كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )

http://www.tgmacs.com/pp/img/up/original/1262218256.jpg

 
علي اسم مصر التاريخ يقدر يقول ماشاء
انا مصر عندي احب واجمل الاشياء


حبيت ابدأ بالجملة دي عشان دا اللى حساه

عاوزة اقول في البداية للي ميعرفش .. اني في كلية اثار الفرقة الرابعة " يعني إيسانس ياجماحة " .. قسم مصري

وبما اني قررت اذاكر من فترة .. ولسة منفذة فعليا تقريبا انهاردة !

قررت ابدأ بمذاكرة التاريخ

وبما اني اخر سنة يعني باخد اخر مرحلة من تاريخ مصر القديم " العصر المتأخر "

مسكت كتاب تاريخ مصر الفرعونية وانا بتفرج ع الغلاف وبقلب فيه !

وافتكرت بطريقة سريعة اللى خدته في التلت سنين ونص اللى فاتو !!

اولا .. لاقيت التاريخ بيعيد نفسه في حاجات كتيرة اوي !

ثانيا .. لاقيت المنحني التاريخي بدأ في التدهور من اواخر الدولة الحديثة .. تحديدا بعد رمسيس التاني .. ولحد دلوقتي في النازل مش شيفاه في الطالع خالص !!

افتكرت مصر .. الامبراطورية العظيمة اللى كانت بتمتد من اقصي الشمال لاقصي الجنوب .. ومن اقصي الشرق لاقصي الغرب !

افتكرت ملك العراق لما طلب من امنحتب التالت " ابو اخناتون " انه يجوزه مصرية من البيت الحاكم
 
فبعتله وهو متضايق " مبنجوزش بناتنا لغير مصريين "
 
فبعتله قاله بلاش جوزني واحدة من رعايا البيت الحاكم المصري 
 
بعتله بالرفض برده
 
بعتله تاني قاله طب جوزني واحدة من عامة الشعب .. ولا خدامة حتي
عاوز اتجوز مصرية ياجدع :D
 
بعتله رساله فيها لهجة شديدة اوي .. وقاله ان مفيش مصرية تخرج من بلدها عشان تتجوز واحد غير مصري .. ولو عاود الطلب تاني مش هايحصله كويس !!!
افتكرت رسايل حكام الشام لملوك مصر وهما بيقولوله :

انا كـالكلب تحت قدمي سيدي ! .. اقبل التراب تحت قدمي سيدي !!

افتكرت الرسايل اللي كانت بتتبعت للملوك المصريين من الممالك والامارات الاخري يطلبون من الملك المصري المساعدة .. او الاستنجاد .. او حتي اللجوء السياسي لعلمهم ان مصر محدش يقدر يهوب ناحيتها !!

يااااااااااااا الله .. ايه القوة والعظمة دي يامصر ؟

هوبا .. رمسيس التاني مات

حصل صراع وخلاف بين ولاده ع الحكم ومؤامرات واشتغالات ..

عادي ما بين كل فترة وفترة بيحصل الحاجات دي .. بس بترجع مصر تاني لقوتها وطبيعتها !!

لكن .. ايه دا ؟

السنة دي انا اتقهرت !!

ايه اللي حصلك يامصر ؟

المنحني التاريخي ف النازل كدا ليه

فين مكانة مصر ؟ بتروح فين ؟

ايه دا ...

لما كاهن مصري يروح يسافر لبنان عشان يجيب خشب يعمل بيه المركب المقدسة للاله امون اللي كانت كل الممالك بتقدسه لمجرد انه اله مصري !!

في طريقه يتسرق !! .. وهو معروف انه مصري ؟؟

ولما يروح لبنان حاكمها يسخر منه ومن الهه ويقوله معاك فلوس تاخد الخشب مش معاك متلزمنيش ؟

مصري بيتعامل كدا ؟؟؟؟؟؟؟

لما ملك مصري " سيا امون " في الاسرة الـ 21 يزوج ابنته للنبي سليمان !

عليه السلام .. نبي آه .. بس مش مصري !!

مكنش في مصرية بتتجوز اجنبي مهما كان

وبعدين الجواز مكنش في صالح الدين خالص ؟

دا كان لاسترضاء اليهود اللي كان حاكمهم في الوقت دا هو النبي سليمان

اممممممم

ايه دا كمان مصرررر احتلها قبائل ليبية وحكموها ؟

بعدها قبائل نوبية ؟ .. دا النوبة والسودان طول عمرهم تحت حكمك يامصر .. ايه اللي حصل ؟

والاشوريين " العراق " كمان .. وايران بعدها ؟

واليونان والرومان !!

كل دا بفتكره وانا ماسكة الكتاب اللي بقرأ في الفهرس بتاعه .. ولاقتني لا اراديا بقول كلام عمنا صلاح جاهين :

أحسنت في القول صحيح ياولد يامتنبي
جبت اللى جوة الفؤاد عن مصر متعبي
وحكمت بالعدل لكن بعضنا انظلموا !
يا أمة ضحكت من جهلها الامم
العلم كان عندنا من صغره متربي
لكن هاجر وعدي البحر متخبي
لما الايران هجموا ثم اليونان هجموا
ثم الرومان دمروا ثم التتار هدموا
ثم الجميع كل واحد جه مسح قدمه
علي اسم مصر !!


آآآآآه يامصر !!

ثم الجميع كل واحد جه مسح قدمه علي اسم مصر !!!

من الوقت دا لحد دلوقتي والمنحني في النازل يامصر ؟

كرامتك وكرامة ولادك في النازل يامصر

كل دا بسبب ايه ؟

بسبب ولادك في الاول

صارعو واتخانقو وانشغلو عن مصلحتك بمصلحتهم وبعرش مصر

لحد ماضاعت من ايديهم مصر

مابقت سجادة ادام شقة .. واللي داخل واللي خارج يمسح رجله فيها

ولادك يامصر وقت ما رضيو علي نفسهم المهانة .. والضعف والذل

زاد ذلهم .. وضعفهم .. وقلت كرامتهم

ياتري في امل يامصر ترجعلك كرامتك ؟ وكرامة ولادك ؟

ياتري في أمل المنحني يزيد بدال ماهو في النازل كدا ؟

معرفش يامصر

بس اللى اعرفه


اني علي اسم مصر بكتب الكلام دا من قلب جواه حب مصر
https://blogger.googleusercontent.com/img/b/R29vZ2xl/AVvXsEg-f5MNGOa-S74wg-m-8xa7u-1EreMSmD3IBL3j4gcGLNao1KBVZpP5xbFFhqE0qH-205lUoct6OE7JsKWokRP3ijSESS5H9bWIqlUhMK7KEwtCJoVZL5nzBE7y4B3-NFYv00gt87Ymnyba/s320/%D8%AD%D8%A8+%D9%85%D8%B5%D8%B13.jpg

17 CoMeNTaToOoOoZ:

ستيتة يقول...

عجبني البوست ده جوي جوي جوي يا بوي
يعني فريتي الفهرس بس طلعتي كل ده امال لو ذاكرتي ها تقولي ايه؟ :)
"بضحك معاكي وبطلع لساني وبقول عاااااااااااااااااا يالا السنة خلصت"

أع ـقل مـ ج ـنـونــة يقول...

هههههههههه
ياريت تخلص يا سوتيتة
بس والله جالي اكتئاب :(
يالا ربنا يعديها علي خير

خواطر شابة يقول...

خليك جدعة واكتبي لنا احداث تاريخية من اللي بتدرسيه خلي مداركنا تتوسع ففي التاريخ كنوز ودروس وعبر

كيكى عوووووو يقول...

ه رساله فيها لهجة شديدة اوي .. وقاله ان مفيش مصرية تخرج من بلدها عشان تتجوز واحد غير مصري .. ولو عاود الطلب تاني مش هايحصله كويس !!!
نفس الكلام الى بتقولة طنت عائشة عبد الهادى

Tarkieb يقول...

بس انا والله قريت ان رمسيس محاربش الحيثيين اصلا وانه لما التقى الجيشيين ولقو انهم ممكن يموتو بعض فاتفقو على انهم مايحاربو بعض وحلوها ودي وفضلو على موبيلات بقى وبعدها رمسيس فبرك الحكاية وقال انه انتصر وان الصحفيين بعدها قالو انه بطل الحرب والسلام وصاحب اول ضربة جوية (قوية يعني) ويقال انه اكتر ملك عاش في مصر عندك حق التاريخ بيعيد نفسه

أع ـقل مـ ج ـنـونــة يقول...

وانبي يا شابة يا اوختي
ناوية انزلكو شوية حاجات كدا بس اخلص السنة دي بإذن الله عشان مكتبهالكوش بلغة الكتاب :D

هاخلي البوساط احمدي :D

ان شاء الله في الاجازة في دماغي شوية حاجات هتعجبكو باذن الله .. قولو يارب :D

نورتيني ياقمرررررر

أع ـقل مـ ج ـنـونــة يقول...

كيكي

كومنتك خلاني بجد اضحك جامد وماما اتخضت وشتمتني :D

ولما قريت كومنتك قعدت تضحك هي كمان وقالتلي ربنا يسامح طنط خيشة دي :D

نورتي ياقمر

و .. عووووووووووو :P

أع ـقل مـ ج ـنـونــة يقول...

لا ياطاااااااااارق

رمسيس الثاني حارب الحيثين

انا واخداها في تاريخ مصر القديمة الدولة الحديثة وتاريخ شرق ادني الحيثيين

يعني واخداها سنتين وفي مادتين مختلفتين :D

حاربهم بس الحرب انتهت بمعاهدة سلام

وبانتصار الحيثيين .. لكن مصر لم تفقد قوتها برده كان ليها مكانتها عشان كدا تم عقد معاهدة السلام ورمسيس اتجوز واحدة منهم كمان عشان يدعم المعاهدة دي ^_^

نووورت

عايشه لنفسي يقول...

بصي باسنت اصدى ياريمو
انتى عارفانى انا خبرة في التاريخ
فبقولك ارمى المادى دى وعلي ضمانتى
مش هتيجى في الامتحان
ثانيا البلد دى من يومها موكوسه
كذاب ودزمه اللى قال ان البلد دى قامت لها قومه قبل كدة رمسيس واللى قبله من روض الفرج مش من مصر


بجد بوست جميل وملم بالتاريخ الفرعونى

سيبك انتى شئ جميل انك تأذى انسان
الواحد ينام وضميرة مرتاح

أع ـقل مـ ج ـنـونــة يقول...

ههههههههههههههه
اطلع برة يا دياسطتي

يخربيت التفاؤل
انتي عار ع البلد يا انتيختي :D

ربنا يريح ضميرك يختي

انهاردة بالذات بالاذي اللي عملتيه هترتاح يا مرنبتاح :D :D :D

sal يقول...

سيبك من التاريخ اليومين دول
كمللى الشوية اللى فاضلين
وبعدها تاريخ جغرافيا استاتيكا
لوغارتمات كله ماشى

مش وقته الزعل دلوقت

تحياتى

عايشه لنفسي يقول...

هههههههههههههههههههههههه
مرنبتاح نام وشبع نوم النهارده

nigro يقول...

حلو الكلام و حلو تعشيقه برائعة من روائع جاهين الخالدة
و عاجباني فكرة انك تسردي مقتطفات من التاريخ بالعامية علشان اللي زي حالاتي كده ما يوجعش دماغه بالترجمة
بس برضه فيه مواقف في التاريخ بيبقى وقعها أفضل لو اتسردت بالفصحى
زي مثلا رسالة إن مفيش مصرية تتجوز ولا مؤاخذة أجنبي دي
أعتقد انها لو كانت اتقالت بلغة الكتاب كانت هتبقى أشد

فيه جملة قرأتها زمان و مخيّشة في نافوخي تخييش ما بعده تخييش للدكتور محمد سعيد رمضان البوطي
بيقول : " إن التاريخ دائماً ليس ملكاً إلا للزمن الذي ولد به , لا يورث أمجاداً ولا انحطاطاً , و انما يورث شيئاً واحداً فقط ... هو العبرة "


يلللا سلام

أع ـقل مـ ج ـنـونــة يقول...

ههههههههه
مزاء الفول يامرنبتاح :D

أع ـقل مـ ج ـنـونــة يقول...

نيجرو
نووورت في البداية
انا مبحبش اتكلم او اذاكر تاريخ باللغة العربية الفصحي
لان في مصطلحات وجمل تخنق الصراحة :D

وبالنسبة للمقولة بتاعة امنحتب التالت انا مش فكراها عربي طبعا عشان انا بذاكرها بالاسلوب دا :D :D

جميلة الجملة اوي اللى قولتها

نورت بجد واتمني اشوفك معدي كتير من هنا ^_^

حـــــروف متــبعترة " عــمرو الشــايب يقول...

حلو اوي الربط التاريخي الى انتي عامله ده بجد كويس جدا و فعلا لو تاملنا لبضع ثواني سنرى ان التاريخ يدولر في حلقة مفرغة و يتكرر مرة اخرى
و لانملك غير اننا نقول
نجينا من المهالك ياااارب
حلو الكلام المجعلص الى فوق دة
نيااااااااااااااااه

Tears يقول...

لو دققتى ح تلاقى ان التاريخ بيعيد نفسه كل فترة

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات