كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )


انا اسمي خالد محمد سعيد
28 سنة
و ..

انتو عارفيني أكيد .. صح ؟

تعرفو كانت امنيتي اني اكون حد مشهور
معرفش اني هاتشهر كدا بعد ما اموت ؟

المهم انا قولت اكتب الرساله دي ليكو
كنوع من الفضفضة يعني واكيد هتستحملوني

عاوز اقولكو اني حزين اوي اني اموت الموتة دي
بس دا قضاء وقدر ربنا وانا مؤمن وراضي بيه

انا شاب عادي اوي .. احلامي كانت بسيطة
بحب امي واخويا

آه صحيح .. يا امي .. ويا اخويا
بابا بيسلم عليكو .. انا قاعد في حضنه اهو ببكي

اه ببكي .. ببكي من الظلم والهوان اللى اتعرضت ليه
انا حزين بس ان دمي طلع رخيص كدا

للاسف مش علي الحكومة وبس
دا علي الناس كمان
وعليكو انتو كمان
وعلي اهل حتتي اكتر واكتر

انا بس عاوز اعرف هما المخبرين دول مؤمنين بربنا ؟
بيقدرو ينامو الليل عادي من غير ما يخافو من عذابه؟

طب عاوز اسال الناس اللى كانت موجودة وانا بتقتل
مصعبتش عليكو وانا بتضرب ادامكو وانتو بتتفرجو ؟

طيب وانتو يامصريين .. يازعلانين يا ثائرين
بشكركو علي مظاهراتكو ووقفتكو الاحتجاجية عشاني
وعشان المئات غيري اللى ممكن يكونو في مكاني

بس واثق انكو هتنسوني بسرعة اوي
زي ما نسيتو مروة الشربيني ؟
 http://www.wata.cc/forums/imgcache/10041.imgcache.jpg

فاكرينها ؟
مروة اللى ماتت في المانيا عشان حجابها واسلامها
وزعلتو عليها شوية .. وبعد كدا نسيتوها خالص

هاتنسوني انا عارف ومتأكد
دا لو مكنش نصكو نسيني وربعكو ميعرفش عني حاجة اصلا
والباقي لسة مش هاينسوني دلوقتي بس اكيد هاينسوني زي ما كل حاجة بتنتهي

كــاس العالم بدأ ..
كان نفسي اتابعه
كنت هاشجع الجزائر

دبت خناقة بيني وبين اصحابي عشان قولتلهم كدا
بس قولتلهم انا بحب الجزائر ..
الناس دي في منها ناس كتير محترمة وكويسة
وفي منها همج
زي ما احنا ساعات بنكون همج
يكفي الاتوبيس اللي اتكسر وكدبناهم ادام العالم وطلعنا احنا اللى كدابين بشهادة رئيس اتحاد الكورة !
يكفي اني اكتشفت اني مش متأكد اذا كنا اتضربنا ف السودان ولا لاء

اصل حكومتنا نجحت في انها تخلينا منثقش في ولا كلمة من كلامهم !
 
زي ماعملو في قضيتي وقتلي كدا

انتو تصدقو اني بشرب حشيش ؟
اني بلعت بانجو ؟
انا هارب من 4 قضايا ؟

بصو لصورتي كويس ؟
انا كــدا ؟
http://sphotos.ak.fbcdn.net/hphotos-ak-ash1/hs343.ash1/29327_104225049627368_104224996294040_37305_6178315_n.jpg

زي ما لفقولي كل التهم دي .. ليا حق اقول مش واثق فيهم
ليا حق اقول انا جزائري الجنسية في كاس العالم 2010
بس للاسف ملحقتش اشجع :(

وليا حق برده اقول ان نصكو نسيني
انهاردة شوفت بعيني الناس وهي فرحانة ان لاعيب جزائري اتطرد
محبتش اكمل متابعة وكملت في حضن ابويا وانا ببكي وبحكيله

ابويا قالي.. حقك هيتاخد
من قتل يقتل ولو بعد حين
ودمك مش رخيص
وهتاخد بتارك
هتلاقي اللى ياخد بتارك اكيد ياخالد
دا كلام ربنا .. العدل يا خــالد 

بس المصريين .. اغلب المصريين محتاجين يفوقو
يبطلو سلبية وتفاهة عشان حقك وحق الملايين غيرك يتاخد

انا خلصت كلامي معاكو
ادعولي بالرحمة

واتمني تفتكروني متنسونيش
دي وصيتي ليكو

ووصيتي كمان لو مش عاوز تشجع الجزائر متشجعش .. بس برده متشتمش 
http://sphotos.ak.fbcdn.net/hphotos-ak-snc3/hs334.snc3/29327_104235492959657_104224996294040_37400_1335048_n.jpg
توقيع
خالد محمد سعيد

25 CoMeNTaToOoOoZ:

samy يقول...

مش عارف اقول

ربنا يرحمه

وهو اللى هيعرف ياخد حقه صح مش بس كلام وأسرع من ما نتوقع

ربنا يصبر والدته وأخوه

MR.PRESIDENT يقول...

حسبي الله ونعم الوكيل .
دا اللي اقدر اقوله
واللي اقدر اعمله اني اعامل الطلاب
اللي بدرس لهم حتي وان كان مستقبلا
باحترام
اعلمهم ازاي يحترموا الإنسان
--------------
كل اللي اقدر اكتبه كلمات جمال بخيت
اللي بحطها في كل موضوع يمس خالد سعيد
-----------
مش باقي مني غير شوية ضي ف عينيا

أنا هاديهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف..

.. خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

...

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

البرنسيسة ريماس يقول...

بسم الله الرحمن الرحيم

الله يرحمه ويصبر أهله

أم الخــلـود يقول...

إن ما حدث هو مأساة في حق الإنسانية .. حسبنا الله ونعم الوكيل

(ست* جنى* الحسن) يقول...

سلامو عليكو..
الله يرحمه ويصبر امه ويأجرها خير عن مصيبتها ومصيبتنا.
تصدقى لو قولتلك انى لسه جايبه سيرة مروة النهاردة .والله النهاردة.
فى ناس بموتها بتدى المايك لناس كتير عشان تتكلم وبتدى االاشارة لمشاعر ناس اكتر فى الغليان.ولعله خير
والله المستعان عما يصفون.

خواطر شابة يقول...

عزيزتي مزجت بين موضوعين بشكل مؤثر جدا
عزيزتي للان صورة جثة خالد لاتفارق عيني بشاعة الصورة وبشاعة المنظر المتخيل لاتحتمل
ايضا فكرة ان الاعتداء وقع عليه في الشارع العام ولمدة 20 دقيقة دون تدخل من احد ودون احتجاج من الحاضرين أو محاولة لتخليصه يجعل كل الحاضرين شركاء في دمه.
انا ازعم اني متابعة جيدة للاعلام المصري هذا الحراك وهذا الاهتمام بالقضية الموجود على النت غير محسوس اطلاقا على التلفزيون البرامج عادية وبرامج التوك شو اعتبرته عنوان صغير تجاوزته بسرعة لما بعده.
بالنسبة لموضوع الجزائر لميس الحديدي اليوم قالت بالحرف " بالنسبة لي اهم من ان منتخب الجزائر خسر ان لاعبا منهم اخذ بطاقة حمراء" صراحة لاتعليق الا عبارة اذا لم تستح فافعل ماشئت .

smsmia يقول...

حسبنا الله ونعم الوكيل
إمتى المصري هيكون دمه غالي
هان المصري على بلده فهانه الجميع
لازم يكون لنا وقفة
وتكون ليها صدى
يردد صداها الزمان

أم الخــلـود يقول...

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين

غير معرف يقول...

ثقافة الهزيمة .. حلوة يا بلدى

فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

باقى المقال ضمن مقالات ثقافة الهزيمة بالرابط التالى www.ouregypt.us

و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

♥♥ شذا ♥ الروح ♥♥ يقول...

السلام عليكم
اختى وحبيبتى
يارب تكونى بخير وبجد مفتقداكى كتير اووى يارب يطمنى عليكى يارب
*******************

كلامك قطع قلبى بجد مش عارفه اقول ايه بالموقف اللى زى ده غير ربنا يتولانا ويرحمنا برحمته
ويبعد عنا اى شر
خالد ده ابننا واخونا ودمه راحد هدر على الدنيا بس مش هيرح عند اللى بيغفل ولا بينام رب العباد موجود وبيرد الحقوق لو مش بالدنيا اكيد بالأخره

ربنا يرحمك يا خالد انت ومروة الشربينى
بجد قلبى واجعنى اووى
حرررررررررام وكفاااايه لحد امته هنفضل مش لينا قيمة بالبلد دى
الغلبان لا حولا وله ولا قوه
والقوى يحتل البلد وقاعد ولا همه
بقولها بأعلى صوتى
طظظظظظظظظظظظظظظظ

طظظظظظظظظظظظظظظظظظظظظ

فى حكام البلد ورؤسها من كبير صغير
طظظظظظظظظظظظظظظظظظظظظ

ويارب يتعمل فيهم وينتقم منهم اشد الانتقام عشان يشربوا من نفس الكاس المر الى بنشرب منه
واللى ذاد انهم يشوهه صورته ويقول عليه انه بتاع بنجو
ربنا ينتقم منكم مش لاقين حاجه تعملوها
حسبى الل ونعمه الوكيل
حسبى الله ونعمه الوكيل

غير معرف يقول...

ربنا يرحمه ويحسن اليه وربنا ينتقم من اللى عمل كده فيه وكلنا لازم ندعيله وناخد حقه انا عارفه انى مش بايدى حاجه اعملها بس انا من انهارده هدعيله بالرحمه وهدعى علي كل ظالم معندوش رحمه ولا قلب وربنا يحرقهم بجاز المخبرين دول وبجد الف رحمه ونور عليك ياخالد كلنااا هندعيلك

زهرة يقول...

ربنا يرحمه .. وزى ما قلتى هيتنسى زى اللى إتنسوا
لإنه لو الناس فكرت انها متنساش بالذوق هتنسى بالعافيه

معتز شاهين - باحث تربوي يقول...

حسبنا الله
وهو نعم الوكيل
في هذه البلد
بلد امناء الشرطة

ربنا يرحمه ويغفر له

ويبقى التواصل

غير معرف يقول...

حسبى لله ونعمة الوكيل وربنا مش بيسب حق مظلوم ابدان وعمرنا ما هننساك يا خالد

Tears يقول...

البوست يوجع القلب اوى

بس الشعب ده يستاهل بجد لان هو اللى عمل فى نفسه كده و لسه الاكتر جاى

ماجد العياطي يقول...

الله يرحمك ياخالد

ويرحم ملايين غيرك

يارب ارحم الشعب اللي مات من زمان

وسامحوا

وفوق اولاد البلد دي

يارب

لمحه جميله منك يااعقل مجنونه

ربنا يجعلها في ميزان حسناتك

Boky يقول...

الحق دة حقنا كلنا وفى رقبتنا كلنا

عارفة يا ريمو

خالد ما مامتش برصاص وعنف وضرب بس

خالد مات من زمان بصمتنا كلنا واستسلامنا وخوفنا وجبننا
وتفكير كل واحد فى نفسه
ومبقيناش نجرى على ارواح بعض ونفديها ونخاف على بعض

أنا شفت استهتار فى مواقف كتير لينا ببعض فى كذا حاجة بيأكدلى ان احنا اللى مضيعين حق بعض وعاملين كدة فى بعض

ربنا يرحمنا ويهدينا ويلحق انتقامه بكل اللى يستحقه امين

Boky يقول...

ااااااااااااااااا

نسيت اقولك


صباحك حلم وأمل يا ريمو <3

مرايتى يقول...

ربنا يغفر له ويرحمه يارب ويجعل مثواه الجنه وياخد حقه من إلى ظلمه إنه هو الحق سبحانه ويلهم أهله الصبر والسلوان

أبدعتى فى الرساله حبيبتى
وعمر الظلم ما بيتنسى ياخالد

عايشه لنفسي يقول...

الله يرحمه ويصبر اهله
لانملك غير الدعاء

ghada mOhsen يقول...

حسبي اللهو نعم الوكيل

بجد البوست ده بيوجع القلب كتير بس بنفس الوقت بيصحي فينا حاجات كتير
بجد تسلمي

وياترى عامله إيه في إمتحاناتك
طمنينا
... ;) ,,, ;) ...

سومه...مجنونه فى بلد عاقل يقول...

تحياتى لكلماتك لكن ولا اى كلمه فى دنيتنا حتعبر او توصف اللى هو فيه دا فى عالم غير العالم عالم احنا نجهله ربما يكون فى مكان افضل ربما اسوأ لا شىء مؤكد فى عالم الاموات و الارواح وحده الله سبحانه وتعالى هو الذى يعلمه
لكن كلماتك بتوصف حالنا دلوقت سلمتى

مصر اليوم يقول...

الله يرحمه و يرحمنا

زكرياء يقول...

السلام عليكم
اول مرة اشوف كلام مؤثر عن هده القضية
الله يرحمو و يصبر اهلو و ينتقم من لي كان السبب يارب
و الله صورتو بعد ما حصل ليه خير دليل انو هدوك الاشخاص ليس لديهم اي علاقة بالانسانية
مقتلو اتعرف ايضا في المغرب و كل الناس زعلت علي لي حصل
اتمني القانون ياخد مجاره و يتحاكمو المجرمين
اما بالنسبة لمروة الله يرحمها فمسالة الحجاب كل المسلمين و خصوصا المتحجبين لي ف اروبا يعانون من العنصرية

rona ali يقول...

كدة تعملى فيا العمله



الحلوة دى

موجعه اوى احنا حتى الان فاكرينه وكل ميدان وكل مظاهره بتحمل اسمه وصورته

ممروة كمان بتيجى علي بالي كتيييييير

ربنا يرحم كل شهيد وهو عليهم اطيب واحن مننا :)

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات