كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )


نكــتة قريتها وعجبتني أوي !!
 

 
كان ياما كان .. واحد راح اتقدم لواحده  

ابوها لاقاه شاب كويس .. اتساهل معاه في كل شئ  

لدرجة انه خلي مهرها 2,5 جنيه !  

" متسألوش اشمعني يعني .. هو كدا "  

تم الزواج  

وبعد فترة من الزمن .. كل ما يصادف وجود " كانز بيبسي "  

يقول الزوج للزوجة :  

مهرك تمن علبة بيبسي !  

انتي وكانز البيبسي واحد  

أنتي خسرتيني اللي خسرته وانا بشتري الكانز دا !!  

ويناديها دايما بـ " يا كانز البيبسي "  

زهقت البنية ياعين أمها وراحت اشتكت لابوها  

وقالتله : أرخصتم مهري .. فـأرخص هو قدري !!  

فكر الأب شوية .. وطلب من الزوج انه يخلي مراته عنده ويجي بكرة هو اهله لانه عازمهم علي عزومة جامدة اوي !  

تاني يوم جه الزوج ومعاه اهله  

وهما ع السفرة .. لاقوها فاضية .. عليها كانز بيبسي واحد !!!  

استغرب الاهل !!  

ولكن الزوج ابتدا يحس بالملعوب  

زاد الاب علب البيبسي وخلاهم تلاتة  

وقاله : اخدتو بنتنا بكانز بيبسي .. ودلوقتي عاوزين نرجعها لينا بـ 3 !!  

طلع الزوج عنده دم واتكسف واتحرج جدا !!!  

واهله لسة مش فاهمين !  

فهمهم الاب وشرحلهم الموقف .. وغضبو جدا منه  

وقالوله : دا جزاء من أكرمك !!  

" ناس عندهم ضمير بصحيح .. مقالوش جوزها ويقول اللى هو عاوزه " 

  
قاله الاب : مرضتش اعمل زي معظم الناس ويسرت عليك زواجك .. لكن دلوقتي مش هاتاخد بنتي الا لما تدفع مهرها من الاول 30 الف جنيه !!  

وللاسف عشان بيحبها .. وافق ودفع  

ومن يومها وهو بيقولها  

يا مصنع البيبسي








 
دي نكتة .. لاقتها في اماكن كتيرة  

بس نكتة نرفزتني !!  

عشان دا الواقع دلوقتي  

ليه معظم الشباب مش بيقدرو التيسير اللى بيعمله اهل البنت ليه !  

فـ الاول بيفرحو .. ولكن بعد كدا  

" يافرحة ماتمت خدها الغراب وطار "  

تلاقي العرق الواطي طلع  

ويبتدي يذل  

ويحسسها انها رخيصة !  

ويحسسها اد ايه هي متساويش .. وانها اقل من اللى دفعه فيها !  

تلاقي اللي مش عاوز يتعب ويجيب شقة .. مايعيش ف حضن ابوه وامه .. وبالمرة اجيب خدامة ببلاش 
  
 
--> هايوفر تمن شقة .. شوية من مصارف الاكل والشرب .. صحة الست الوالدة .. زن السيد الوالد ..  

تلاقي اللي عشان يتجوز ياخد من ابوه وامه معظم مصاريف الزواج  

--> يكتفي بالمجهود مع ما يتيسر من المال الموجود معه وليس ما سوف يحاول كسبه !  

تلاقي عاوز البنت علي شروطه وبمزاجه .. ولو عاجبك يابنت الناس عاجبك مش عاجبك ابئي قابليني لو اتجوزتي  

--> علي اساس انت يامعفن احسن واحد ف الدنيا .. روح اتنيل  

الاجمد بئة .. تلاقي اللي يعمل من البحر طحينة وهو أخره يغمس فول  

--> نهارك بلاك مطين بطين .. غور ياض


 
ييييييييييه

في امثلة كتيرة اوي

وفـ الاخير .. تلاقي عدم التقدير .. وحب الاستسهال 
 

عشان كدا رخامة بئة وان شالله نعنس

  لآ للتسهيل مع أى بني ادم فـ بطاقته مكتوب عليها ذكر 

  عاوز يتجوز يكون اد الجواز ان شالله يتجوز فـ الاربعين


عاوزين رجالة يابشر كفاية ذكوووووووووووووووور 



تحديث × سؤال سألته فـ الكومنتات وعاوزة اجابة ليه من الشباب تحديدا
  
علي سبيل المثال ..
لو اتقدمتو لواحدة وطلع اهلها متساهلين جداااااااا معاكم 

هاتحسو بــإيه ؟

مش هتشكو اذا كان البنت دي فيها حاجة ومعيوبة !!


أشك .. ان محدش هايشك ؟ وهايقول يبقي فـي إنـــّا ؟

عارفين ليه ؟


عشان دا طبعكو

وكفاية كدا بئة
 
 O_o 

21 CoMeNTaToOoOoZ:

Unknown يقول...

احم احم
سلامو عليكو

صباح الخير يا كانز البيبسي
ههههههههه
اولا انا بعترض علي كلامك لاني مشفتش اي تسهيلات في جوازة
دلوقتي الراجل ابو البنت لو يطول يخلي الشاب يشحت عشان يتجوز هيعملها
شقة وشبكة ومقدم ومؤخر وقايمة
حاجة كده ممكن تتسمي افتري
وبعدين يا ست الكتكوتة
لما الراجل يتجوز في السن الاربعين
عشان يكون بقي راجل في نظرك
يبقي انتو مش هتتجوزو اصلا
وبعدين اللي يتجوز في الاربعين ده هيعمل ايه ؟؟؟؟؟
وامتي هيقدر يربي ولاده ويكبرهم
وطول الاربعين سنة دول هيقضيهم ازاي ؟؟؟
ده اسوأ حاجة في الدنيا هي المغالاة في امور الزواج دي
بجد حرام
بيعقدو الشباب وبيعنسو البنات

اعتقد دلوقتي بجد مش ممكن شاب يقدر يجوز نفسه خالص
هجيب منين شقة وشبكة ومهر والحاجات دي كلها
وانا لسه في اول حياتي
مهما كنت شغال ايه برضو صعب


راجعي نفسك
وكمان كام سنة هتقولي كلام غير ده

سلاااااااااام

راء يقول...

هههههههههههههههه

جمدة جدا وحلو تصرف الاب..بصراحة انا لسه مقهورة دراسياً وموصلتش للحدود الاجتماعية :)

سلامااااتي

أع ـقل مـ ج ـنـونــة يقول...

لا انا احتــــــج

في ابهات كتير بتسهل الجواز

وف الاخر الرجالة مبتقدرش وبتذل !!

ايه اللي يضمني اني اتجوز واحد ميقدرش اي شئ بعمله عشانه

وبعدين ان شالله اتجوز واحد " راجل " مش ذكر وبس

جواز يعني مسئولية ..

مش هايشيل حاجة ع الجاهز هو يعني

انتو بتتكلمو كدا عشان متتعبوش مش اكتر

لكن وقت ما تبقي اب في المستقبل .. ويجي لبنتك عريس

ورينا هتعمل ايه !! ^_^

أع ـقل مـ ج ـنـونــة يقول...

رضوي حبيبتي

ربنا يفك قهرتك ع خير يا اوختي

بدعيلك من معاميق قلبي :D

سلامات ياقمراية ^_^

سمع هوص (Abo 3li) يقول...

طب الاقيها كانز البيبسي دي وانا في الرايحة والجاية هقولها يا هايبر ماركت بحاله... هههههههههههههههههههه...

متزعليش مني... والله انتي بتقولي اي كلام... فين الابهات دووول ان شاء الله؟؟؟ انتي بتتكلمي عن مصر ولا عن دولة تانية...
تعرفي والله كلامك ده هوا المبوظ حالنا... انتو ليه شايفين ان التقدير المادي معناه الرجولة والتقدير والمحافظة علي البنت بعد الجوااز؟؟؟ ومتخيلين انه هوا التقدير الوحيد الموجود؟؟؟؟؟؟؟
طيب مهو ممكن الواحد يدفع كتييير وبعد كده يذلها انه اشتراها بفلوسه...

فكرتيني بابويا ايام جواااز اختي ... كان فاحت العريس... وانا بقوله حرام ياعم الحاج.. ابنك هيتنيل وهيبقي مكانه في يوما ما.... وهوا برضه نازل سلخ في الواااد....

just waiting يقول...

اهو انا كمان حاسه اني هتشل من الي بشوفه
بس تعرفي انا مش مع التساهل قوي بس كمان الشباب مطحون يعني مش نرخص المهر والشبكه والحاجات دي لدرجة التنازل عنهم لكن كمان مانحملهمش فوق طاقتهم ونرجع نقول المعاكسات والتحرش ذاد ليه

أع ـقل مـ ج ـنـونــة يقول...

يا ابو علــــــي

انا مبتكلمش علي تقدير مادي بس

ماهو يا ابو علي يخويا التقدير المعنوي في المجتمع الذكوري دا نادر جدااااااااااا

وبيزيد كمان لما بيكون المادي زي الزفت

انا شوفت واحد بيذل مراته عشان ابوها مسبلهاش ورث !!

شوفت واطينة اكتر من كدا !!

وبعدين احسن حاجة ايام الخطوبة المسكنة اللى بيكون فيها الشاب لحد ما بتدخل الولية البيت بيتحول بعيد عنك :D

اقولك ع حاجة :d

انا اتعودت ان الرجالة مبطلعش نفسهم غلطانة !

انا ف البيدج بتاعة المدونة من كام يوم كنت كاتبة جملة بتاع احلام مستغانمي


ما تعتقده هو كونه أراد اذلالها كى يضمن امتلاكها وربما ظن أن على الرجل اذا اراد الاحتفاظ بامرأة ان يوهمها انه فى أية لحظة يمكنه ان يتخلى عنها

اكتر من شاب دخلو يقولو اه

ما احنا لازم نحسسكو احنا هانبعد عنكو عشان تتعدلو !!

واحد يقول ما انا هاحب ازاي الا لما امتلكها !!

واحد تانى يقول ماهو لو معملناش كدا يبقي مش حب !!!!!!

هي دي العينة بتاعة الرجالة اللى احنا المفروض هنتجوز منها !!

يبقي لا معنوي .. ولا مادي ؟

واحد يستسهل كل شئ

ويكتفي بشوية حاجات والباقي علي بابا وماما واهل العروسة

وللمرة المليون انا مبقولش نعقد المواضيع

بس ع الاقل منسهلش زيادة عن اللزوووووووووم

في حدود تتحط محدش يتنازل عنها

أع ـقل مـ ج ـنـونــة يقول...

وايتينج

خير الامور الوسط انا عارفة ودا اللى بقوله وربنا

الاهم ميكونش في تسااااااااااااهل بالذاااااااات

وبعدين التحرش والمعاكسات زادت بسبب البعد عن الدين قبل مايكون الزواج !

أع ـقل مـ ج ـنـونــة يقول...

طيب سؤال للشباب

طيب بالله عليكو ياشباب
لو اتقدمتو لواحدة ولاقيتو اهلها متساهلين اوي معاكم
مش هتشكو اذا كان البنت دي فيها حاجة ومعيوبة !!
عارفين ليه ؟
عشان دا طبعكو

وكفاية كدا بئة :D

P A S H A يقول...

مســـاء الخيـــر

:)

أع ـقل مـ ج ـنـونــة يقول...

مسااااااااااااء النوووووووووووووووووور

ماجد العياطي يقول...

اختي العزيزه اعقل مجنونه

انا بعتذر اولا عن تقصيري في حق مدونتك الجميله

اللي انا من عشاقها

ثانيا النكته فعلا واقع واغلب النكت اللي زي دي

بتبقى واقع مر بيخرج في النكته

للاسف

اما بالنسبه للسؤال

اذا كان الناس اللي متساهلين معايا انا اعرفهم كويس

وعارف انهم كويسين يبقى ده طبع واصل فيهم

لكن اذا ماكنتش اعرفهم

ساعتها هفكر طبعا وهاسأل

زس مااي حد بيعمل

ومع الوقت كل شئ بيبان

والاستعجال بيبقى وحش لان دي حياة الواحد

والواحده بيعيشوها مره واحده

تدوينه جميله جدا

وفقك الله

sony2000 يقول...

بجد عندك حق فكل كلمه بتقوليها
بس حتي لو حبينا نتبع وصيه الرسول عليه افضل الصلاه والسلام عن حديث ليه ان لو جالكم حد ترضون دينه فذوجوه والا تكن فنته في الارض
دا المفروض اللي يحصل
بس تيجي تلاقي ايه بقي
كل واحد بيفكر بأسلوب مادي جدا جدا
الشكه بكام ..المهر بكام والجو ده كله
موش بيبصوا للي هيكمل مع البنت
اخلاقه دي عمله اذاي
هيراعي بنتهم فعلا ولا لا
مهو ممكن يكون معاه مال الدنيا كله ويدفع ذي ماالكل بيقول
بس تعالي بقي تشزفيه بيعاملها اذاي
يارب تكون الفكره وصلت:)

sal يقول...

هههههههه

الناس اللى مابتقدرش
ذى ناس واطية ومعندهاش اصل

ونصيحة لكل اب
خير الامور الوسط يسهل بس ما
يبقاش اهبل
دا الضنا غالى يا عاقلة

حلوة اوى منك
عايزين رجاله مش ذكووور

تحياتى وتقديرى

Tears يقول...

جميلة جدا قصة الكانز

أهم حاجة فى الناس الاخلاق و دى طبعا شىء نادر بس مضطرين نبحث عنه


تحياتي

أع ـقل مـ ج ـنـونــة يقول...

ماجد
حمدالله ع السلامة
وعودا حميدا
نورت النت كله وعالم التدوين خاصة بوجودك ورجوعك لينا بالسلامة

اكيد كلامك صح واحييك علي رائيك وردك الموضوعي :)

جزاك الله كل خير

أع ـقل مـ ج ـنـونــة يقول...

ياسوني صدقيني شوفت ناس كتير اتساهلو في حاجات كتيرة عشان بناتهم

وبنظرتهم ان الشاب كويس " ودا من برة "

طبقا للمثل اللى بيقول من برة هالا هالا ومن جوة يعلم الله :D

وبعد الجواز بيبان المستوووووور والمستخبي

ودا اللي مخليني مش عاوزة تساهل

بالعكس الاصول اصول وتتعمل لا الراجل يتنازل ولا البنت !

نورتيني ياقمراية

أع ـقل مـ ج ـنـونــة يقول...

sal

تماااااااااااااااام

خير الامووووووور الوسط

واه بئة عاوزين رجالة :D :D

حد عنه مانع :D

نووووووووووووووووورت ومتنساش الشاي برة :D

أع ـقل مـ ج ـنـونــة يقول...

Tears

مضطرين نبحث ونتأكد :|

نووووورتي ياقمر ^_^

الميكروباص يقول...

بما انك من بتوع التاريخ يبقى لازم تروحي للأستاذه "لقد خلقنا الله احرارا" على طووووول لأن التاريخ عندها حاجه مهمه جدا وبتدرسه كمان
http://bohaelsabah.blogspot.com/
حتى الصوره بتاعتها زي الصوره اللي عليها علم مصر اللي انتي حطاها في الموضوع
لدرجه اني لما شفت تحديث المدونات وضغطت على الصوره افتكرت الموضوع بتاعها او أنها غيرت امتداد اسم المدونه!!
تكونوش انتم الاتنين واحد؟

أع ـقل مـ ج ـنـونــة يقول...

لورنس العرب
التعليقات فوق الموضوع :D
انت علقت ف موضوع تاني بس ولا يهمك :D :D

لا احنا الاتنين مش واحد للاسف

بس ميرسي اوي ع المدونة الجميلة دي

بلف فيها بجد تحفة

جزاك الله كل خير

إرسال تعليق



WelCome To

~ A32l MaGNoNa ~

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات