون !
ربنا خلق الكون واختصر الكون فيك !!
زي ما اختصر القرآن في الفاتحة .. اختصر الكون فيك !!
وَالتِّينِ وَالزَّيْتُونِ(1) وَطُورِ سِينِينَ(2) وَهَذَا البَلَدِ الأَمِينِ(3) لَقَدْ خَلَقْنَا الإِنْسَانَ فِي أَحْسَنِ تَقْوِيمٍ(4) ثُمَّ رَدَدْنَاهُ أَسْفَلَ سَافِلِينَ (5)

ربنا خلقك من انقي عنصرين في الوجود !
طين ومــاء !

ليه تهين نفسك !
بعد ما ربنا خلقك في احسن تقويم
ليه ترد نفسك لاسفل السافلين ؟؟
وتفقد سعادتك وتخسر !!

------------------------------------

شوف النبي مثلا عمره ما اهان حد
ما ضرب رسول الله إمرأةً ولا خادماً ولا طفلاً قط

وكمان نهي عن الضرب علي الوش
لان الوش رمز الاحترام والتقدير

------------------------------------

عاقب اللي يغلط لكن متوصلش لدرجة الاهانة !

اوعي تهين الناس وتتبع عوراتهم !
من تتبع عورات الناس تتبع الله عورته ولو بعد حين

اوعي تدور ازاى تفضح الناس
هايهينك ربنا ويفضحك في بيتك !!

------------------------------------

اوعي تذل نفسك للناس عشان فلوس
عشان منصب ..
زي ما قولت اوعي تهين نفسك عشان ذنب ومعصية
تسرق .. تشرب خمر !

اوعي تهين نفسك بانك تذل نفسك !

شوف حديث النبي !
 من تضعضع لغني لغناه فقد ذهب ثلث دينه !

وربنا بيقول علي الفقراء المعتزين بأنفسهم :
يحسبهم الجاهل اغنياء من التعفف

فاوعي تكون فقير .. وبتهين نفسك ..!!

------------------------------------

من اسماء الله الحسني
اسم العزيز
الذي يأبي الذل لعباده

وشوف النبي "ص" بيقول ايه ؟
اطلبوا الحاجات بعزة أنفس فإن الأمور تجري بالمقادير

يعني اطلب بأدب وبأخلاق وبذوق .. بدون قلة ادب !
اطلبوا بعزة نفس مش بذل او باهانة النفس !

سيدنا علي بن ابي طالب يقول
 والله والله لكنس الجزيرة بريشتين ونقل جبلين ثقيلين أهون عندي من ذل نفس للئيم

------------------------------------

اعمل ايه عشان اعيد لنفسي عزتها وكرامتها !

1_ تدريب نفسك لمدة 21 يوم علي عزة النفس !
وقف الحاجات اللي بتهين نفسك

2_ التوبة ..!!

تخيلوا منتهي السعادة بعد كدا !!
ومن يهن الله فما له من مكرم !

انوي من النهاردة مفيش رشوة .. مفيش معاكسة .. مفيش خيانة !!

3_ استر الناس عشان ربنا يسترك !!

4_ اوعي تجاهر لو انت علي خطأ

------------------------------------

خلصت الحلقة
وخلصت المجموعة الثالثة " نفس نقية من موانع السعادة "
وبكرة بداية مجموعة جديدة
ويارب يتقبل مننا جميعا يارب ونقدر نوصل للسعادة في رحلة السعادة :)

عملتو الاستقصاء وجاوبتو عليه ؟

عموما الاستقصاء هنا
.. دوووس ..
وآخــر سلامــي ختـــام ^_^

الحلقة الـ 11 .. لا للكراهية _ اختلف برحمة !

.. دووووس ..

قولنا لا للغضب

لا للقلق

والنهاردة هنقول

لا للكراهية !

--------------------------------

الاحتكاك بين الناس احيانا يسبب بين الناس ضغائن وكراهية وحقد وحسد وغل !

سبب دا .. اختلاف البشر عن بعض

ربنا لما خلق البشر اصلا والكون خلقه مختلف ومتنوع !

الدنيا كلها قايمة علي التنوع والاختلاف

الحياة اصلا قائمة علي الاختلاف

ربنا زي ماقولت خلقنا كدا

دي سنة من سنن الكون

لذا بنقول

** اختلف برحمة .. لا للكراهية **

--------------------------------

ازاى اختلف برحمة ؟؟

تيجو نختلف ونفضل حبايب ؟؟
خمس قواعد من النبي "ص":

1_ بص للاختلاف علي انه ميزة مش عيب !

غير طريقة تفكيرك بس لكدا !!

تخيل لو كل الناس شبهك .. نفس طبعك وصوتك .. بيلبسوا زي لبسك بالظبط !

تخيل ايه اللي هايحصلك ؟؟

هتتجنن !

لان الاختلاف نعمة كبيرة ربنا خلقنا بيها !

* جاء النبي "ص" اثنان من الصحابة كانوا في سفر
وكانوا عاوزين يصلوا ملقوش مية فاتيمموا
وقبل العصر لقوا مية
فاختلفوا بين امرين
اعادة الصلاة .. او عدم اعادتها !
انتهي الامر بان واحد صلي مرتين
والاخر صلي مرة واحدة فقط " عندما تيمم "

فسألوا الرسول "ص" عن هذا الامر
فقال الرسول للشخص الاول الذي صلي مرتين :
أخذت الاجر مرتين !
وقال للثاني " الذي صلي مرة واحدة " :
اصبت السنة !

يبقي مين فيهم اللي صح ؟
الاثنين صح !!
بس شوف حكمة النبي في التعامل مع الاختلاف !!

*************

2_ اوزن الناس بحسناتها وسيئاتها

ممكن كل ما حد يضايقك او يختلف معك تعمله ميزان
كفة فيها سيئاته والحاجات الوحشة اللى عملها معاك
والكفة الاخري فيها حسناته واعماله الخيرة  والكويسة معاك ؟؟

* ابو العاص بن الربيع ..
النبي قال عليه ايه ؟
ماذممناه صهراً !
هو حارب النبي وكان من الكفار
لكن في الكفة التانية كان صهر ممتاز !

* حيث الافك للسيدة عائشة وحسان بن ثابت !

كان حسان بن ثابت من الناس اللى اتكلموا في عرض السيدة عائشة
ولكنه كان صحابي !
بعد وفاة النبي كان ماشي في الطريق فيلتقي بعروة بن الزبير ابن أخت السيدة عائشة ومعه كانت السيدة عائشة
فهم ليتعارك معه
فتقول له السيدة عائشة :
لا ياعروة دعه .. ذاك الرجل فعل ذلك
ولكنه كان يدافع عن رسول الله "ص"

وزنته بحسناته وسيئاته !
** يقول النبي "ص"
لا يكره مؤمن مؤمنة .. اذا بغض منها خلقاَ رضي منها آخر !

اتعامل مع زوجتك من منطلق هذا الحديث :)

*************

3_ ابحث عن منطقة مشتركة بينك وبين الشخص الآخر !

ابحث عن الاشياء المشتركة بينك وبين الاشخاص المختلف معهم
.. رياضة .. كورة .. موضة .. تسوق ..

** في عز الصراع بين النبي "ص" مع قريش يقول :
والله لو دعتني قريش لحلف الفضول لأجبت
" حلف قريش عملته ينصر فيه المظلوم "

** كان دليل النبي في الهجرة .. عبد الله بن اريقط ..
وكان شخصا كافرا غير مسلم !
لكن في شئ ومنطقة مشتركة بينهم فالنبي وثق فيه واستأمنه علي حياته

--> للناس اللي بتقول انها لا تستأمن غير المسلمين علي اموالها وتجارتها .. الخ !!

*************

4_ لا تحطم الاخر ان اختلفت معه !

انجح وسيب الناس تنجح
اختلف لكن لا تحرص علي الغاء الاخر !

في ناس بتقول :
من ليس معي فهو ضدي
وفي اسوء من كدا !
يقول من ليس معي فهو ضد الله !

يعني بيستخدم الدين ويلغي  الاخر بهذا المبدأ
يقول النبي "ص"

إن مثلي ومثل الأنبياء من قبلي .. كمثل رجل بنى بيتا
  إلا موضع لبنة .. فأنا موضع اللبنة ، وأنا خاتم النبيين.

يعني لم يلغي من سبقه من الانبياء ولكنه قال انه مكملهم ومتممهم !

في ناس بتقول أنا .. واي حاجة تانية تتلغي !

*************

5_ لا تهين .. لا تجرح .. لا تشتم !

سهيل بن عمرو كان رجل خطيب وقبل اسلامه كان يخطب ويشتم المسلمين
وأُسر في غزو بدر
فقال سيدنا عمرو بن الخطاب للرسول "ص" :
دعني اخلع له ثنيتي سهيل بن عمرو حتي اذا خطب ضحك الناس !
فرد عليه الرسول صلي الله عليهم وسلم :
لا ياعمر .. لعله يقف موقف تحمده عليه

وتلف الايام ويسلم سهيل بن عمرو ويقولهم :
يا اهل مكة كنتم اخر من اسلم فلا تكونوا اول ما ارتدوا .. فاثبتوا !

فثبتهم جميعا علي الاسلام

فبكي عمر رضي الله عنه .. تذكر النبي وكلامه !

* لو كان النبي "ص" اهان قريش .. لا يمكن كان خالد بن الوليد او عمرو بن العاص دخلوا الاسلام
لان ابائهم كانو غير مسلمين
النبي حاربهم لكن لم يهينهم !

* كن كالنسر .. اذا هاجمته الغربان وحلق لاعلي
ان شتموك حلق لاعلي اكتر .. كن نسر واترك الغربان تحت !

* في ناس بتقول احنا بنشتم وبنهين عشان بندافع عن الحق
الامام مالك يقول :
إذا رأيت الرجل يدافع عن الحق فيشتم ويسب ويغضب فاعلم أنه معلول النية لأن الحق لا يحتاج إلى هذا

فالحق سبحانه يقول :
وجادلهم بالتي هي أحسن

--------------------------------

أختلف برحمة
بالخمس قواعد !


^^^^^^^

انتهت الحلقة !

وبجد اتعلمت منها كتيررررر كالعادة دائما من هذا البرنامج الرائع :)


السلام عليكم ورحمة الله وبركاته 


الحلقة الـ 10 .. 


************************

أعتذر لكم لعدم قدرتي لعمل ملخص وتفريغ الحلقة

دعــواتكم .. وان شاء الله هاكمل معكم غدا 

************************

بالمناسبة 

في استقصاء في موقع عمرو خالد 

بيشوفك هتاخد درجة كام في السعادة !

الاستقصــاء هنــا .. دووووس ..

جاوبوا علي الاسئلة وأخبروني لنتشارك في النتيجة :)




الحلقة 9 بعنوان لا للقلق

.. دوووس هنــا ..

المجموعة الثالثة
** نفس نقية من معوقات وموانع السعادة **

رمزنا لها باللون الاحمر .. رمز الخطر ..

ايه هي موانع السعادة

القلق .. الكراهية .. الحقد والحسد .. الغضب

المجموعــة دي كل مهمتنــا فيها

لااااااا

لا للقلق .. لا للغضب .. لا للحقد والحسد .. لا للكراهية

***************************

الحلقة الاولي في المجموعى الثالثة باسم
** لا للقلق **

عايز تبقي سعيد ..
ابعد عن القلق ..
الخوف علي المستقبل
هايحصلي ايه بكرة !
خايف من البطالة !
مش هلاقي اكل !
وهكذا !!

القلق مرض العصــر ..!!

العبادات نوعين ..

عبادات جوارح : تنتهي بمجرد الانتهاء منها وثوابها كذلك .
عبادات القلوب : ممتدة الاثر .. تنام وهى تعمل .
***************************

تيجي ندخل طريق الاطمئنان ولا للقلق !

في عبادة اول ماتعملها تلاقيك مطمن وابتسامتك تظهر !

لكن العبادة دي اندثرت .. اصبحت نادرة !

معدش حد الا القليل اللي مازال يعبد الله بالعبادة دي !

لو عبدت ربنا بالعبادة دي هيتحول الطريق من القلق الي السعادة!

العبادة دي اسمها

** حسن الظن بالله **

انت ظنك بربنا ايه ؟
هيكرمك .. هيسامحك .. هيعفو عنك .. هيسترك !!
هايحصل !!
ولا العكس ؟؟
هايحصل برده ؟
***************************

يقول الله تعالي في حديثه القدسي :

انا عند ظن عبدي بي فليظن عبدي بي ما يشاء

الحديث دا علاج للقلق

تخيل ربنا بيقولك اعبدني بيها
احسن الظن بي
وانا هابعد عنك القلق وهاطمنك !

لو عبدت ربنا بحسن الظن انت كدا عرفت ربنا فعلا !

احسن الظن بالله
ربنا العزيز الرحيم الكريم
ربنا اللي الخير كله بيديه والشر ليس اليه !

ربنا هينجحني .. هايسترني
هايشغلني .. هيرزقني زوج صالح
ربنا مش هايسيبني .. هايكرمني
***************************

القلق اللي احنا فيه دا وراه الشيطان
عاوز يتعسك في الدنيا
لانه بيكرهك
بيكره ابوك " سيدنا آدم "
لانه رفض يسجد
وعاوزك تدخل النار ويعيشك تعيس

اسمع الاحاديث دي
* انا عند ظن عبدي بي فليظن عبدي بي ما شاء

* ان من حسن عبادة المرء حسن ظنه بالله

* عن جابر رضي الله عنه قال
سمعت الرسول صلى الله عليه وسلم قبل موته بثلاثة أيام يقول :
 لايموتن أحدكم إلا وهو يحسن الظن بالله

تيجو نعبد ربنا بالعبادة دي
تيجو نحسن الظن بالله !
***************************

القلق والخوف ع المستقبل بيعمل جروح في القلب
والمرهم اللي بيزيل الجروح دي
حسن الظن بالله

كلمة الظن في اللغة العربية ليها معنيين :

اليقين .. والشك !!
يقول الله تعالي :

قال الذين يظنّون أنهم ملاقوا الله كم فئة قليلة غلبت فئة كثيرة بإذن الله والله مع الصابرين

هنا معناها اليقين !
ويقول ايضا الله تعالي :

وَتَظُنُّونَ بِاللَّهِ الظُّنُونَا

بمعني الشك !

ازاى كلمة واحدة لها معنيين عكسيين

لانها زي اللي بيحصل في قلبك بالظبط !

لو ظنيت بالله ظن حسن
يبقي معناها اليقين
ولو العكس يبقي الشك !

انت بئة مين فيهم ؟؟
***************************

حسن الظن بالله عاوز خطوة

ظني انه هايستجيب دعائي --> يبقي أدعي الاول !
ظني انه هايقبل توبتي --> يبقي اتوب الاول !
ظني انه هيوفقني في عملي --> يبقي أعمل الاول !

وهكــذا !!
***************************

عقل الانسان بتجيله 60 الف خاطرة
مابين خواطر ايجابية وسلبية
ياتري ايه اللي هايغلب عليك !
الخواطر الايجابية ولا الخواطر السلبية !

حسن الظن بالله تقضي علي الخواطر والمخاوف السلبية

عقلك دا عامل زي حديقة
يا اما تزرعه ورد يا اما تزرعه مبيدات حشرية !!

ياترى راسك فيها ايه ؟ ورد وزهور ولا مبيدات حشرية ؟!
***************************

حدد بئة من النهاردة انت أي نوع ؟

1_ حسن الظن بالله ..:
يقول تعالي :
 وعلى الثلاثة الذين خلفوا حتى إذا ضاقت عليهم الأرض بما رحبت وضاقت عليهم أنفسهم وظنوا أن لاملجأ من الله إلا إليه ثم تاب عليهم ليتوبوا

2_ شاكك ..:
‏يظنون بالله غير الحق

3_ سئ الظن ..:

ظنك سئ بالله !
النوع الاسوء والاسوء
ولا يحيق الظن السيء الا بأهله

***************************

قصص عن حسن الظن بالله
 عن ابى بكر قال :
قلت للنبى صلى الله علية وسلم ، وانا فى الغار :
لو ان احدهم نظر تحت قدمية لأبصرنا .!
 فقال : " ما ظنك يا ابا بكر باثنين الله ثالثهما "

---------------------------

لما خرج رسول الله "ص" من مكة مهاجرا إلى المدينة
جعلت قريش مكافأة مئة ناقة لمن رده عليهم .
فاقبل سراقة على فرسة يريد الامساك بالنبى وابو بكر
فقال ابو بكر يارسول الله سيدركنا فقال النبى دون ان يلتفت
"اللهم اكفينيهم بما شئت وكيف شئت انك عما تشاء قدير"
فسقط من فرسة  .!

---------------------------

ابو الدرداء
وهو خارج من بيته قال دعاء الخروج من البيت
" بسم الله توكلت علي الله ولا حول ولا قوة الا بالله "
قال رسول الله "ص":
 من قال إذا خرج من بيته:
 بسم الله توكلت على الله، لا حول ولا قوة إلا بالله
 تقول له الملائكة: كفيت، ووقيت، وتنحى عنك الشيطان !

 خرج من بيته وراح السوق وقابله واحد قاله :
ادرك بيتك انه يحترق
قال له : ما احترق !
رد عليه الرجل : ولكن الحي كله احترق !
قال : الا بيتي ما احترق !

وفعلا بيته ماحترقش !

حسن ظن بالله .. شايفين بيعمل ايه ؟؟!
***************************

علي اد حسن ظنك بربنا
ربنا هايعمل معاك !

في شاعر يقول :

اني لأعلم بحسن ظني .. ما الله فاعلُ !
***************************

ازاى ربنا يعيني علي حسن الظن به !!

بحاجتين :

1_ ذكر الله كثيرا :

شوف الحديث كامل :
انا عند ظن عبدى بى وانا معه اذا ذكرنى .

2_ افتكر ربنا عمل ايه معاك زمان من حاجات جميلة !

كل ما تخاف من المستقبل افتكر ربنا اكرمك ازاى قبل كدا !
اكيد هايكرمك في المستقبل !
***************************

الحلقة كدا خلصت

انا هاقول حاجة اضافة علي الحلقة
كـ إنسانة جربت سوء الظن والقلق والشك
وانسانة جربت حسن الظن بالله حتي في أحلك المواقف

بجد مافيش احسن من حسن الظن بالله
انه أكيد هايكرمك بالخير وبالصح مهما حصل ومهما قال كل الناس حولك !

يالا نحسن الظن بالله ؟؟؟



الحلقة 8 .. بعنوان كــن انســانــاً

.. دووووس ..

ودي آخر حلقة من المجموعة الثانية
** اسعد الناس تسعد **

حلقة انهاردة شمولية الخير

خيرك وعطاءك لكل البشر

لو انت بذلت الحب .. وعطفت علي الفقراء والمساكين

النهاردة نقدر نقول وسع قلبك

ادي الخير للناس كلها ..
بصرف النظر عن لونهم ، دينهم ، مستواهم الاجتماعي !

فكر دايما ازاى تسعد الناس !
مهما كانوا هما ايه ومين وفين !؟

كن انسانا .. كن خيراً ..
يقول النبي "ص" :

لا يؤمن احدهم حتي يحب لاخيه مايحب لنفسه

مش المقصود بـ " أخيه " ..
الاخوة الاشقاء .. او المسلمين فقط !
وانما الاخوات في بلد واحدة .. مسلمين وغير مسلمين
اخوه في الانســانية

الناس اربع انواع

سعيد .. سعيد ويحب يسعد الناس
تعيس .. او تعيس ويحب يتعس الناس !

يابختك لو انت النوع التاني
سعيد وتحب تسعد الناس
ويا شقائك لو كنت الرابع
تعيس وتحب تتعس الناس !

في نوعية من الناس كدا !!

النبي عليه الصلاة والسلام كان جالس في مرة ومرت من امامه جنازه
فقام لها ..
قالوله انها جنازة يهودي
فقال النبي "ص" : اليست نفسا !!

في حاجة اسمها انسانية .. كلنا انسان !
يا ايها الناس اتقوا ربكم الذي خلقكم من نفس واحدة

كل الناس مخلوقة من نفس واحدة !

وبعد كدا خلق الله من هذه النفس  الذكر والانثي !

كان ممكن يخلق الذكر والانثي من الاول ولكنه خلقهم من نفس واحدة ليعلموا ان اصلهم واحد

الناس كلها اصلها واحد وهو التراب !

خليك انسان مع جيرانك

ما آمن بي من بات شبعان وجاره جائع إلى جنبه وهو يعلم به

خليك انسان مع الغلابة ..
لاتقل ما الناس مليانة غلابة وهو انا هساعد مين ولا مين ..
لاء .. غلط ..
كن انسان مع اللى ربنا حطة فى سكتك ...

خليك انسان مع الخدم اللى بيشتغلوا عندك .

خليك انسان مع بيت هيتتخرب لوتقدر تحافظ علية ...

خليك انسان مع كل حد حتى لو لم تعرفة ..

خليك انسان مع كبار السن ..

كن انساناً حتى مع غير الانسان .. " الحيوانات "
متنساش ان راجل دخل الجنة لانه اسقي كلب من خفيه
وامراءة بغي أكلت وشربت كلب فغفر الله لها !

----------------------------
الحلقة النهاردة ملخصة بشدة وبأهم النقاط فيها
شوفوها كاملة عشان تشوفو القصص النبوية الجميلة !

وأحب اذكركم ..

لمسة حنان تشفي ..!!

https://blogger.googleusercontent.com/img/b/R29vZ2xl/AVvXsEiusC8jSdHVoe7sfCnGBZG2nSdJ91Jgeee5Bh2hccS41r2j71xMnGllRX4TETrFZU6K3bGC599BFbO_zreFCvMdqtk2rdxunxp2-fKGLLOZy-BIF79BoT14MJvHKYD8DaQCRZcs9NnpB5hW/s1600/ramadanday.jpg

يوم السبت 28 أغسطس في مستشفي أبو الريش ان شاء الله

شوفو التفاصيل هنــآ .. دوووس ..
الحلقــة .. هنــآ ..


مازلنا في المجموعة الثانية
** اسعد الناس تسعد **

وامبارح قولنا ابذر الحب .. وازرع جواك فكرة العطاء !

عندما يُسأل الشباب ايه هي اسباب التعاسة والحزن ؟
منهم اللي قال .. الحقد والغيرة والغل وعدم الرضا .. حالات الطلاق ..
الشعور بالفراغ .. البعد عن الله .. قصص الحب الخيالية الوهمية ونهايتها بجروح ! ..
الفقر .. العنوسة .. البطالة .. الادمان .. الافلام الاباحية .. التسلط .. الكبت ..
الخيانة .. فقدان الدفء الاسري .. عدم وجود الصحبة الصالحة .. والاحساس بالوحدة أو العجز !

وغيرها كتيررررررررر

في ابواب كتيرة مقفولة ..
لكن ربنا كريم .. بيكون فاتح ابواب تانية كتيرة للسعادة
بس ناخد بالنا منها !

فمن الابواب المفتوحة دي ..
اسعد الناس ..
افتح أبواب للاخرين .. ربنا يفتحلك أنت الابواب !

والله سعادتك في سعادة الآخرين ..!
-----------------------
حلقة النهاردة اسمها .. ارحم الضعفاء والمساكين

الناس عندها فكرة غلط عن عطاء الضعفاء والمساكين
انهم هما بياخدو منك !
لكن في رحلة السعادة بنصلح الفكرة
وبنقول انك انت اللي بتاخد من الضعفاء والمساكين دول !
بل بالعكس ..
انت هتاخد منهم أكتر ما هتعطي لهم !

انت هتاخد منهم 7 أشياء ..
لكن هتعطي ليهم 5 أشياء !
----------------------
هتاخد منهم ايه يعني ؟

1_ هتوصل لقمة النضج الانساني في الحياة :
علماء النفس بيقولوا ان النفس البشرية تمر بـ 4 مراحل اجتماعية في التعامل مع الناس
* مرحلة الاعتماد علي الاخرين
* مرحلة الاستقلال عن الاخرين
*مرحلة الاعتماد المتبادل بينك وبين الاخرين
* وقمة النضج هي المرحلة الرابعة .. العطاء للآخرين دون مقابل !

2_ الحاجة التانية ان لذة العطاء تجعلك تقترب من صفات الله الاعلي ...
فالله كثير العطاء
..كريم يحب الكرم ..
جواد يحب الجود  ..
 اعطى عباده الكثير  ...
 تخيل كم اعطانا وانفق علينا .. !!

عندما نعيش لأنفسنا نولد صغاراً ونعيش صغاراً ونموت صغاراً
 وعندما نعيش للناس فان اعمارنا تمتد وتتسع بعمر كل واحد ادخلنا السعاده على وجهة ...
عندما تعيش لنفسك تشعر فى نفسك انك صغير وانانى
لأنك ضد فطرتك ..
فطرتك حب العطاء ..
تقترب من فطرتك تسعد

3_ هتقترب من رسول الله "ص"
ثلاث ارباع عمر الرسول "ص" كان في خدمة ومعاونة الفقراء والضعفاء والمساكين

4_ هتحصل علي حب الخلود ..
هتخلد لانك هتسيب أثر بعد موتك في نفوس الناس حولك وفي الامور الخيرة

5_ هتحصل علي الآمان في حياتك
ضمان حماية الله لك وللاولادك
ضمان بقاء النعمة عندك والمحافظة عليها
يقول الرسول "ص" :
إن لله عند أقوام نعماً يقرها عندهم ما داموا في حوائج الناس ما لم يملوا فإذا ملوهم اخذنها منهم  نقلها الله إلى غيرهم

6_ ستحصل علي رحمة تملأ قلبك وسط الام وهموم الدنيا
فالقلب الرحيم موصول بالله جدا
الرحماء يرحمهم الله
ارحموا من فى الارض يرحمكم من فى السماء

7_ اخيرا ستحصل علي حاجة اروع واروع :
 ضمان لعون الله لك وتأييده لك
يقول الرسول "ص"
 من  فرج عن مؤمن كربة من كرب الدنيا نفس الله عنه كربة من كرب يوم القيامة
ومن يسر على معسر يسر الله عليه في الدنيا والآخرة
ومن ستر مسلمًا ستره الله في الدنيا والآخرة
والله في عون العبد ما كان العبد في عون أخيه

لأن يمشى احدكم فى حاجة اخية خير له من ان يعتكف فى مسجدى هذا 40يوماً

احب الناس الى الله انفعهم للناس 
واحب الاعمال الى الله  سرور تدخله على مسلم او تكشف كربة او تقضى عنه ديناً اوتطرد عنه جوعاً
ولأن امشى مع اخى المسلم فى حاجه احب الى من ان اعتكلف فى المسجد شهراً
--------------------------------

انت كدا هتاخد منهم 7 أشياء
وهتعطيهم 5 أشياء :

1_  رافقهم وعاشرهم  وتبسط معهم

يقول احد الصحابة :

كان رسول الله صلى الله عليه وسلم يأتى ضعفاء المسلمين
 ويزورهم ، ويعود مرضاهم ، ويشهد جنائزهم

 قصة  جليبيب ..
كان رجل من اصحاب النبي وكان في وجهه دمامة وكان فقيرا
وفي يوم قال له النبي "ص" : الا تتزوج يا جليبييب !
قال : ومن يزوجني يارسول الله !
قال : أنا ازوجك ياجليبيب
وفعلا ذهب الا احدي النساء من الانصار وكانت أرملة وطلبها من والدها
فعندما عرف انه لجليبيب قال انتظر حتي استأمر ابنتي وأمها !
ووافقت البنت
وفي احدي غزوات النبي وقد خرج معه جليبيب
وعندما أنتهى القتال اجتمع الناس و بدأوا يتفقدون بعضهم بعضاً
فسألهم النبي وقال: هل تفقدون من أحد
قالوا : نعم يا رسول الله نفقد فلان وفلان
فقال صلى الله عليه وسلم : نعم و من تفقدون
قالوا : هؤلاء الذين فقدناهم يا رسول الله ..
فقال : ولكنني أفقد جُليبيبا .. فقوموا نلتمس خبره
ثم قاموا وبحثوا عنه في ساحة القتال وطلبوه مع القتلى
ثم مشوا فوجدوه في مكان قريب إلى جنب سبعة من المشركين قد قتلهم ثم غلبته الجراح فمات .
فوقف النبي على جسده المقطع ثم قال : قتلتهم ثم قتلوك أنت مني وأنا منك ، أنت مني وأنا منك ..
ثم تربع النبي جالسا بجانب هذا الجسد ثم حمل هذا الجسد ووضعه على ساعديه
 وأمرهم أن يحفروا له قبراً ..
قال أنس : فمكثنا والله نحفر القبر وجُليبيب ماله سرير الا ساعدى رسول الله . فراش غير ساعد النبي

2_  ساعدهم واعنهم  وأحمل همهم ...
كان يقول الرسول "ص"
انا اولى بالمؤمنين من انفسهم
 فمن توفى من المؤمنين وترك ديناًفعلى قضاؤة
او ضياعاً فليأتنى وانا مولاه
ومن ترك مالا فلورثته

 الساعى على الارملة والمسكين
كالمجاهد فى سبيل الله
 او القائم الليل الصائم النهار

3_ حض الناس على مساعدتهم

في فرق بين انك تنفق عليهم وبين انك تحض الناس علي مساعدتهم !
فهذه منزلة أكبر
يقول الله تعالي :
رأيت الذى يكذب بالدين فذلك الذى لايدع اليتيم ولا يحض على طعام المسكين

والحض مش بس على المال حتى على تعليمهم ..

4_ لاتكسر قلوبهم... 
لاتضيق بهم اوبشكلهم او الحاحهم عليك ...
اوعي تظلمهم ..

5_ انفق عليهم ..
آخر حاجة المال ..
انفق عليهم .. شوفهم محتاجين ايه وساعدهم !

يعلمها لبلال الذي كان اصلا فقيرا
انفق بلال ولا تخش من ذى العرش اقلالا

ويعلمها لعائشة !
 ياعائشة انفقى ولا تحصى

لوربنا بيحبك يخلى الناس تدق على بابك ....
 ولو حصل .. اوعي تزهق او تمل منهم
احسن بعدها لايجعل احد يدق على بابك بعدها .
-----------------------------
- فيه ناس تقول وهى خارجه من بيتها : يارب ارزقنى اليوم 1000جنية

وفيه ناس .. تقول وهى خارجه من بيتها : يارب ارزقنى واحد اتصدق علية  ..

ادعى ان يرسل الله اليك ضعيف مسكين محتاج تقف بجواره فتطمئن عن رضا الله عنك . 

----------------------------------

الحلقة خلصت
وبما اننا بنحض علي الخير

دوسوا هنا وحاولو تعملوا الخير :)

يوم خيري .. اعمل الخير ..

الحلقــة هنــ،،ــآ .. ودوووس ..

بداية المجموعة الثانية : اسعد من حولك تسعد !
* عطاء بلا حدود *
ورمزنا لها باللون الاخضر ..
لون الخير والزرع والنماء والخضرة

------------------------------

اي علاقة بين طرفين اي كانت نوعها " زواج ، اخوة صداقة "
قائمة علي الاخذ والعطاء
لو قائمة علي الاخذ فقط بيجي وقت عليها وتنتهي وتدمر

العطاء مش شرط يكون مادي .. ممكن يكون معنوي او مشاعر او او او !!

لو فكرت تاخد بس لن تعيش سعيد !!

اكثر لذة في الدنيا هي لذة العطــاء ..

------------------------------

لما ينعيش لانفسنا
بنتولد صغيرين ونعيش صغيرين ونموت صغيرين
انما لو عشنا للناس .. 

عمرنا بيكبر ويتسع بعمر كل بني آدم دخلنا عليه ابتسامة أو اسعدناه !

------------------------------

عنوان حلقة انهاردة ..

ابذر الحب !

مش معني كدا اننا بنقولك حب !!
لاننا كلنا بنحب

لكن معني الحلقة .. اعلن الحب .. اعطي الحب .. اظهر الحب !
------------------------------

احصائية في احدي الدول

سألوا فيها الاباء " اكثر من 1000 أب ! .. :
انت بتحب ولادك !!؟

اغلب الاباء اتضايقوا وقالو ان السؤال سخيف لانهم اكيد وبدون شك بيحبوا ابنائهم !

لكن لما سألوا الابناء .. أغلبهم قالوا مش متأكدين !!!!!!!


عشان كدا بنقول في فرق بين انك بتحب ! .. وبين انك بتبذل الحب !

طبطب علي الناس !

الناس محتاجة الطبطبة .. الكلمة الحلوة .. الابتسامة الجميلة .. كلمة فيها حنان ودفء !!

ناس كتير بتجري ورا الحب ..
لكن رحلة للسعادة بتقولك ابذل الحب يجي الحب تحت رجلك !

حب انت الناس ووريهم انك بتحبهم وشوف هايحصل ايه ؟

------------------------------

الناس عاوزة تتعلم تحب !

في ناس كتومة .. وناس خجولة .. وناس قاسية ..
وناس فاكرة اظهار الحب ضد الوقار !
وفي ناس بخيلة شحيحة !!

" واحضرت الانفس الشح ! "

------------------------------

شوفو القصة والحديث من ايام النبي صلي الله عليه وسلم !

يوم فتح مكة قال النبي "ص" للكفار :
اذهبوا فأنتم الطلقاء

لكن في واحد كان لسة جواه الغل اسمه " فضاله "
اخفي خنجر واراد قتل النبي "ص" اثناء طوافه بالكعبة !

وعندما شعر به النبي قال له :
بما تحدثك نفسك يافضاله ؟
قاله فضاله : اني اذكر الله !
فقال له النبي : اتق الله يافضاله !
كان يبتسم النبي "ص"
يقول فضالة : فرفع يده فقلت سيضربني !!
فوضع يده علي صدره وظل النبي يمسح علي صدره ويقول :
اتقي الله يا فضاله .. استغفر الله يا فضالة
ويبتسم في وجهى 
يقول فضالة فقبل أن يضع يديه على صدري كان ابغض أهل الارض إلي قلبي .. فما أن رفع يديه عن صدري حتى صار احب أهل الارض إلي قلبي .. !

قال فضالة ‏:‏ فرجعت إلى بيتي
فمررت بامرأة كانت له علاقة غير جيدة فى الجاهلية بها 
 فقالت ‏:‏ يافضالة هلم إلي الحديث !
 فقال ‏:‏ لا

ثم قال شعر رائع يقول :

قالت هلم إلى الحديث قلت يأبى عليك الله والإسلام
لو كنت رأيت محمداً ورجاله بالامس يوم تكسر الأصنام
لعلمتِ أن دين الله أصبح ظاهرا والكفر ييداس بالاقدام

شايفين أثر الطبطبة بيحول البني آدم ازاى ؟؟
------------------------------

كتير بنوجه اولادنا او اصحابنا وننصحهم بلغة العقل
لكن احيانا مش بيكون اللي ادامك سامعك

لكن النصيحة ابدأ من قلبه وادخل علي عقله !
يسمع كلامك ويفهمك وينفذ !

------------------------------

اسمع طريقة النبي في التوجيه
يوجه بالحب أولا ثم بالنصيحة !

  • عن معاذ بن جبل يقول :

بينما انا اسير مع النبي "ص" اذ أخذ النبي بيدي ثم قال :
يامعاذ .. اني احبك .. فلا تنسي ان تقول بعد كل صلاة :
اللهم أعني علي ذكرك وشكرك وحسن عبادتك ..

  • عبد الله بن عباس
وكان عمره 13 عاما !

يقول لقيت النبي "ص" علي الطريق ففتح لي ذراعيه ..
ثم اخذني وضمني ..
ثم همس في اذني ..
قالي له
اللهم فقهه وعلمه يارب

  • عن ابو امامة
وقد كان شابا حديث الزواج
يقول :

لقيني النبي "ص" فقال :
ان من المؤمنين من اراه فيلين له قلبي وانت منهم !
ثم قال :
اذا دخلت بيتك فسلم علي اهل بيتك .. تكن بركه عليك وعليهم !

تقدر تستخدم النور دا ..
متوجهش حد قبل العاطفة والكلمة الحلوة !


------------------------------

النبي "ص" يعلمك ان تبذل الحب وتعلنه بدون خجل وبتلقائية !

جاء عمرو بن العاص الي النبي بعد انتصاره في احدي الغزوات
ويسأل النبي :
من أحب الناس اليك ؟
قال : عائشة !!
فسأله : اما عن الرجال ؟
قال : ابوها ابو بكر الصديق !

ومش معني اعلان الحب والتلقائية ان كل شاب يقول لبنت لا تحل له بأنه يحبها !

لاحظوا اننا بنرسم خطنا للجنة .. فاتقوا الله جميعا !!

ولا تنسوا اختيار الوقت المناسب في اعلان الحب دا !

------------------------------

عبر عن حبك ولو بنكته ..

رجل عمل فى الخندق فاسمر وجهة من شدة الشمس
فقال له النبي: اهلاً ياأبا الورد ..
فرد عليه : لست ابا الورد يارسول الله ..
 فيقول له النبى لو نظرت الى وجهك لعلمت انك ابا الورد

*********


صهيب عينه مريضة فيها رمد ويأكل تمره ...
 يقول له النبى ضاحكاً ياصهيب اتأكل التمر وانت في عينيك رمد ! ...
 فيرد بذكاء :- انما اكلها على شقى الاخر يارسول الله ....

------------------------------

كاتم الحب .. والبخيل بحبه .. هايعيشوا تعساء

ويابنات ..
انتم عندكم عاطفة كتير
والبنات اللى لسة متجوزوش
طلعوا الحب للي محتاجينه .. من الايتام والمرضي والمسنين !
عندك 100 وحدة حب يجب ان تبذل للازواج !
طب لو لسة ربنا مرزقكيش بالزوج الصالح ..
ابذليه في الحاجات التانية اللى ترضي الله !

وحذاري من الانسياق خلف العاطفة وعمل ما يغضب الله !
عشان كدا نصيحة للاباء ..
خدوا بالكم من ابنائهم وخصوصا بناتكم
لانهم في اشد الحاجة للعاطفة دي !

------------------------------

طب ازاى نبذل الحب ؟؟

  •   ** درب حواسك .. :
استخدم حواسك للتعبير عن الحب ...
اذاً درب يدك على السلام .. درب وجهك على الابتسام .. درب لسانك على الكلمة الحلوة ... تعيش سعيداً

** متخليش حبك مشروط :
متقوليش لابنك ذاكر عشان احبك
حبي جوزك حتي وان لم يعطيك الحب
حب زوجتك بدون شروط ..

------------------------------

الحلقة خلصت
بجد من اجمل الحلقات الي الآن واقربها الي قلبي
اتعلمت منها حاجات كتير اوي !!

بحبكو في الله جميعا ..
♥♥

اللهم اني أحبك وأحب من أحبك
وأحب من الاعمال مايقربني لحبك


الحلقة هنــ،،ــآ .. دووووس ..

النهاردة اخر يوم في المجموعة الاولي : ارسم خطك للجنة
واللي رمزنا ليها باللون البرتقالي لون شروق الشمس

اتكلمنا عن ازاى نبدأ صح ..
اتكلمنا عن ازاى نكون مخلصين ونخلي حياتنا كلها لله
واتكلمنا امبارح عن ازاى نعرف نفسنا ونوصل للنفس المطمئنة !

ممكن نعمل كل دول لكن مش هتكمل السعادة الا لو كان عندنا حلم وامل وطموح !

كن طموحاً لله .. ارسم حلمك لاعلى الجنة واجعل نيتك فى هذا الحلم الوصول للجنة .
يقول عمر بن عبد العزيز

(إن لي نفساً تواقة (طموحة )
ما حققت شيئاً إلا تاقت لما هو أعلى منه
تاقت نفسي إلى الزواج من ابنة عمي فاطمة بنت عبدالملك فتزوجتها
 ثم تاقت نفسي إلى الإمارة فوليتها، ان اكون واليا على المدينة ،فصرت والى على المدينة ..
فتاقت نفسي ان اكون خليفة للمسلمين فصرت خليفة للمسلمين .. 
والآن اى شئ اتمنى تتوق نفسي إلى الجنة
 فأرجو أن أكون من أهلها )

هل انت من النوع دا فعلا زي عمر بن عبد العزيز ؟
تقدر تحط حلم وتحققه !
طب ليه مترسمش خطك للجنة
 
احلم بالجنة وحقق حلمك :)

عمرك فكرت ان سر سعادتك مرتبطة بحلمك ؟؟

**********************

الحلم ملوش سن
الطموح ملوش حدود معينة

لو 60 سنة أحلم .. لو 10 سنين احلم برده
فما بالكم انتم ياشباب !

 عمرك حلمت حلم واتنفذ ..؟؟
لو مرة حلم اتحقق حيحصل لك لذة رهيبة .. كأن فية هرمون يفرز انزيمات السعادة .

 رفع الكاس لما مصر فازت بكأس الامم الافريقية كانت ثواني ..
 لحظات رفع الكأس وتنتهى النشوة
امال حلاوة الفرحة فين ؟!..
المشوار وحلمة والامل والطموح للكأس هى دية سر الفرحة .
**********************

قصة عن الطموح والحلم من أيام النبي عليه الصلاة والسلام

عدي بن حاتم الطائي
كان أبوه من سادة القوم وكبارهم

كان يخاف جدا من 3 امور ..
الفقر .. وعدم الامان في الجزيرة العربية وعدم السيادة لوجود العرب بين الروم والفرس
عندما دخل النبي المدينة هرب منها عدي .. ثم عاد مرة اخري لمواجهة النبي
فيحكي عدي ان النبي استقبله ببشاشة وبشر شديد وآخذ بيده إلي بيته ..
وفي اثناء الطريق حصل 3 مواقف !!:
 بينما هما يمشيان إذا بامرأة قد وقفت في وسط الطريق فجعلت تصيح : يا رسول الله .. لي إليك حاجة ..
فانتزع النبي صلى الله عليه وسلم يده من يد عدي ومضى إليها .. وجعل يستمع إلى حاجتها ..
وانتهت المرأة من حاجتها ..
فعاد النبي صلى الله عليه وسلم إلى عدي ..
ومضيا يمشيان ..
فبينما هما كذلك .. فإذا برجل يقبل على النبي صلى الله عليه وسلم ..
قال الرجل : يا رسول الله .. أشكو إليك الفاقة والفقر ..
قال الرجل هذه الكلمات وعدي يسمع .. فأجابه النبي صلى الله عليه وسلم بكلمات ومضى ..
فلما مشيا خطوات .. أقبل رجل آخر ..
قال : يا رسول الله أشكو إليك قطع الطريق !!
أجابه النبي صلى الله عليه وسلم بكلمات ومضى ..
جعل عدي يقلب الأمر في نفسه .. هو في عز وشرف في قومه .. وليس له أعداء يتربصون به ..
فلماذا يدخل هذا الدين الذي أهله في ضعف ومسكنة .. وفقر وحاجة ..!!!
وصلا إلى بيت النبي صلى الله عليه وسلم .. فدخلا ..
فقال صلى الله عليه وسلم : أما إني أعلم الذي يمنعك من الإسلام ..( هنا سيبدأ النبى فى عرض حلم على عدى ويأخذة لتفاصيل هذا الحلم )
أنك تقول : إنما اتبعه ضعفة الناس ومن لا قوة لهم ..
وقد رمتهم العرب ..  وهم فقراء لامال لهم
يا عدي .. أتعرف الحيرة ؟ " الحيرة : مدينة بالعراق  "
قلت : لم أرها وقد سمعت بها ..
قال : فوالذي نفسي بيده ليتمن الله هذا الأمر حتى تخرج ( المرأة )  من الحيرة حتى تطوف بالبيت لاتخش الا الله  في غير جوار أحد ..
أي سيقوى الإسلام إلى درجة أن المرأة المسلمة الحاجة تخرج من الحيرة حتى تصل إلى مكة وحدها .. من غير أحد يحميها .. حلم الامان الشديد مع الاسلام  ..
معقول!!
وتمر على مئات القبائل فلا يجرؤ أحد أن يعتدي عليها أو يسلبها مالها .. لأن المسلمين صار لهم قوة وهيبة .. إلى درجة أن أحداً لا يجرؤ على التعرض لمسلم خوفاً من انتصار المسلمين له ..
فلما سمع عدي ذلك .. جعل يتصور المنظر في ذهنه .. امرأة تخرج من العراق حتى تصل إلى مكة .. معنى ذلك أنها ستمر بشمال الجزيرة ..
يعني ستمر بجبال طي .. ديار قومه ..
فتعجب عدي !!
 ثم قال صلى الله عليه وسلم : وليفتحن كنوز كسرى .. 
فقال عدى  .. كسرى من ؟
فقال النبى  : كسرى بن هرمز .. ملك الفرس
قال : كنوز ابن هرمز ؟
قال : نعم كسرى بن هرمز .. ولتنفقن أمواله في سبيل الله ..
وهذا ايضاً حلم لدى عدى وهو يحلم  هل يصبح  للعرب عزهم ام سيظلوا مجرد اتباع ضعفاء لكسرى وقيصر .
قال صلى الله عليه وسلم : ولئن طالت بك حياة لترين الرجل يخرج بملء كفه من ذهب أوفضة يطلب من يقبله منه فلا يجد أحدا يقبله منه ..سيتغير حال الفقر الى غنى
يعني من كثرة المال يخرج الغني يطوف بصدقته لا يجد فقيراً يعطيه إياها .
يعنى  الـ 3احلام المستحيلة حصلت ..
سكت عدي متفكراً ..من قوة عرض النبى لحلم انتصار الاسلام  بلاخجل .. بمنتهى القوة .. صدق عدى الحلم .
ففاجأه صلى الله عليه وسلم قائلاً : يا عدي .. فما يفرك أن تقول لا إله إلا الله ؟.. أو تعلم من إله أعظم من الله ؟!
قال عدي : فإني  .. أشهد أن لا إله إلا الله .. وأشهد أن محمداً عبده ورسوله ..
فتهلل وجه النبي صلى الله عليه وسلم فرحاً مستبشراً .. وعاش عدى حياتة كلها ينفذ هذا الحلم .
قال عدي بن حاتم : فهذه المرأة  تخرج من الحيرة تطوف بالبيت في غير جوار ..ولقد كنت فيمن فتح كنوز كسرى ..والذي نفسي بيده لتكونن الثالثة لأن رسول الله صلى الله عليه وسلم قد قالها " رواه مسلم وأحمد

شوفت الطموح والحلم نقله اد ايه .. سعادة الدنيا والاخرة!!
**********************

 قصة عدى تعلمك حاجات كتير ::

* ثق فى حلمك .
*  لا تخجل من حلمك .
*  احكى حلمك .
* اجعل حلمك جزء من اصلاح الناس او اجمع حلمك مع احلام الناس .

انت بقى طموحك ايه ؟ حلمك ايه ؟

انت لو عشت بدون حتتحطم حتفقد قيمة ولذة وحلاوة الحياة .

**********************

ليه من غير حلم هاتكون وتعيش تعيس ؟؟

لان الفرق بين الانسان والكائنات الاخري زي القطط مثلا ان  الانسان عنده عقل بيفكر بيه
يقدر يحلم ويميز
انما لو عاش حياته ياكل ويشرب وبس يبقي ايه ؟؟
يبقي زيه زي اي كائن آخر
ودي ميزة ميزنا ربنا بيها .. يبقي لازم نستغلها صح !

هل عندك حلم كبير عايش بيه ومالى كيانك ونفسك تحققة ولا عايش وخلاص !!

الانسان طول ماهو عنده حلم يسعى اليه مشغول انشغال ايجابى ...
بدل من الفراغ ...
الحياة فيها تعب !
طب طالما كدا كدا هنتعب ليه منتعبش علي حلم ؟
مش نتعب وف الاخر يبقي ع الفاضي ؟؟
**********************

عقلك مارد رهيب لو لم تطلقه بالطموح والحلم يتحول الى عملاق محبوس فى اناء !
تخيل الالم والمعاناة ..؟؟
اسمع هذا الشعر الحر المعبر عن تعاسة الانسان عندما يحبس طموحه وحلمه !!

 وضعونى فى اناء ثم قالوا لى تأقلم ..
وانا لست بماء ..
انا من طين السماء ..
واذا ضاق انائى بنموى فسيتحطم او اتحطم ..

اطلق عقلك بالطموح والحلم ..
ربنا رفع وجعل سقف السماء عالياً ليعلوا حلمك ..
تخيل لو سقف السماء منخفض زى سقف بيتك .!!

لن تعيش سعيد الا بحلم يملأ حياتك تعيش علشانه ولو لله تكون رسمت خطك للجنة .
**********************


 هدف الحلقة انهاردة :-
احلم حلم جميل وعيش علشانه ..
تسعد طول ما انت تتحرك له وتسعد يوم تنفيذه 
وتسعد كلما تذكرت تجربتك مع الحلم حتى النجاح 
وده هو احلى طعم تتذوقه للحياة .

**********************

انت وانتى بئة ايه حلمك فى الحياة ؟

حط حلم كبير وحاول تحققه وابذل جهد فيه !
**********************

اجاسى لاعب التنس العالمي ..
حصل على بطولة ومبيلدون مرات عديدة ..
لكن عندما فاز بها اول مرة سأله المذيع عند تسلمه كأس البطولة فقال له :
ماهو شعورك وانت تحصل على بطولة ومبيلدون لاول مرة فى حياتك ؟
فرد وقال :- الحقيقة هذة ليست اول مرة هذة عاشر مرة
فضحك الناس لانها كانت اول مرة .

فرد اجاسى : انا اتكلم بجد هذة عاشر مرة لانى احلم بهذا اليوم من 10سنين
احلم بكل شئ بالتفصيل حتى لون الفانلة التى سأرتديها فى النهائي
وحتى صوت الجماهير فى اذنى من 10سنين .
**********************

مارادونا كان حلمه ان يحمل كأس العالم ..
لكن لما خلص حلمه وحمل كأس العالم
راح للمخدرات لانه صار بلاحلم ..
خلص الحلم .
**********************

ايه اللى بيمنع الناس من الطموح والحلم؟؟

*  خايف يصدق حلمه ثم يصدم انه لم يتحقق ..
هوعنده امكانيات يكون بطل رياضى عالمى بس خايف يصدق حلمة . .
هى عندها امكانيات تكون الاولى على ثانوية عامة بس خايفة .

* وفي ناس مبتحلمش لانهامستصغرة نفسها أوي !!

شوف القصة دي :

 مروان الحمار ... كان في زمن مضى فى بلاد الأندلس
رجل يدعى مروان الحمار ..(يعنى عنده حمار زي التاكسي كده )
وكان له أصدقاء حمارين مثله تماما
وذات يوم قال لأصدقائه تعالو نحلم ‍‍‍‍‍‍‍‍‍‌‌‌....
فقال أحدهم له وماذا نحلم ونحن هكذا وسخر منه
فقال مروان أنا احلم بأن أصبح حاكما للأندلس...
فقال ثالثهم حسنا :لو صرت حاكما للأندلس, فاجعلنى كبير الحمارين ...
وقال الأول : لو صرت حاكما للأندلس, فركبنى على حمار بالمقلوب و
امشي بي فى انحاء البلاد.....

ومضت الأيام ودخل مروان جهاز الشرطه ثم ترقى وترقى ....
الى ان أصبح مروان الحمار حاكما للأندلس...
وسمي بعد ذلك بـ " الحاجب المنصور "
وبعد توليه الحكم أتى بصاحبيه الحمارين
وقال لثانيهم :ألم تكن تريد أن تصبح كبير الحمارين وأعطاه ما أراد وقال له لو طلبت أكثر من هذا كنت أعطيته لك
وجاء بالأول وقال له :سأحقق لك ما أردت إن أنا توليت الحكم .
وركبه على حماربالمقلوب ولف به فى البلاد كما أراد))
ومن يتهيب صعود الجبال *** يعش أبدا الدهر بين الحفر

اصلا فيه ناس تعلو لان فيه اخرين نظرتهم لأنفسهم فى القاع
" سُئل الجبل مما علوك فقال : من دنو الوادى "
اى لولا دنو الوادى لما ظهر علوي .
**********************

 الحلم جزء من الانسان وبالتالى جزء من الايمان :

 ام حرام بنت ملحان ....
كان رسول الله صلى الله عليه وسلم إذا ذهب إلى قباء يدخل على أم حرام بنت ملحان فتطعمه وكانت أم حرام زوجة عبادة بن الصامت
فدخل عليها رسول الله صلى الله عليه وسلم  يوما فأطعمته
فنام رسول الله صلى الله عليه وسلم ثم أستيقظ وهو يضحك .

فقالت أم حرام :ما يضحكك يا رسول الله صلى الله عليه وسلم ؟.
قال:(ناس من أمتي عرضوا علي غزاة في سبيل الله ،يركبون ثج هذا البحر ملوكا على الأسرة أو مثل الملوك على الاسرة) اراهم فى الجنة مثل الملوك على الاسرة .
خلاها تشوف الحلم بتفاصيله

فقالت أم حرام :يا رسول الله ،ادع الله أن يجعلني منهم .

فقال:(أنت مع الأولين )

وعاشت المراة الحلم ومات رسول الله وابو بكر وعمر وجاء عثمان بن عفان لتخرج  اول غزوة بحر فاذا هى تصر على الخروج
وتخرج وتستشهد اول يوم وقبرها موجود لتكون امرأة هى اول شهيدة خارج جزيرة العرب

 عرفت الحلم بيعمل ايه فى حياة الناس ؟؟؟
**********************

 على وارفع سقف حلمك وامنياتك
 اذا سألتم الله الجنه فاسألوه الفردوس الاعلى

إن الله يحب معالى الامور ويبغض سفاسفها

**********************

اجعل حلمك ممتد مش قصير حتى بعد موتك بل يمتد لاجيال واجيال ..
"  وَإِذِ ابْتَلَى إِبْرَاهِيمَ رَبُّهُ بِكَلِمَاتٍ فَأَتَمَّهُنَّ قَالَ إِنِّي جَاعِلُكَ لِلنَّاسِ إِمَاماً قَالَ وَمِن ذُرِّيَّتِي قَالَ ... "

**********************

طب ازاى يكون لي حلم " وصفة هامة جدا لمن اراد ان يكون له حلماً

1_ اقعد مع نفسك ولمدة اسبوع
2_ راجع مواهبك واختار حاجة تتميز بيها
3_ اقرأ عنه كتير واسأل المتخصيين عنه
4_ حط جدول ودراسة لتحقيق الحلم دا
5_ ادعي كتير لتثبيت الحلم
**********************

كدا الحلقة خلصت
والمجموعة كلها خلصت
وبكرة مجموعة جديدة وحلقة جديدة ان شاء الله
اللهم اسالك الهداية والحلم والطموح والتميز

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات