كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )

وانا بذاكر التاريخ .. كتبت علي اسم مصر ..

ومكنش القصد منها اطلاقا التعقيد او السلبية ولا انكار انجازات مصر في العصر الحديث !

ولكن كان بين السطور كلام كتير .. قليل من فهمه

--> دلوقتي وأنا في آخر اسرة في تاريخ مصر الفرعونية " الاسرة 30 " .. ووقوعها للتاني مرة تحت الاحتلال الفارسي " ايران " ..

قريت جملة عجبتني اوي قالها الدكتور :

سياسة تفريغ الدولة من عقلها البشري !!

مكدبش عليكم ... كنت بقرأ الكلام بسرحان بعد قراري بان الاسرة دي هتتكروت " ال يعني جات عليها
" ..

بس لما قريت الجملة دي رجعت بالصفحة وقريت من الاول !

عرفت ان لما الفرس هاجموا مصر للمرة التانية علي التوازي


قال ديودور الصقلي :

انهم دمروا الاسوار - نهبوا كنوز المعابد - امتهنوا الديانة والمعتقدات = نقلو كل ذي معرفة إلي فارس !

يعني ايه الكلام دا بئة ؟


يعني نقلو كل الكنوز والاثار والكتب .. حتي الكهنة والحرفيين .. رحلوهم لـ إيران !؟

مش هما بس اللي عملو كدا .. لكن برده اثناء الغزو الاشوري الحديث والبابلي الحديث !

احم احم .. ما علينا .. بلا جعلصة كلام


المهم اني ربطت الكلام دا بالوضع الحالي في الوطن العربي عموما وفي مصر خصوصا


  • محاولة تضييق الخناق علي المتفوقين والبارعين عشان يرحلو برة وينجحو برة !

فـ الاخر مين اللي صرف ومين اللي مول .. ومين اللي هيستفاد اكتر !!

الاسم .. مصري او عربي .. لكن الاستفادة الاكبر للناس التانية !
آه فخر للعرب .. بس ياسلام لو كان نجاحهم دا كان جوة بلدهم كمان .. 
متخيلين الفرحة والفخر ؟

دا كدا اللي بيحصل دلوقتي اسمه ترحيل العقول البشرية

لكن تفريغ العقول دا له منهج تاني خالص


- قعدة الشباب ع القهاوي .. بعدهم عن الثقافة والقراية والمعرفة .. السجاير والحشيش والتهييس .. الفضائيات وقنوات هشك بشك ولو مكنتش انت تشخلعني مين هايشخلعني !!


سياسة جديدة مكنتش ايام الفرس


يعني دلوقتي في سياستين .. ترحيل العقول البشرية .. وتفريغ وتخريب بقايا العقول النصف بشرية !

والمشكلة ان دا بيحصل بايد حكامنا .. متعرفوش بئة بتحريض ايادي عاملة نفسها خفية ولا ايه ؟


مــآ علينا

استحملوني بئة .. شكلي هاطلع عنيكو وانا بذاكر

آه .. استنو شوفو القرار دا بمناسبة نية خنقكم بمذاكرتي ^_^
قرار رقم 1 لرئيسة جمهورية نفسها المدعوة ريمو ..

انه في هذا اليوم السبت في تمام الساعه الثامنة الا عشر دقائق .. اكتفت بمذاكرة التاريخ إلي هذا الحد ..

فيكفيها ويشرف الكلية والدكتور والطلبة والطالبات .. انها قامت بمذاكره الناحية التاريخية والسياسية ..


اما عن القرار رقم 2 ..


انه سوف يتم تأميم الجزء الحضاري
احم احم
اقصد تأجيل الجزء الحضاري الي ما قبيل الامتحانات والبركة في مزيكا " اسم المكتبة " وربنا يستر :D

اما عن القرار رقم 3 :

قررت أخد لمحة سريعة ومبتسرة " مش عارفة ايه مبتسرة دي " .. عن مادة فنون قبطية
إلي الحصول علي ورق أي لغة من اللغات الخنيقة " احم احم اقصد القديمة " اللي عندنا السنة دي

هذا واتمني لكل الطلبة والطالبات في كل الكليات والجامعات
وخصوصا الطالبات " انحيازا لبنات جنسي " .. المرتاحات الدحيحات والمقهورات الفاشلات ..
من معاميك كلبي بالتوفيك

12 CoMeNTaToOoOoZ:

الميكروباص يقول...

تكتفي بهذا القدر ازاي؟
ده الامتحانات خلاص على الابواب -على حسب ما اسمع يعني- أصلي من ساعة ما تخرجت وانا منقطع عن متابعة اخبار الامتحانات
انتي هاتيجي في الآخر وتكتفي بهذا القدر ولا ايه؟

دندنة قيثارة الوجد يقول...

السلام عليكم ورحمة الله وبركاته ..

تحياتي لك أختي في الله على فكرة

سياسة تفريغ الدولة من عقلها البشري !!

التي قرأتيها .. وأحيانا جملة واحدة تختر كل الحروف والكلمات والمعاني.

وفي الحقيقة أنا لم أعلم باسم مدونتك من قبل، لأن مدونتي جديدة وعندما اخترت الإسم اخترته بناء على هدف معين كان في ذهني واعتذر إن حدث لبس في الموضوع، لكن في النهاية أصبحنا مجنونتين .

تحياتي القلبية لك

أع ـقل مـ ج ـنـونــة يقول...

احلي حاجة ف الدنيا عالم اعقل مجانين
حبيبتي الاسم مش محتكر
ومكنتش انا اول اعقل مجنونه :D
واكيد انتي مش هتكوني اعقل مجنونه ^_^
نورتي يا دندنة ومبسوطة بيكي وبمدونتك وبأفكارك وباسلوبك واتمني التواصل دايمآ :)

sony2000 يقول...

bgad wahshany mooooooooooot
w sorry eny mosh bagy hena kter
bs begad elterm da s2b aker haga
eda2lyyyyyyyyyy:)

سمع هوص (Abo 3li) يقول...

هههههههههه... فكرتيني بايام الكلية... تصدقي عمري موصلت للاسرة التلاتين دي ابدااااا....

ربنا معاكي... الامتحانات علي الابواب..

ماجد العياطي يقول...

معلومه حلوه

وربنا يوفقك ياستي وبأذن الله تنجحي بتقوق

بس متسفريش بره

وفقك الله

مصطفى يقول...

:)

كثير من الروعة عندما يقرأ أحدنا ماحدث قديمًا ويربطه بالواقع..

أعانكم من يعين على (الإنطحانات) !

sal يقول...

انا اشك فى التاريخ اللى مكتوب عندك
؟؟؟؟؟
مش يمكن راحوا بمزاجهم ولا ارغوهم ولا حاجة....لما الواحد مايلاقيش فرصته فى بلده بيدور عليها هناك عندهم
وبيركب البحر ويموت كمان عشان
....خلاص انا مش مصدق التاريخ
الميه تكذب الغطاس
يعنى الذين يهاجرون .الان وفى هذا الزمان...هل هم مكرهين من الداخل او من الخارج

اممممممم

تحياتى

nigro يقول...

طب و عهد الله انت عجبتيني بكلامك ده و بكلامك في البوست اللي فات
بيعجبني أنا الناس اللي واخدة الدراسة للمعرفة مش لتحصيل مجاميع و شهادة و السلام
و كله في الطراوة يابا

مناهج التعليم في مصر مهما كانت عقيمة و مهما اتقال عليها كده فإحنا في الآخر اللي بنخليها كده و و بنزيد في كده
ممكن احنا نطوعها و نستوعبها بعقمها ده و نهاودها و ناخدها على قد عقلها و نطلع منها و لو حتى بجرعة ثقافة صغيرة تعمل عملية تفتيح للأقفال اللي بيحاولوا يقفلوا بيها عقولنا


سلامـُـه عليكم

دندنة قيثارة الوجد يقول...

غدا إن شاء الله سانزل التاج السُلطاني وأرجوا المشاركة به لأني كتبت في الإهداء وشكرا.

Ramy يقول...

على فكرة البوست جميل جدا بيقول حاجة الناس كلها عرفنها ومطنشنها

بس ربطك القديم بالجديد رائع

بالتوفيق و ربنا معاكى فى الأمتحانات

ودايما منغير امتحانات

سلام بقى اسيبك تذكرى (:

غير معرف يقول...



على فكرة البوست جميل جدا بيقول حاجة الناس كلها عرفنها ومطنشنها

بس ربطك القديم بالجديد رائع

بالتوفيق و ربنا معاكى فى الأمتحانات

ودايما منغير امتحانات

سلام بقى اسيبك تذكرى (:

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات