كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )



كان في بنوتة عندها أخ بيحب بنوتة تانية ..
بيحبها لدرجة العشق واكتر كمان
كان ناوي يطلع السما يجيب النجوم عشان خاطرها
كان عاوز في ظرف سنة او سنتين يكون نفسه بالحلال ان شالله بالشغل 24 ساعة عشانها
بالرغم من صغر سنه ! .. مكملش لسة العشرين
بس عاهد نفسه وطلب من ربنا يعينه انه في ظرف سنتين يقدر يكون نفسه

وهــوبا .. حصلت مشكلة .. خلت طريقه يقف شوية
مش عارف امتي هايقدر يمشي ويجاري اموره

مبقاش عارف يعمل ايه .. يسيب حبيبته اللى مستعدة تضحي عشانه وتستناه ؟
ولا يظلمها ويفضل معاها بعد ما حساباته اتلخبطت ومش عارف امتي هايقدر يكمل اللى نفسه فيه !

بكـي .. في حضن اخته
بكي بدموع شديدة كانت بتنزل زي البركان من عنيه في حضنها
وهو بيقولها .. بحبها .. مش هاقدر اعيش من غيرها .. وهي ممكن يحصلها حاجة من غيري
متعرفيش بتحبني اد ايه !
انهاردة دموعها في عنيها وكتماها وهي بتقويني وبتقولي اصبر ياحبيبي
هافضل معاك لاخر عمري
بس اوعي تسيبني
اوعي تفكر تعيش من غيري
انا هموت لو بعدت عنك !

كل دا بيحكيه في حضن اخته اللى بتسمعه وهي ساكته .. وشاركته في البكي
دموعهم اختلطو سوا

وسرحت البنوتة .. وافتكرت ..
الدنيا الصغيرة
 
افتكرت امبارح وهي بتحب واحد وظروفه مكنتش مستقرة ووالدتها ووالدها واخواتها ومنهم الاخ الولد الوحيد دا اللى اجبرها تسيبه
افتكرت كلامه وهو بيقولها دا حد ظروفه مش مضمونة .. روحي للي بيحبك وعاوزك ومستعد يعمل عشانك كل حاجة
افتكرت لما اتحايلت علي حبيبها وبكت عشان ميسيبهاش وانها هتستحمل اللى هايعمله فيها اهلها !
افتكرت دموعها وتعبها وجريها بين الدكاترة من بعد ما سابها
افتكرت يوم خطوبتها ويوم فرحها ويوم انفصالها وهي برده لسة فاكرة حبيبها اللي سابها .. واخوها اللي اقنعها .. وابوها اللى قالها ان في الجوازة دي راحتها ومستقبلها ..

الايام جريت واتحط اخوها ف نفس الموقف .. وطالب منها تقوله يعمل ايه !

مبقتش عارفة تقوله ايه .. اوعي تتخلي عنها عشان متضيعش بعدك زي ما انا ضعت بعده !
ولا تقوله اعمل زي حبيبي وسيبها وهي ونصيبها !
ولا تقوله ايه ولا ايه ولا ايه ؟

فاقت علي دموعه ورعشته لما التليفون رن ف جيبه .. لما شاف اسم حبيبته ..
قالها اقولها ايه قوليلي ؟

سابتله الاوضة وخرجت وهي غرقانه في دموعها اكتر منه !


38 CoMeNTaToOoOoZ:

Haytham Alsayes يقول...

السلام عليكم

بصي اقولك حاجة بصراحة الموضوع دة محير كتير جدا من الحبيبة بس الواحد يقول ايه كل شىء نصيب ومحدش عارف الخير فين ممكن ربنا يرزقها بواحد احسن منه او يرزقه بواحدة احسن منها
بصراحة ليا نظرية في الحكاية دى ممكن تختلفي معايا او تتفقي ان الحب ممكن يجي في فترة الخطوبة او البعد الجواز عشان الواحد ميحيرش نفسه كتير في بلد اساسا حالتها الاقتصادية ضاربة ومفيش شغل ولا حاجة خالص يعني امام اي شاب ودة في نظرى ان يفكر في الحب والجواز بس لما يكون نفسه صح وانا من انصار الفريق دة او يقضيها حب ويسيب نفسه علي كدة يبقي ولو كون نفسه وفي الاخر حبيبته عتروح لاول واحد جاهز

تحياتي

المغترب عن مصر بالقوة يقول...

والله انا بجد محتار اقول ايه بس بجد ربنا يصبرهما هما الاتنين
بس اللي اقدر اقوله انه لسه شاب صغير يقاوم نفسه علي قد ما يقدر ويبص لمستقبله وهي لو من نصيبه مفيش حاجه في الدنيا هتبعدهم عن بعض
وفي الاخير ادعي ليهم ربنا يجمعهم مع بعض وما يفرقهم ابدا

غير معرف يقول...

مش عارفة اقولك ايه !!
كل حاجة بالمعقول حلو .. عشان نبقا واضحين ..
يعني اذا ظروفه متقدرش تفتح بيت ولا تعمل اسرة لمدة طويلة .. وطبعا ربنا اعلم ممكن يحصل ايه كمان .. فدا يبقا صعب ..
كل شيء ليه حدود ودا رأي ..
هو لسا صغير ..
وتعرفي قصتك فيها من كتير قصص ..
موضوع الاخ اللي بيعمل زي الصخرة في جوازة اخته وبعدين يقوم يوقع في نفس القصة
سبحان الله بقا :)

قناه ايما يقول...

عايزه تشتغلى من البيت وتكون طريق مضمونه طيب عايزه تعرفى ايه نوع الشغل ده يبقى تعالى عندى فى المدونه

safa7_karmooz يقول...

ايون دلوقتى يعمل ايه سعادتك؟؟

مينفعش تعليقنا كده على فكرة :D

بنت مصر يقول...

دائن تدان

ان كانت ظروفه مسألة وقت وحتعدي فأكيد حبيبته ممكن تستناه

لكن لو ظروفه حتأثر حتأخر الارتباط لفترة طويلة فدي بأه ترجع لحبيبته ومدى حبها ليه ومدى تأثير أهلها عليها كمان لأن ده عامل مش بسيط

تقبلي مروري

ستيتة يقول...

المحب لا يرى الا حبه
المحب لا يقتنع بأن الأمور العملية شيء والحب شيء اخر
اللي بره الصورة بيشوف
ماهو مش بيحب
البنت اللي اتخطبت واتجوزت وافترقت ظلت ترمي بظلال فشلها على اهلها
وتظن ظن شبه جازم انها فشلت لأنها بعيد عن حبيبها
مع ان غيرها كتير كتير كتير اتجوزوا اللي بيحبوهم وفشلوا برضه
وعليه اسهل لها كتير ترمي على حد غير ذاتها
والجميل انها ترمي على اهلها فتقدر تجلدهم ولو بعيونها يوميا دون النهوض من كبوتها ومواصلة طريقها

لو ان قيس وليلي تزوجوا
وروميو وجوليت تزوجوا
ربما كنا قرأنا عنهم في صحف الحوادث
او لم نقرأ عنهم بالأساس
قصص النجاح لا تجذب الجمهور
اما قصص الأسى فهي الرائجة

Ramy يقول...

جميلة

انت هنا تقريبا بتحكى عنى مع فوارق بسيطة

السن مثلا وانا لسة محكتش لأختى

ههه

بس القصة جميلة ومعبرة بالتوفيق

شكرا

أع ـقل مـ ج ـنـونــة يقول...

Haytham Alsayes

هو موضوع محير فعلا اووي

وانا متفقة معاك في وجهة نظرك .. من كتر اللى بيحصل دلوقتي من تعب والم و 99 % من اللي بيحبو بعض يسيبو بعض

خلاص مبقاش في حاجة مضمونة ^_^

يبقي الاحسن save ur heart لحد ما يجي النصيب

:)

تحياتي ^_^

أع ـقل مـ ج ـنـونــة يقول...

المغترب

ميرسي ليك

بس دي

just a story

^_^

أع ـقل مـ ج ـنـونــة يقول...

يـ ألواناتك

المشكلة بقت مشكلة معظم الشباب دلوقتي اللي بيحصل معاهم نفس الاحداث

كل شئ فعلا بالمعقول كويس

في مرة ع البيدج بتاعة المدونة ع الفيس

ولد قال .. انا لما اجي اجوز اختي هاطلع عين اللي هايتجوزها .. لكن هادعي وهنقي لما اجي اتجوز اللى يكون خفيف عليا !!

أع ـقل مـ ج ـنـونــة يقول...

سفاح كرموووووز

ماهو دا بئة اللى سيباه ليكو

هتفتكرو الاخت هتساعده ؟

وهو نفسه هايعمل ايه .. هايكمل ولا هايسيب البنت ؟

ولو قرر يسيب البنت مش كدا بيتخلي عن حبه ؟

ولو البنت هي اللي سابته هتكون مبتحبوش ؟

اسئلة كتيرة بئة .. والنهاية مفتوحة .. كل واحد ودماغه

أع ـقل مـ ج ـنـونــة يقول...

بنت مصر --

ميرسي جدا لمرورك وحضورك :)

أع ـقل مـ ج ـنـونــة يقول...

ستيتة

لو ان قيس وليلي تزوجوا
وروميو وجوليت تزوجوا
ربما كنا قرأنا عنهم في صحف الحوادث
او لم نقرأ عنهم بالأساس
قصص النجاح لا تجذب الجمهور
اما قصص الأسى فهي الرائجة

ممممممممم دايما الحزن بينتصر ف الشهرة علي الفرح

متعرفيش ليه ؟ :|

أع ـقل مـ ج ـنـونــة يقول...

سامي

يمكن خد قصتك وقولت اعدل عليها شوية حبشتكانات :D

ههههههههه

نورتني ^_^

-_- يقول...

انا ماكونتش متوقع الموضوع ده ..
بجد ..
مبيحسش بالالم الا اللي عاش الالم
الايام بتجري و الزمن بيعيد نفسه ..

Ana keda يقول...

صح جدا الموقف ده وبيحصل
ومتعرفيش ليه بقا التناقض الففظيع ده
لما تبقى اخته حاجة ولما تبقى حبيبته حاجة تانية الاخ بيتصرف فى حاجة تانية يعنى نظرته لحبيبته بطريقة ونظرته لاخته لو حبت نظرة تانية
مش عافرة اقولك ايه بس مش ذنب حد ان ظروفه مش متظبطة يمكن كان بيتكلم من منطلق خوف عليها وعاوزلها الاحسن ومش تستنى بس لما تيجى المعادلة ليه هو بتبقى بحسابات تانية خاااالص
بس حلوة اوى
والبلوج عسول انا اول مرة اجى هنا

أع ـقل مـ ج ـنـونــة يقول...

شارم ..

التاريخ دائما وابدا بيعيد نفسه

^_^

أع ـقل مـ ج ـنـونــة يقول...

ماهو دايما كدا يا مروة

الناس دلوقتي بقت بترضي لغيرها اللى لا يمكن ترضاه لنفسها :D

نورتي المدونة ياقمر

ربنا يقومك بالسلامة يارب ويارب اشوفك دايما هنا ^_^

عايشه لنفسي يقول...

لفت الدنيا واتعادت القصه فعلا
ربنا يستر ويصلح الامور

أع ـقل مـ ج ـنـونــة يقول...

الدايرة لازم تلف وتلف وتلف يا ساسو

<_<

mohamed ghalia يقول...

فعلا دى قصة كل يوم
معاى حق الراجل المصرى يمكن فى حتة الأنانية دى
بس متهيألى الأجيال الجديدة بدأت تتخلص منها

وجدتها! اضحك بقى يقول...

بجد مش عارفة اقولك ايه
انا فعلا القصة دي اثرت فيا جدااا
وطريقتك ف الكتابة عجباني وعاجبني راي وفكرتك وفعلا عندك حق ف كل اللي قولتيه

♥♥ شذا ♥ الروح ♥♥ يقول...

مش غريبه ولا حاجه لانها حصلت معايا انا كمان
ربنا وحده قادر على كل شىء

عجبتنى مدونتك اسمحيلى اضيفها عندى

مودتى

أع ـقل مـ ج ـنـونــة يقول...

محمد غالية ..

تحياتي اولا ومبروك الكتاب ثانيا

ثالثا .. اتمني الاجيال الجديدة تقدر تتخلص من الفكرة دي

أع ـقل مـ ج ـنـونــة يقول...

وجدتها ..

دي مشكلة متكررة جدا

الحمدلله اني قدرت اوصل الفكرة وان اسلوبي عجبك

تحياتي ^_^

أع ـقل مـ ج ـنـونــة يقول...

شذا الروح ..

اكيد القصة اتكررت مع كتير

زي العنوان

قصة الامس .. وقصة اليوم .. وقصة غدا :)

تحياتي ويشرفني زيارتك :)

غير معرف يقول...

انا متأكدة اني رديت على ردك
بس عموما كنت بقولك معتقدش انه كلام الولد صحيح .. لان هيطب ومحدش هيسمي عليه ويوقع في شر اعماله :)

ماجد العياطي يقول...

انا اعرف ان فعلا مسألة الجواز دي رزق وقسمه ونصيب زي ما بنقول

وماحدش يعرف فين نصيبه ولا مع مين هيكمل حياته

المهم انه يستعين بالله ويستخير لان مهما كانت استشارة البشر لكن استخارة الله افضل

لازم نستخير ونستشير وانا رأي ان الموضوع لازم يتحسب بالعقل والتدبير في المال والاهل اللي هناسبهم

وربنا هو المعين

وفقكم الله

غير معرف يقول...

الموضوع صعب اوى
بس مهما حصل اوعى تخاليه يسيبها
ماتخاليهوش يسيبها عشان ماتضيعش زي اخته
وزيي انا وزى كل اللى حبوا بجد وبقوا بعدين لوحدهم

ghada mOhsen يقول...

إيييييه الحيره دي :( ...

بس أنا برأي إنها تواسي أخوها وتساعدوا .. لأن إللي صار صار وده نصيبها ...
يمكن يكون هو كان غلطان في حقها .. بس ماأجمل أن تعلمه درسا بمجرد الوقوف بجانبه لكي يعرف غلطه معها مسبقا ...

بجد تسلمي .. كتير حبيتها

... ;) ,,, ;) ...

MaNoO يقول...

هو الصح انها هتساعد اخوها واللى حصل نصيبها وكمان هيا اخته يعنى مش هتتمنى الا الخير بس تساعده بايه بقى الله اعلم انتى جبتى الموضوع مين تعرفى متوهنى من ساعه ما قرأت ومش عارف لا انا فعلا مش عارف

أع ـقل مـ ج ـنـونــة يقول...

يـا الواناتك .. :)

فعلا ربنا مش بيسيب حد وكما تدين تدان

ميرسي علي متابعتك ياقمر :)

أع ـقل مـ ج ـنـونــة يقول...

أ\ ماجد ..

هي قسمة ونصيب ف الأول والآخر ..

ولكن القصة هنا هدفها اظهار حكمة كما تدين تدان

وكما تفعل الامس سيفعل بك غدا

واننا بندور في دايرة والتاريخ بيعيد نفسه

تحياتي ..:)

أع ـقل مـ ج ـنـونــة يقول...

الشـوكة الــنـاعـمـة ..

ماهو دا الصراع .. ياتري هايسيبها ولا لاء

والمشكلة انها هي اللى تسيبه !

فـ الاخر سيناريو واحد نهايته مختلفة :)

تحياتي ^_^

أع ـقل مـ ج ـنـونــة يقول...

ghada mOhsen

ميرسي لرائيك وكلامك يا غادة

وياريت يتعلم البني آدم ^_^

أع ـقل مـ ج ـنـونــة يقول...

MaNoO

متوهش يا مانو

جبتها من اللي بيحصل ف الدنيا ^_^

ما انا قولت

سيناريو واحد ولكن مختلف النهايات :)

تحياتي :)

غير معرف يقول...

يعني انتي ما تفرقعيش وأحنا اللي نفرقع؟


ماشي ماشي

انجحي بس وبعدين نشوف

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات