كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )




هما 17 ولا 15


طب احسبهم من أول سنتين

آه هاحسبهم بئة من أول سنتين :D

ما ماما كانت بتمسكني تضربني كل الم والم عشان بكتب الـ ب .. ن

--> لن انسي لها هذا الموكف :D

17 سنة من حياتي راحو في التعليم !

أحلي أوقاتي .. وأرخم أوقاتي

مش مصدقة

انا كدا خلاص ؟

بقيت حرة


أنا خلعت التعليم بالتلاتة :D

من تعبي الصبح قولت لماما انا ممكن ماخدش كورسات بسبب الامتحانات !

مش عاوزة امتحن تاني :D :D

لكن خلاص انا خلصت .. انا بقيت حـــــــرة :D :D

عارفين ..

انا فاكرة أول يوم روحت فيه الحضانة

وفاكرة الدادة المنقبة .. اللى كانت تدخل معانا تقلع النقاب

وانا مستغربة

هي ليه بتمشي متغطية !!

فاكرة أول يوم دخلت فيه المدرسة

فاكرة ميس رحاب أول ميس درستلي في المدرسة في أولي ابتدائي

فاكرة اخر يوم في امتحانات 5 ابتدائي والفرحة اللى كانت جوايا اني كبرت ودخلت اعدادي !

فاكرة أول يوم دخلت فيه اعدادي وشلة الفساد اللي معرفش عنهم حاجة دلوقتي

دعاء نمنم .. مني الشهيرة بمروان " عشان كانت بتقص شعرها خالص زي الولاد وبتحط جيل :D " وانجي بكبوزا :D

وفصل 3\4 كله في مدرسة الاورمان الاعدادية الثانوية بنات

فاكرة ثانوية عامة واول سنة واللي فلت وكمل معايا من اعدادي لثانوي في نفس المدرسة

مني الصاوي وبسنت ومنال وبقيت الشلة المجنونة

فكراكو ومش لاقيالكو مكان يامصايب

فاكرة الهم اللى شلته وانا في ثانوية عامة

فاكرة امتحان الكيميا اللى عكيت فيه

وبقيت المواد اللى كنت مقفلاهم تقريبا :D

فاكرة درس الفيزيا بتاع 3

اللى قررت قبل الدرس بربع ساعة اني احول ادبي :D :D

وقولتلهم مش رايحة الدرس ومش هاكمل علمي

انا اصلا عاوزة ادخل اعلام يابشر مالي ومال صيدلة اللى بابا عاوزني ادخلها ؟؟؟

فاكرة الصدمة يوم النتيجة علي كام من عشرة في المية ومدخلش اعلام

فاكرة اني سمعت نصيحة ناس رخمة قالولي ادخلي اثار :D

مع ان مجموعي كان يجيب السن !

بس يلا مبقتش فارقة سينا من سونيا

:D :D

الحسنة الوحيدة من الكلية دي اني طلعت بأحلي اخت في الدنيا

سهــــــى ـآ

بحبك أوووووووووووووي وان شاء الله انتي اللى تفضلي ليا من 17 سنة خدمة في تعليم :D

نسيت اقولكو ..

اني فاكرة أول يوم دخلت في الجامعة وانا قلبي بيدق كل ما اقرب من القبة

فاكرة اصلا وانا صغيرة لما بابا كان بيفسحنا ويقولي بصي دي الجامعة الىل هتدخليها لما تكبري

أنا كبرت !

انا فاكرة لما كنت بلعب بالميكانو .. فاكرة لما كنت بكلم الدباديب وبذاكرلهم !

يــــاه

عاوزة حد يعضني :D

ما انا مش مصدقة

طب افرح ولا احزن واقلق ؟

انا سيباها علي ربنا

انا مطمنة اني عندي هدف احققه

وعندي اصحاب بحبهم وبيحبوني

كانو بيقولولي " بعض الناس " انتي معشتيش حياتك في سنين الجامعة

ضيعتي احلي 4 سنين من حياتك عشان مكنتيش بتنزلي فيهم كتير

مكنش عندك اصحاب كتير

مكنتيش بتخرجي كتير

بس انا بقول انا راضية اوي عن نفسي كدا ولعل دا الخير ليا والصح ليا كمان

انا بس نفسي اللى جاي مضيعهوش واحقق اهدافي اللى 97% مع اصحابي والـ 3 % المفروض احققها بيني وبين نفسي فقط

انا مبسوطة .. وقلقانة .. ومستغربة !

الوقت بيجري أوي والعمر عدا هــوا

كفاية رغي بئة وانا عاملة زي العيل الزنان المزبهل :D

باي بااااااااااي احلي وارخم سنين عمري

بااااااي بااااااااي 17 سنة من عمري



انا عاملة حداد 

سامحني يارب وسامحيني يابلدي وسامحني يا خالد 

انا مقصرة واعترف :(

رجاءا لمن لم يقرأ هذه التدوينة يقرأها

من خالد محمد سعيد إلي ..

 

لتفاصيل الحداد ..
اضغط هنــا " صفحة حداد المدونين علي الفيس بوك "






امبارح خير اللهم اجعله خير سمعت اغنية اخترت صح بتاعة تامر حسني

حسيتها متناقضة فرجعت اسمعها تاني 

و ....

بغض النظر عن شخصية تامر ولا اغانيه انا مش بنقد حد 

بس انا سمعت الكلمات واستفزتني شوية .. وقررت ارد عليها بطريقتي 

التفسير اخر البوست ^_^

الاول كلمات الاغنية


انا ودعت كتير في حياتي
من غير ما احس بأي جرح
واما حكتلك ذكرياتي
قولت عشان مخترتش صح

لومتي قلبي ع اللى فاته
لحد ما قالك انتي صح
وبعد شوية سيبتي حياته
بس سيبتي فيها جرح

يعني فعلا مانجرحتش
الا لمـا اخترت صح


كلمة بحبك غالية عندي
مقولتهاش قبلك وجتلك
اقولها ليكي من جوة قلبي
وكرهتها لما اتقالتلك

لومتي قلبي ع اللى فاته
لحد ما قالك انتي صح
وبعد شوية سيبتي حياته
بس سيبتي فيها جرح

يعني فعلا مانجرحتش
الا لمـا اخترت صح


نفسي ينسي قلبي حكايتك
نفسي ينسي انه قابلك
وارجع اغلط في اختياري
نفسي ارجع للي قبلك


ودا ردي عليها وركزو فيها عشان اللي هاقوله بعدها 


اخترتني صح
بس سبت في قلوب كتير قلبي ميت جرح
كرهتني دلوقتي صح !
او حتي مكرهتنيش
دا لو حطيت في عيونك حبة ملح !

انت السبب .. انت اللى خلتني اكرهك
ماهو مش اول ما احبك والمحك
تقولي عيوبك .. تقولي بلاوي قلوبك
مانت بميت مليون قلب
ولا عمرك عرفت يعني ايه حب
مثلت كتير علي غيري
معلش ..معاك خانني تعبيري
وضيعت معاك حبة من وقتي
واكيد دا كتر خيري

كنت فعلا اخترتني صح !
وانا بقولك اهو .. مش هتلاقي زيي
دا مش غرور .. دا كلام صح
انت صغير اوي في عيوني
آه .. صدقني ..
دا بجد حقيقي صح

ايوة انت منجرحتش الا لما اخترتني صح
فاكر انت الدنيا سهلة !
لآء مش صح !
فاكر زمان اد ايه ندمو بسببك ؟
أكيد ناسي .. ما انت جبان
مش صح ؟

نفسك تنساني ..
نفسك ترجع لقذراتك مع ناس تاني
نفسك تكمل مسيرتك في دور الاناني

انت معايا كنت هاتنضف
وكنت عارف كدا او حتي كنت هاتعرف
حاولت اكمل معاك ..
بس لاقيتك شخص تقرف

بعد ما اخترتني صح
قررت انا الصح
انك ولا حاجة
ولازم تكون في حياتي
بـــــــح

الفكرة باختصار ..

ليه الشاب بيعمل كل الاخطاء المتوقعة وف الاخر بيكون عاوز يختار بنت خام !

بنت هبلة وعبيطة وام بدوي ؟

لو حاولت تفهم وتكون ذكية تبقي مش كويسة !

ولو حاولت تتمرد علي خبثه وجبنه .. تكون عدوته وجرحته !

ليه الشاب بيجرح قلوب كتيرة .. 

ووقت ما ينجرح يعمل زي الفرخة الدايخة

ويكره فيها الوقت اللى حب واختار صح !

والاغرب انه بيحاول ينسي الجرح دا بانه يجرح قلوب تانية جديدة !

مبيحاولش يعرف ان اللي حصله دا مجرد بؤ من الكاس اللى شربه لناس كتيرة اوي !

كلمات الاغنية بتاعة تامر حقيقية وبتحصل كتير جدا بين الشباب دلوقتي

يجرحو كتير .. ولما ينجرحو .. يحسو انهم مظلومين !

مع اني اعتقد ... لا انا متأكدة 

انه أكيد هو السبب ف جرحه دا !

ما انا مستناش واحد من اول ما احبه وارتبط بيه يقولي انا معنديش غالي !

حتي لو خلاني الغالي بتاعته فيما بعد ..

بس كدا هو اخترني صح .. وانا اخترته غلط 


مستناش واحد يقولي انا ودعت كتير ي حياتي من غير ما احس باي جرح

واستني لما يودعني وميحسش بالجرح دا !

مستناش واحد يسلبني حريتي .. عشان يعيش حياته هو بالطول والعرض علي انه " لآموآخذه راجل "

مستناش واحد يقولي انا بشتغل وبتعب عشانك !

علي اساس انك لو وحدك ياسيد امك مكنتش اشتغلت وتعبت .. دا انت عبد للفلوس --> كلامي دا للشخصيات دي !

مختصر كلامي ..

  • للشاب العايش دور المظلوم .. 
شوف انت ظلمت اد ايه ف حياتك
وهتعرف انك باحساسك دا بتكمل بظلم نفسك 


  • اللي بيتوب عن معصية بيبان عليه

يعني الشاب لما يعرف مليون بنت .. او البنت لما تعرف مليون ولد

وتيجي تتوب لربنا .. هتتقي ربنا في اللي معاها

هيحافظو علي بعض 

مش هايجي ولد يقول للبنت انا توبت عن كل اللى عملته قبلك

وهو معاها علي طول ماسك ايدها وهات يا بوس !!!!

بالذمة دا اسمه كلام ؟

يــلآ .. آهــو كــلآم والســلآم 

^_^

انا اسمي خالد محمد سعيد
28 سنة
و ..

انتو عارفيني أكيد .. صح ؟

تعرفو كانت امنيتي اني اكون حد مشهور
معرفش اني هاتشهر كدا بعد ما اموت ؟

المهم انا قولت اكتب الرساله دي ليكو
كنوع من الفضفضة يعني واكيد هتستحملوني

عاوز اقولكو اني حزين اوي اني اموت الموتة دي
بس دا قضاء وقدر ربنا وانا مؤمن وراضي بيه

انا شاب عادي اوي .. احلامي كانت بسيطة
بحب امي واخويا

آه صحيح .. يا امي .. ويا اخويا
بابا بيسلم عليكو .. انا قاعد في حضنه اهو ببكي

اه ببكي .. ببكي من الظلم والهوان اللى اتعرضت ليه
انا حزين بس ان دمي طلع رخيص كدا

للاسف مش علي الحكومة وبس
دا علي الناس كمان
وعليكو انتو كمان
وعلي اهل حتتي اكتر واكتر

انا بس عاوز اعرف هما المخبرين دول مؤمنين بربنا ؟
بيقدرو ينامو الليل عادي من غير ما يخافو من عذابه؟

طب عاوز اسال الناس اللى كانت موجودة وانا بتقتل
مصعبتش عليكو وانا بتضرب ادامكو وانتو بتتفرجو ؟

طيب وانتو يامصريين .. يازعلانين يا ثائرين
بشكركو علي مظاهراتكو ووقفتكو الاحتجاجية عشاني
وعشان المئات غيري اللى ممكن يكونو في مكاني

بس واثق انكو هتنسوني بسرعة اوي
زي ما نسيتو مروة الشربيني ؟
 http://www.wata.cc/forums/imgcache/10041.imgcache.jpg

فاكرينها ؟
مروة اللى ماتت في المانيا عشان حجابها واسلامها
وزعلتو عليها شوية .. وبعد كدا نسيتوها خالص

هاتنسوني انا عارف ومتأكد
دا لو مكنش نصكو نسيني وربعكو ميعرفش عني حاجة اصلا
والباقي لسة مش هاينسوني دلوقتي بس اكيد هاينسوني زي ما كل حاجة بتنتهي

كــاس العالم بدأ ..
كان نفسي اتابعه
كنت هاشجع الجزائر

دبت خناقة بيني وبين اصحابي عشان قولتلهم كدا
بس قولتلهم انا بحب الجزائر ..
الناس دي في منها ناس كتير محترمة وكويسة
وفي منها همج
زي ما احنا ساعات بنكون همج
يكفي الاتوبيس اللي اتكسر وكدبناهم ادام العالم وطلعنا احنا اللى كدابين بشهادة رئيس اتحاد الكورة !
يكفي اني اكتشفت اني مش متأكد اذا كنا اتضربنا ف السودان ولا لاء

اصل حكومتنا نجحت في انها تخلينا منثقش في ولا كلمة من كلامهم !
 
زي ماعملو في قضيتي وقتلي كدا

انتو تصدقو اني بشرب حشيش ؟
اني بلعت بانجو ؟
انا هارب من 4 قضايا ؟

بصو لصورتي كويس ؟
انا كــدا ؟
http://sphotos.ak.fbcdn.net/hphotos-ak-ash1/hs343.ash1/29327_104225049627368_104224996294040_37305_6178315_n.jpg

زي ما لفقولي كل التهم دي .. ليا حق اقول مش واثق فيهم
ليا حق اقول انا جزائري الجنسية في كاس العالم 2010
بس للاسف ملحقتش اشجع :(

وليا حق برده اقول ان نصكو نسيني
انهاردة شوفت بعيني الناس وهي فرحانة ان لاعيب جزائري اتطرد
محبتش اكمل متابعة وكملت في حضن ابويا وانا ببكي وبحكيله

ابويا قالي.. حقك هيتاخد
من قتل يقتل ولو بعد حين
ودمك مش رخيص
وهتاخد بتارك
هتلاقي اللى ياخد بتارك اكيد ياخالد
دا كلام ربنا .. العدل يا خــالد 

بس المصريين .. اغلب المصريين محتاجين يفوقو
يبطلو سلبية وتفاهة عشان حقك وحق الملايين غيرك يتاخد

انا خلصت كلامي معاكو
ادعولي بالرحمة

واتمني تفتكروني متنسونيش
دي وصيتي ليكو

ووصيتي كمان لو مش عاوز تشجع الجزائر متشجعش .. بس برده متشتمش 
http://sphotos.ak.fbcdn.net/hphotos-ak-snc3/hs334.snc3/29327_104235492959657_104224996294040_37400_1335048_n.jpg
توقيع
خالد محمد سعيد


آه لو املك جناحين واقدر اطير
وابعد بعيد .. واعيش في تغيير
اكون لوحدي في عالم علي ادي
او حتي اكون في عالم كبير
بين ناس كتير !
بس لازم يكون فيه حرية تعبير
ميكونش فيه تجريح .. ميكونش فيه تلميح
يكون كل شئ واضح وصريح
ميكونش فيه سيد .. ولا حتي فيه عبيد
كله علي نفس الأد
واستخدم جناحاتي واطير بين الورد
وابعد وارجع تــآني لنفس الأرض
انشر حب وخير وسلام
ونحقق سوا كل الأحلام
وارتاح لما اجي انام
واصبح افرح .. اجري واطير
وافضل كدا انا فـ التغيير
وافضل اعبر ..واقدر اقرر
واكبر واعلي ..وانجح اكتر
واعرف حبايبي واعلم ولادي
احببهم أكتر في كل بلادي
وقتها هتخلي عن عصبيتي وعنادي
وهاكون اخر روقان
^_~
هاقضي علي الفساد
في كل شبر ف البلاد
هانشر ف الكون كل الامجاد
هنشر فرح ..
هاوزع مرح
هاعمل كوكتيل غير النكد والالم
هاقضي ع الملل
هامسح اليأس هافرق أمل
هايكون في كتير
انواع من الخير
وبكدا هاعيش دايما
فـ أحلي تغيير
آآآآه ..
أه لو كان لي جناحين واقدر اطير

^_^


http://vb.arabseyes.com/uploaded/25202_1187442785.gif

ريمو اكيد غلطت وكانت تقصد ما قتل مش ما هطل !

لاء ريمو قاصدة مية ف المية العنوان

زائد انها عاوزة تضيف كمان حب ايه اللى انت جاي تقول عليه



نعم عزيزي القارئ لقد اصبت بـ " كتابوتا في السكلانص "
 
-->  اما عن كلمة كتابوتا فهي كلمة شهيرة بتقولها اختي سلمي لما بتلاقي الدنيا اتلغبطت وبتحب تهيس علينا 
--> وكلمة سكلانص معرفش هي ايه الصراحة

اكيد سمعته عن اللي شنق نفسه علي كوبري قصر النيل عشان مش عارف يكمل مصاريف الجواز

مقدرش يصبر شوية وال ايه قبل مايشنق نفسه كتب للمحروسة جواب يقولها

"أستطيع ترك الدنيا لكنى لا أستطيع أن أترك حبيبتى"

افرح يا موكوس .. اديك سبت حبيبتك وسبت الدنيا كمان ..

لا وايه .. في هدية كمان .. انك سبت الاخرة !!!!!!

حب ايه اللي انت جاي تقـــــول عليـــــــــه

هو اي حد مش عارف يتجوز يعمل اي مصيبة قلة ايمان وعدم رضا بقضاء ربنا ويقولولنا حب !!

ولا احنا كل حاجة هنرميها ع الحكومة

لاموآخذة ياحكومة

ماهو في اكتر من نص الشباب دا لو مكنش تلت ترباعهم مش عارفين يتجوزو

كانو هببو هبايبكو دي ؟

اصل الاسبوع اللى فات سمعت حادثة كدا بس حيائي يمنعني من اني اقولها 

انا حاسة اني بخطرف ياجدعــــــــان

عن جد .. ربنا يهدينــــــــا كلنــــــــا


البوست دا مش استهتار بحد مات وبئة بين ايدين ربنا

بس تحذير لاي شاب واي بنت يفكرو ينهو حياتهم عشان اي حد

دا ابتلاء من عند ربنا

ولا انت وهو وهي يعني فشلة في كل حاجة حتي الاختبارات الالهية

جاتكو الارف مليتو البلد

ابئة اشوف حد فيكو انتحر تاني عشان حد

اللى هينتحر هاجتلـــــــــــــــــــــــه



About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات