كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )






مممممم 


اتكلم ولا متكلمش ؟


ماهو مفيش حاجة معينة اتكلم فيها

حاجات كتيرة منقطة نقط صغيرة فوق بعض عملوا جبل كبير بينزل عليه المطر بس مش عاوز يبقي مجرد تل !

حد فاهم حاجة ؟

انا مش عارفة ايه الجملة الغريبة اللى قولتها دي


اقولكو

انا كنت مبسوطة اوي الصبح

حاسة باحساس لذيذ كدا .. يمكن عشان الكبت والخنقة والهم المستخبي ورا ابتسامة صفرا بتفرح كل الناس ومبتفرحش صاحبتها .. طلع في مشي كتير .. وفلوس كتير :( 

اصلي انهاردة نزلت عملت " شوبينج " ^_^


صرفت القرشين اللى حيلتي

بس وانا مروحة كنت عاملة زي الاطفال المبسوطين بانهم جابو حاجة جديدة

لحد ما روحت .. فرجت ماما الحاجات اللى جبتها .. وبعد كدا حطيتهم تاني في شنطهم ومرمين جنبي اهم !

خلاص مش طايقة ابصلهم تاني O_o


والكبت اللى طلعته وانا بمشي وبدخل محلات اد كدا وبشتري وبتفرج وبضحك وبهزر وباكل الدوريتوس وبشرب الشويبس 

وحالة الانبساط اللى كان فيا وانا راكبة العربية انتهت !

انتهت زي ما كل حاجة حلوة بنتنتهي .. وكل حاجة وحشة برده بتنتهي !

************************


من الجدير بالذكر برده اني مدايقة جدا بسبب اني تأكدلي مؤخرا اننا شعب مضحوك علينا بالأوي ..

هاتكلم عن الموضوع دا ف بوست مستقل لو ربنا اداني عمر وصحة وعقل وفكر !

هاقول نبذة بس وسؤال !!

ايه شعوركو لما الفيفا اصدرت عقوبة علي مصر دون الجزائر !

وايه شعوركو لما رئيس اتحاد الكورة قال ان فعلا في مصريين ضربو الاتوبيس !

بالله عليكو .. مش حاسين ان مضحوك علينا فـ حاجة ؟

كفاية فتنة بئة .. مش عاوزة اشوف حد بيشتم جزائري 


كفاية يامسلمين يامحترمين يا اللي بتحبو ربنا .. اتقو الله

والكلام برده للجزائريين 

اصل لاموآخذة محدش بيحب بلده أدي --> آه البت وطنية اخر حاجة حد عنده اعتراض :@

كفاية .. هابئة اتكلم اكتر في بوست تاني وقت آخر ان شاء الله 


************************

حاجة كمان .. استحملوني ..

كنت ماشية ف المذاكرة زي الفل .. بس جالي عطل مفاجئ

مع حاجات طلعت موجودة ف المناهج والمقررات طلعت معرفهاش

اصل الاخت فاشلة وواخداها من منازلهم :@

بيجلها المنهج ف التليفون

هي حاجات بسيطة اي نعم .. بس برده حسيت اني وحشة اوي :(

مهما كانت ظروفي مكنش ينفع اهمل للدرجة دي في اهم واخر حاجة ممكن تنفعني في الزمن دا حتي لو كانت ورقة وهتتعلق :(

ياما ورق كتير اتاخد ف الحياة وف الاخر بيكون مجرد ورق

بس الورقة دي هتفرق معايا كتير بجد 

ربنا يستر ويسامحني ويغفرلي 

وارجع تاني الخمناشر يوم دولا اذاكرهم عدل

بس انهاردة ماليش مزاج :D




************************


حاجة اخيررررررررررررررة 


انا مكنتش حابة اتكلم تاني ف المدونة ف حاجة شخصية

بس قولت اتكلم بدال ما افرقع يعني ^_^

بلاش حد يدعي عليا
هــ اطلب


دعــــــــواتكم 



************************

امبارح وانا مروح
مادخلتش في شارعنا
ودخلت في شارع تاني
تهت .. بس شفت
شجر تاني
باب تاني
كلب تاني

بكرة وانا مروح
مش هاروح
وهاسيب نفسي
اتوه تــاني !!


حبة هـوا --> وليد طاهر

42 CoMeNTaToOoOoZ:

♥♥ شذا ♥ الروح ♥♥ يقول...

السلام عليكم

اخد اول تعليق وارجع تانى

♥♥ شذا ♥ الروح ♥♥ يقول...

بصى يا حبيبتى دى مدونتك اكتبى فيها اللى يعجبك ومش يهمك بجد صدقينى
امال احنا عملنا مدونات ليه عشان نفضفض ونزيح عن نفسنا
ربنا يسعدك يارب ويريح بالك وينجحك قادر يا كريم ويكتب ليكى الخير كله

وبالنسبه لنناس اللى بتغلط انا بكون حزينه اووى لما بسمع حد بيهين بلده او شعبه
ربنا يهدى النفوس يارب
ويكرمك حبيبتى
ويصلح حالك
تقبلى مرورى

أع ـقل مـ ج ـنـونــة يقول...

منووووووورة اول تعليق وليكي هدية من الكانتين :D

انا والله لوهلة قررت اخلي المدونة حاجة عامة مش شخصية بتاتا <_<

بس واضح اني هاجري عليها ف الخنقات :D

ربنا يهدي الجميع يارب ويرجعلنا كرامتنا اللى متهانتش بايد حد غير حد مننا للاسف <_<

ميرسي لدعائك وتشريفك ليا ومتنسيش هديتك :D

Ramy يقول...

السلام عليكم

ازيك
انا مش عارف اقول اية بس دى حالة عامة ان نكون طهقنين من اللى بيحصل حوالينا
بس اهم حاجة نحاول ان ميأثرش عاليناطبعا دة صعب شوية لان احنا مش منفصلين من اللى حوالينا
بس نحاول

وبعدين اكتبى اللى انتى عاوزة اللى عاجبة اهلا وسهلا واللى مش عجبة هنحترمة ونقولة ميخصكش

وربنا يوفقك و يقف معاكى

شكرا

Haytham Alsayes يقول...

ربنا يكرمك ان شاء الله
وذاكرى كويس ومتفكريش في ايه حاجة تهم البلد اليومين دول عشان عشان ميحصلش تشتيت وتهييس

اعملي معسكر مغلق علي رأى بتوع الكورة
وذاكري وربنا يكرم ان شاء الله

تحياتي

المغترب عن مصر بالقوة يقول...

السلام عليكم اختي الكريمه
اولا الف مبروك علي الحاجه اللي جبته

تصدقي انتي بقي انه نفسي امشي كده في شوارع مصر وانزل اتفرج علي المحلات وارخم علي الشباب اللي جوة المحلات وافاصل مع الشباب اللي زي العسل اللي جوة المحلات
بجد مصر دي حاجه حلوووووووووووة قوووووووي بناسها
واكتبي كل حاجه تحسي بعده انك هترتحي
وانا شاء الله موضوع مصر والجزائر ربنا هيحله من عنده

وانا شاء الله ربنا يكرمك ويوفقك في الامتحانات وتطلعي من المتوفقين

مصطفى يقول...

السلآم عليكم..

مدونة لذيذة..:)

تقبلوا مروري !

خواطر شابة يقول...

بالتوفيق ان شاء الله في الامتحانات بس فيه سؤال واحد محيرني " هو صحيح انتم كنتم مصدقين ان المنتخب الجزائري كسر الاوتوبيس و ضرب نفسه " والله انا باكلم جد انا استغربت ان مدونين كثر فوجئوا بهذا الموضوع الان بل حتى عمرو اديب قال انه لم يكن يعلم بينما الصور من كنال بلوس الفرنسية التي تثبث الواقعة كانت موجودة ومن أول يوم على النت لكل من أراد التأكد
تحياتي وودي

عصر الجنون يقول...

هايل جدا ^_^
انا كمان كنت ماشيه مذاكره فى الاوكيه وبعدين زى ماتقولى دماغى جابت بنزين يارب تتحل عقدتك وعقدتى
حكايه الجزائر <_< نو كومنتووو

beautiful mind يقول...

ربنا معاكي يارب
ركزي اهم حاجه في المذاكره
وان شاء الله ربنا هايكون معاكي
جميل جدا اننا نفضفض والاجمل اننا نلاقي المكان اللي نفضفض فيه
واجمل من دا كله
اننا نلاقي حد يسمعنا
واحنا موجودين هنا عشان كدا
تحياتي
وان شاء الله خير

سمع هوص (Abo 3li) يقول...

ههههههههههههه... مجنونة فعلا...
بطلي تأنيب في نفسك... وركزي كده ياريمو.. وبطلي دللع ويلا ذكري...

ربنا يوفقك..

أع ـقل مـ ج ـنـونــة يقول...

سامي ..

هي حالة عامة شكلها بتعمل ابادة نفسية جماعية :) :) :)

دعــواتك :)

أع ـقل مـ ج ـنـونــة يقول...

Haytham Alsayes

نفسي انا ف المعسكر المغلق دا :D

ربنا يستر باذن الله

دعواتك :)

أع ـقل مـ ج ـنـونــة يقول...

المغترب عن مصر بالقوة

الله يبارك فيك عقبالك :D
بجد شعور المشي والفرجة وان يعجبك حاجة فتلاقيها غالية اوي فتفاصل " انا مبعرفش افاصل فبكون كوميدي اوي .. لو حد قالي علي حاجة 100 ممكن اديله 200 :D "

ربنا يرجعك بالسلامة ان شاء الله :)

ويارب يحل موضوع مصر والجائر علي خير

ويسامحنا ويغفرلنا عموما <_<

دعواتك :)

أع ـقل مـ ج ـنـونــة يقول...

وحـدي

ميرسي اوى .. شرفتنى زيارتك :)

أع ـقل مـ ج ـنـونــة يقول...

خواطر شابة ..
ميرسي لدعائك اولا
ثانيا .. الاعتراف بالحق فضيلة
اه كنا مقتنعين ان مش احنا ولا حد فينا كسر الاتوبيس
اولا الاعلام كان مغطي علي كل حاجة
ثانيا للاسف مبنتفرجش علي قنوات فرنساوي <_<
هابئة اتكلم اكتر والله باذن الله في بوست منفصل .. لان الكلام كتير
وانا قولت جملة نختصر بيها الكلام --> احنا شعب ساذج ومضحوك علينا

^_^

أع ـقل مـ ج ـنـونــة يقول...

عصر الجنون

بنزين علي جاز علي عود كبريت
هايولعو فينا

الحقي اجري :D :D

نو كومنت برده ^_^

أع ـقل مـ ج ـنـونــة يقول...

beautiful mind

ربنا يخليك ميرسي علي كلامك
ودعــواتك دائمـــا :)

أع ـقل مـ ج ـنـونــة يقول...

سمع هوص (Abo 3li)

حاضر هابطل تأنيب في نفسي <_<

انت جاي تضحك هنا ولا ايه :@

برةةةةةة :@ <_>

ادعــي في صمت :D :D

سمع هوص (Abo 3li) يقول...

بتطرديني ياريمو؟؟؟
بقي كده؟؟؟؟
طب ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه...
وريني هتطرديني ازاي بقي.... وش بيطلع لسانه..

P A S H A يقول...

ربنا معاكي يا رب

:))

شدي حيلك

funky girl يقول...

ربنا يوفقك
و ان شاء الله تزاكري جامد الاسبوعين الفاضلين
ربنا معاكي
شدي حيلك يا قمر :)

MaNoO يقول...

اولا تكتبى اللى انتى عايزاه مهما حصل واللى مش عاجبه ميدخلش يقرا حاجات كتير وحشه ومسئولين الله يلعنهم وياخدهم نكرههم اه بس جبنا لبلدنا يزيد ومش عيب نحلم اننا اللى هنعدلها ننسى الموضوع دا قى اخد كتير من وقتنا والمشكله اننا اعتمدنا على شويه كدابين يجيبوا الاخبار اهتمى بالمذاكره وحسى دايما انها فى ايدك مهما عدى الوقت افرحى بكل لحظه هتحسى ان كل الحياه حلوه

ماجد العياطي يقول...

ياستي ربنا يوفقك ان شاء الله

ومستنيين البوست التاني

بس بعد الامتحانات مش عايزين

نعطلك

وفقك الله

Bent Men ElZman Da !! يقول...

انا بحس ان الشوبينج بيريح الحاله النفسيه كتير
يمكن انتى لما رجعتى بعد اللفه دى
حسيتى ان الوقت الحلو خلص ورجعت الحاله اللى كنتى فيها سيطرت عليكى من تانى عشان تعملى نفس اللى كنتى بتعمليه قبل ما تنزلى للشوبينج

من ناحيه مضحكوك علينا فا دى حقيقه واقعه لا مجال للشك فيها
ده احنا بقينا نكته وقربت تبقى بايخه :D
مستنيه البوست ده

ربنا معاكى يا جميله فى امتحاناتك
وتخلصيها على خير ان شاء الله
وترجعى بالسلامه :)

أع ـقل مـ ج ـنـونــة يقول...

لا يا ابو علي

مقدرش اطردك

دا انت صاحب مكان ياراجل

برة بئة بدال ما اولع ف المكان :@

:P

أع ـقل مـ ج ـنـونــة يقول...

بــاشــا & فانكي جيرل :

ميرسي ربنا يخليكووو ودعــواتكو بئة ^_^

أع ـقل مـ ج ـنـونــة يقول...

MaNoO

ميرسي مانو .. تسلم

للاسف المسئولين في بلدنا خلو منظرنا زي الزفت

كرهو الشعوب والدول فينا

وف الاخر نقول المصري بئة مكروه ليه !!!

دعواتك بئة ^_^

أع ـقل مـ ج ـنـونــة يقول...

ماجد العياطي

حمدالله ع السلامة من الغيبة الطويلة دي :)

ايون كدا دعواتك

وهحاول اصبر لبعد الامتحانات دي :D :D

بس مينفعش اسيب البلوج شهر وزيادة من غير حاجة كدا <_<

أع ـقل مـ ج ـنـونــة يقول...

بنت من الزمن دا

بجد منووووووووورة بعد غييييييبة ياقمر

عجبني تحليلك النفسي اوي ^_^

تقريبا عندك حق :)

وفعلا احنا بقينا نكتة وخلاص وصلنا للبواخه <_< :@

ميرسي ياقمر .. دعـــواتك بئة ياقمر ^_^

زهرة يقول...

مدونتك دمها زى السكر ..

إسمحى لى أتابع

وتورنينى يا أوختشى بردوا فى مدونى .. الكانتشين عندى بيعمل شاى بالمرامية ..تحفة^_^

مدونة متميزة

زهرة يقول...

اة نسيت إدعى لك ولنا كلنا .. أهىء أهىء

كلنا لها .. إن شاء الله الإمتحانات تعدى على الكل بخير وربنا يكرم الجميع

زهرة يقول...
أزال المؤلف هذا التعليق.
(ست* جنى* الحسن) يقول...

سلامو عليكو..
كلنا ساعات بنمر بحالات التوهان دى .
ربنا معاكى وييسرلك حالك.
لك تحياتى

أع ـقل مـ ج ـنـونــة يقول...

زهرة :)

نورتيني ياقمراية

وشرفتي المدونة بوجودك ويارب دايما اكون عند حسن ظنكو جميعا

ويارب دايما يكون في تواصل بينا

وبالنجاح والتوفيق للجميع يارب :)

أع ـقل مـ ج ـنـونــة يقول...

ست الحسن :)
جزاكي الله خيرا علي الدعاء وربنا يهدينا جميعا ويوفقنا
:)

ســـهــــر يقول...

شوفى يا ستى انا مقتنعه تماما ان الشوبينج بيعمل نوع خاص جدا من الفرحة والشعور بالبهجة

بس دة لو مش مستعدين نفرح وحضرتك كئيبة زى حالاتى هتتلاشى فرحتك بسرعه جدا

المهم انك تركزى فى المزاكرة يا قمر
ومن ناحية العقوبات اتصدمنا لان زاهر كان مهيئنا نفسيا انة محضر ملف واااااو والجزائر هتضر أأئة

وهو فى اية مش مضحوك علينا فية ؟

يختى بلا هم
ههههههههههههه

قومى زاكرى بقا :@

غير معرف يقول...

عاتى عاتى

اتكلمى وقولى كل اللى فى نفسك

مش عارفة ايه الحكاية
كل اما ادخل بلوج تفكرونى بالمذاكرة

اهىء اهىء اهىء اهىء


يلا ربنا يكرررمك يارب

ويرحمنا من الامتحانات دى

غير معرف يقول...

بصى مع احترامى لكتاباتك ورايك
بس مافيش حد بيعمل كده فى نفسه من فراغ صدقينى الروح غاليه
انتى ماتعرفيش دوافعه
ده واحد عنده اكتئاب يعنى مريض
يعنى عقله مش فيه
وايوا كل حاجه هانرميها ع الحكومه
لمااقل الحقوق مش قادرين ناخودها فى بلد مش فلحه غير تصرف فلوسنا فى المحافل الدوليه من باب الفشخره
لما بلد عماله تصرف فلوسنا ع الافلام والتمثيل والارف والسفاله
لما واحد يطلع يتنطط شويه ادام كاميرا وياخود ملاين وواحد غيره طلع عين اهله مذاكره وسهر ومصاريف ومش لاقى ملاليم يتجوز ويبقى بنى ادم
تبقى دى مهزله
بصى ماتحكميش على حد من وجهه نظرك واطلبى له الرحمه
الموت مش لعبه فااكيد هو ماكنش طالع يشنق نفسه عشان يسقفوا له شويه
ويقوله فندام اهه
الله اعلم بيه وربنا يرخمه
ده واحد حب بجد
انا معاكى انوا غلط بس بكررها ماحدش يعرف دوافعه
صدقينى عن تجربه انتى ماتعرفيش يعنى ايه يأس واكتئاب
ماتزعلش منى
بس ده رأى
تحياتى

أع ـقل مـ ج ـنـونــة يقول...

ســـهــــر ..

فعلا اكتشتفت الموضوع دا مؤخرا

يالا محدش بياكلها بالساهل :D :D

نورتي ياقمر وربنا مع الجميع

وربنا ياخد اللى بيضحكو علينا :D :D

أع ـقل مـ ج ـنـونــة يقول...

star in the sky


هههههههههه والله انتي عسل ياسمية

معلش هنروح من الامتحانات فين !!!!

هانت

كلها كام يوم واخرج من التعليم بكماشة :D :D

أع ـقل مـ ج ـنـونــة يقول...

الشـوكة الــنـاعـمـة

نورتيني ياقمر اولا

ثانيا .. ليا تعقيب علي كلامك بس

انك قولتي اني معرفش يعني ايه اكتئاب !!

انا تقريبا اكتر واحدة ف مصر مرت باكتئاب ^_^

ومريت بتجربة فاشلة كانت هتخليني افكر بنفس منطق الشاب المنتحر !

يعني عايشت حاجات زي كدا

وانا نوهت ف البوست اني مقصدش اتريق ولا استهتر بحد بئة بين ايدين ربنا

بس حتي المكتئب دا .. ليه علاج انه يفوق من غفلته وانه يلجأ لله !

المكتئبين بيتحاسبو اكيد عن افعالهم !!

انا مبتكلمش ف حد مات !

بس بتكلم في ناس ممكن تموت !

ممكن تنتحر

طب ليه ؟

من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان

وانا مقدرش اغير حاجة بايدي !

لكن عندي لسان اتكلم بيه .. وعندي قلب اضعف الايمان احس بيه:)

اتمني تكون وجهة نظري وضحت

نورتي ياقمر وتحياتي ليكي ^_^

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات