كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )






مممممم 


اتكلم ولا متكلمش ؟


ماهو مفيش حاجة معينة اتكلم فيها

حاجات كتيرة منقطة نقط صغيرة فوق بعض عملوا جبل كبير بينزل عليه المطر بس مش عاوز يبقي مجرد تل !

حد فاهم حاجة ؟

انا مش عارفة ايه الجملة الغريبة اللى قولتها دي


اقولكو

انا كنت مبسوطة اوي الصبح

حاسة باحساس لذيذ كدا .. يمكن عشان الكبت والخنقة والهم المستخبي ورا ابتسامة صفرا بتفرح كل الناس ومبتفرحش صاحبتها .. طلع في مشي كتير .. وفلوس كتير :( 

اصلي انهاردة نزلت عملت " شوبينج " ^_^


صرفت القرشين اللى حيلتي

بس وانا مروحة كنت عاملة زي الاطفال المبسوطين بانهم جابو حاجة جديدة

لحد ما روحت .. فرجت ماما الحاجات اللى جبتها .. وبعد كدا حطيتهم تاني في شنطهم ومرمين جنبي اهم !

خلاص مش طايقة ابصلهم تاني O_o


والكبت اللى طلعته وانا بمشي وبدخل محلات اد كدا وبشتري وبتفرج وبضحك وبهزر وباكل الدوريتوس وبشرب الشويبس 

وحالة الانبساط اللى كان فيا وانا راكبة العربية انتهت !

انتهت زي ما كل حاجة حلوة بنتنتهي .. وكل حاجة وحشة برده بتنتهي !

************************


من الجدير بالذكر برده اني مدايقة جدا بسبب اني تأكدلي مؤخرا اننا شعب مضحوك علينا بالأوي ..

هاتكلم عن الموضوع دا ف بوست مستقل لو ربنا اداني عمر وصحة وعقل وفكر !

هاقول نبذة بس وسؤال !!

ايه شعوركو لما الفيفا اصدرت عقوبة علي مصر دون الجزائر !

وايه شعوركو لما رئيس اتحاد الكورة قال ان فعلا في مصريين ضربو الاتوبيس !

بالله عليكو .. مش حاسين ان مضحوك علينا فـ حاجة ؟

كفاية فتنة بئة .. مش عاوزة اشوف حد بيشتم جزائري 


كفاية يامسلمين يامحترمين يا اللي بتحبو ربنا .. اتقو الله

والكلام برده للجزائريين 

اصل لاموآخذة محدش بيحب بلده أدي --> آه البت وطنية اخر حاجة حد عنده اعتراض :@

كفاية .. هابئة اتكلم اكتر في بوست تاني وقت آخر ان شاء الله 


************************

حاجة كمان .. استحملوني ..

كنت ماشية ف المذاكرة زي الفل .. بس جالي عطل مفاجئ

مع حاجات طلعت موجودة ف المناهج والمقررات طلعت معرفهاش

اصل الاخت فاشلة وواخداها من منازلهم :@

بيجلها المنهج ف التليفون

هي حاجات بسيطة اي نعم .. بس برده حسيت اني وحشة اوي :(

مهما كانت ظروفي مكنش ينفع اهمل للدرجة دي في اهم واخر حاجة ممكن تنفعني في الزمن دا حتي لو كانت ورقة وهتتعلق :(

ياما ورق كتير اتاخد ف الحياة وف الاخر بيكون مجرد ورق

بس الورقة دي هتفرق معايا كتير بجد 

ربنا يستر ويسامحني ويغفرلي 

وارجع تاني الخمناشر يوم دولا اذاكرهم عدل

بس انهاردة ماليش مزاج :D




************************


حاجة اخيررررررررررررررة 


انا مكنتش حابة اتكلم تاني ف المدونة ف حاجة شخصية

بس قولت اتكلم بدال ما افرقع يعني ^_^

بلاش حد يدعي عليا
هــ اطلب


دعــــــــواتكم 



************************

امبارح وانا مروح
مادخلتش في شارعنا
ودخلت في شارع تاني
تهت .. بس شفت
شجر تاني
باب تاني
كلب تاني

بكرة وانا مروح
مش هاروح
وهاسيب نفسي
اتوه تــاني !!


حبة هـوا --> وليد طاهر


كان في بنوتة عندها أخ بيحب بنوتة تانية ..
بيحبها لدرجة العشق واكتر كمان
كان ناوي يطلع السما يجيب النجوم عشان خاطرها
كان عاوز في ظرف سنة او سنتين يكون نفسه بالحلال ان شالله بالشغل 24 ساعة عشانها
بالرغم من صغر سنه ! .. مكملش لسة العشرين
بس عاهد نفسه وطلب من ربنا يعينه انه في ظرف سنتين يقدر يكون نفسه

وهــوبا .. حصلت مشكلة .. خلت طريقه يقف شوية
مش عارف امتي هايقدر يمشي ويجاري اموره

مبقاش عارف يعمل ايه .. يسيب حبيبته اللى مستعدة تضحي عشانه وتستناه ؟
ولا يظلمها ويفضل معاها بعد ما حساباته اتلخبطت ومش عارف امتي هايقدر يكمل اللى نفسه فيه !

بكـي .. في حضن اخته
بكي بدموع شديدة كانت بتنزل زي البركان من عنيه في حضنها
وهو بيقولها .. بحبها .. مش هاقدر اعيش من غيرها .. وهي ممكن يحصلها حاجة من غيري
متعرفيش بتحبني اد ايه !
انهاردة دموعها في عنيها وكتماها وهي بتقويني وبتقولي اصبر ياحبيبي
هافضل معاك لاخر عمري
بس اوعي تسيبني
اوعي تفكر تعيش من غيري
انا هموت لو بعدت عنك !

كل دا بيحكيه في حضن اخته اللى بتسمعه وهي ساكته .. وشاركته في البكي
دموعهم اختلطو سوا

وسرحت البنوتة .. وافتكرت ..
الدنيا الصغيرة
 
افتكرت امبارح وهي بتحب واحد وظروفه مكنتش مستقرة ووالدتها ووالدها واخواتها ومنهم الاخ الولد الوحيد دا اللى اجبرها تسيبه
افتكرت كلامه وهو بيقولها دا حد ظروفه مش مضمونة .. روحي للي بيحبك وعاوزك ومستعد يعمل عشانك كل حاجة
افتكرت لما اتحايلت علي حبيبها وبكت عشان ميسيبهاش وانها هتستحمل اللى هايعمله فيها اهلها !
افتكرت دموعها وتعبها وجريها بين الدكاترة من بعد ما سابها
افتكرت يوم خطوبتها ويوم فرحها ويوم انفصالها وهي برده لسة فاكرة حبيبها اللي سابها .. واخوها اللي اقنعها .. وابوها اللى قالها ان في الجوازة دي راحتها ومستقبلها ..

الايام جريت واتحط اخوها ف نفس الموقف .. وطالب منها تقوله يعمل ايه !

مبقتش عارفة تقوله ايه .. اوعي تتخلي عنها عشان متضيعش بعدك زي ما انا ضعت بعده !
ولا تقوله اعمل زي حبيبي وسيبها وهي ونصيبها !
ولا تقوله ايه ولا ايه ولا ايه ؟

فاقت علي دموعه ورعشته لما التليفون رن ف جيبه .. لما شاف اسم حبيبته ..
قالها اقولها ايه قوليلي ؟

سابتله الاوضة وخرجت وهي غرقانه في دموعها اكتر منه !




https://blogger.googleusercontent.com/img/b/R29vZ2xl/AVvXsEgTPOEBe_NrVLvTzrGgbS03OYS7RW0OtErUFOPBs4RPwkO2tRpnS73z9tHWRQzy8qNeLC8ViFkwVeD_1VPvx95Y0SqUbE-f26FiwTYhVhEUD2vKUkvXaWdGcDcK9qnxVRZAxtg4Sk4wS14/s400/%D8%B1%D8%B3%D8%A7%D9%84%D8%A9.gif

قبل ما اوريكو الرساله دي 

حــابة بس اتكلم في كذا نقطة

  • من اول ما بدأت في التدوين .. وانا في فكرة نفسي اكتب عنها .. وخصوصا بعد ما شوفت بوست معين في مدونة بنت من الزمن دا اللي غايبة عننا بقالها كتير ولعل المانع خير

دا البوست .. حبيبى....فى ستين داهيه .. 

منكرش حبيت البوست جدا والكلام جدا واتخيلت الحالة دي وكان نفسي اكتب عنها بصورة كوميدية مستفزة برده

لكن كانت قدرتي علي الكتابة ضايعة في الفترة دي .. وتحديدا بقالي سنة مش بعرف اكتب رباعية حتي :D .. 
  • من فترة واثناء تخاريفي قبل النوم .. لاحظت ان بتجيلي افكار عبقرية جدا قبل ما انام مباشرة .. 

وطبعا بصحي من النوم كله بيتبخر وبيتنسي

لحد اليوم اللي جه في دماغي الكلمات اللى هتشوفوها بعد شوية

وعشان الحقها قبل ماتطير .. كتبتها ع الموبايل .. ومكنتش ناوية احطها في اي حتة ولا اوريها لاي حد

مش عارفة ليه .. بس قولت لان الكلام ممكن يتفهم غلط اذ ربما !!!

بس انهاردة اصحابي اناتيخي شجعوني انزلها .. ومطلوب انهم يحموني لو اتهدر دمي :D 
  • المهم وانا طولت ف المقدمة كدا ..

الكلمات هتشوفوها دلوقتي .. هي كلمات مستفزة شوية ..

بس .. لا اقصد بها أحد .. لا اقصد بها أحد .. لا أقصد بها احد .. 

كررتها 3 مرات اهو .. عشان محدش يفهم غلط .. ومحدش يقولي انتي تقصدي مين بالكلام دا ..

حـــــالة شوفتها كتير ادامي وحبيت اعبر عنها بطريقتي الخـــــــــاصة 

كفاية مقدمات ..

استعدو ..

اللي عنده الضغط او سكر او حتي صداع .. والمخنوق والمكتئب .. خصوصا الرجال الرجال .. او حتي الرجال الذكور ..

.. بلاش تشوفو الكلام دا حفاظا علي صحتكم الغالية .. 


تفتكر ندمانة
علي حبك ندمانة ؟
أنا بس زعلانة
ع وقتي اللي ضاع معاك
بس خلاص ..
همسح من تاريخي حتي ذكراك 

ماهو انت ماتستاهل تتحب
انت اخرك بالشوز تتلب
مش عارفة ازاي اتهفيت في عقلبي
وحطيتك انت في القلب

بفكر .. نفسي اوصل
علي ايه انا حبيتك ؟
كنت فاكرة نفسي اعقل
من اني لقلبي انا اديلك 

لا لاقيت فيك جد ولا عقل ولا طموح
ياشيخ روح
بص لنفسك في مرايتك
اخلع عبايتك
هتلاقي كدب وسوء وخداع

عرفت ليه انا قلبي باع ؟
هاقولك ليه 

عشان انت ملكش امان
كلامك سهل كأنه لبان
اجيبلك ميت شاهد عيان !
هتنكر .. ما انا عارفاك جبان 

اقولك تاني من دا كلام ؟
لاء .. انا عارفاك مريض اوهام
الجد عندك هزار ، احلام ! ..
اقولك .. روح اتغطي ونام

يا اتفه مخاليق الكون
غور امشي ما انت مش مجنون
دا عقلك تقريبا مرهون
شغال بس في الهيافات 

روح اعرف يعني ايه راجل
وحاول ربنا تعامل
دي نصيحة من واحدة بتحاول
آهــي تجامل

اظن كفاية بئة تجريح
انا كلامي كله صريح
مقصدش بيه حد بعينه
ولا حتي بالتلميح

فــاصل من المذاكرة " مع اني ميتحسبش اني ذاكرت انهاردة اساسان "

.. وسنواصل قريبا

سمعتها فـ عجبتني فـ هارخم عليكو وتقروا كلماتها الجامدة
---------------

اسأل روحك
اسأل قلبك قبل ماتسأل ايه غيرنى

انا غيرنى عذابى فى حبك بعد ما كان املى مصبرنى

غدرك بيا اثر فيا

واتغيرت شويه شويه اتغيرت ومش بأيديا

وبديت اطوى حنينى اليك واكره ضعفى وصبرى عليك

واخترت ابعد وعرفت اعند

حتى الهجر قدرت عليه شوف القسوه بتعمل ايه

كنت زمان بالاقيك بحنانى بحر محبه وبر امان

كنت باحس ان انت زمانى ويومى وبكره وبعده كمان

كنت باشوفك بعيون حبى وانت بعيد أو انت بقربى

اقرب من بسمتى لشفايفى اقرب من احساسى لقلبى

بعد الود اللى راعيتهولك بعد الحب اللى وهبتهولك


غدرك بيه اثر فيا

واتغيرت شويه شويه اتغيرت ومش بأيديا

انا مانسيتش الحب وعهده ولا ايامه ولا لياليه

اما ان كان عالحب لوحده من غير ظلمك اهلا بيه

دأنا حيرنى هواك وانا علشان انساك

بابعد عن كل مكان رحته ولو مره معاك

واهرب من اقرب ناس يعرفوا قصتى وياك

وبغير اى كلام بيجيب سيره لذكراك

وصلتنى للحال ده بأيديك بعد ما كنت روحى فى ايديك

سيبتك من غير حتى ما افكر حاقدر اسيبك او مش حاقدر


واخترت ابعد وعرفت اعند

حتى الهجر قدرت عليه شوف القسوه بتعمل ايه

اسال روحك اسال قلبك قبل ده كله اتغيروا ليه

انا غيرنى عذابي فى حبك لكن انت غيرك ايه

هو حنانى عليك قساك حتى عليا

ولا رضايا عليك قساك حتى عليا

ولا رضايا كان خلاك تلعب بيا

ولا تسامح روحى معاك غرك فيا


انا يا حبيبى صحيح باتسامح الا فى عزه نفسى وحبى

وما يفيض بى ما عرف اصالح واعرف اجي كتير على قلبى

غدرك بيه اثر فيا

واتغيرت شويه شويه اتغيرت ومش بأيديا

وبديت اطوى حنينى اليك واكره ضعفى وصبرى عليك

واخترت ابعد وعرفت اعند حتى الهجر قدرت عليه

وانت ياعينى لو فى مكانى كنت حاتعمل غير كده ايه

اسأل روحك

---------------

مع تحيات الست

اثناء تقليبي في صفحات الانترنت واسع المجال

لفت نظري حوار مع الفنان محمد صبحي

واللي سمعت الكلام اللى في الحوار دا قبل كدا في احدي الحوارات التليفزيونية ليه

المهم .. بيقول انه اثناء اختياره لاطفال مسلسل ونيس الجزء السادس

سأل عدد كبير من الاطفال .. مين هو رئيس مصر ؟

معرفوش !


ولما قالهم مين هو حسني مبارك ؟

قالوله لعيب كورة


افتكرت وقتها اني ضحكت من الصدمة

وجريت علي اختي الصغيرة .. " سلمي 9 سنين " ..

وسألتها تعرفي مين رئيس مصر ياسلمي

قالتلي مبارك

اخدت نفس عميق


وقولت لسة في ولادك خير يامصر

ماما لحقتها بسؤال تاني

طيب مين مرات الريس ياسلمي

قالت رزان 
 

 
نظرة تتنيحة زي الفل نتيجة الصدمة

مصحوبة بـ صمت تام لمدة دقائق معدودة

كان نتيجتها استغراب وازبهلال البنية الغلبانة 
 

 
بعدها حليت الموقف بـ إني ضحكت وفهمتها ان رزان دي بتاعة ديل اور نو ديل

لكن مرات الريس اسمها سووووزاااااااان

اللي اسمها بيكون علي القصص اللى بجيبهالك يا ست سلمي

--- انتهي ---

مرت الايام وامبارح كانت لابسة النضارة الشمس بتاعة بابا

فـ بقولها طه حسين يا اخواتي

قالتلى مين طه حسين دا

قعدت افهمها مين طه حسين

اه حسيت اني بتحامل علي طفلة لسة 9 سنين لما اكون عاوزاها تعرف طه حسين ونجيب محفوظ ومصطفي محمود

بس قولت افهمها وخلاص حاجة للزمن

وافتكرت حاجة ..

احنا ليه مبنحاولش نفهم اطفالنا من صغرهم ونعرفهم تاريخ بلدهم ورموزها وشخصياتها المختلفة قديمة وجديدة ؟

عشان يقدرو يعرفو مين اللي بنو البلد بالفكر .. والسياسة .. والفن ..

ومين اللى هدها بنفس الوسائل !

بالمناسبة ..

ادعوا لسلمي بالشفاء لأنها تعبانة شوية وتعبها مسبب قلق للبيت كله بما انها آخر العنقود وروح قلب الكل
 

اتدبست في تـــاج .. واول مرة اجرب الموضوع دا 

تعـــالو الأول نشوف ايه هو التاج دا

التاج السُـلطاني  


قوانين التاج السُلطاني كالآتي:
 
  • اذكر اسم من طلب منك حل هذا الواجب.
  • اذكر القوانين المتعلقة بهذا الواجب.
  • تحدث عن ستة أسرار قد لا يكتشفها من يقابلك للمرة الأولى.
  • حّول هذا الواجب إلى ستة مدونين، واذكر أسماءهم مع روابط مدوناتهم في موضوعك.
  • اترك تعليقًا في مدونة من حّولت الواجب عليهم؛ ليعلموا عن هذا الواجب.

 

  • اللي دبستني في التـ،،ــاج دا ..

غاليتي وعزيزتي دندنة قيثارة الوجد


    • القوانين مذكورة فوق ^_^
    • اسراري اللي محدش يعرفها من المرة الأولــي 

    احم احم .. 

    هما تقريبا كتير ..
    فـ أنا أحيانا بكون بئر اسرار وعشان اتفهم محتاجة جلسات ^_^

    السر الأول .. 

    اني حد فريش أوي ومش شايل للدنيا هم ..
    مع ان ممكن يطبقو عليا اغنية حمادة هلال " شايل في قلبي جراح تكفي الكون دا كله " 
    .. بس من النوع اللي بيحب يبان كدا

    السر الثاني .. 

    اظهر برده للناس باني اجتماعية جدا .. وانا بطبعي اعشق لحظات الوحدة 

    السر الثالث ..

    اني بعشق القراية ..
    وبشوف فيها الوسيلة المثلي للخروج من اي حالة نفسية سيئة 

    السر الرابع ..
     
    اني طبع النكد غالب عندي " جوايا " ..
     بالرغم اني اظهر للناس باني اكبر مهرجة ^_^

    السر الخامس ..
     
    مخلصة جدا لمن اشعر انه يستحق .. وبعد اختبارات ومواقف كتيرة ..
     وللاسف بغدر باللي مش يستحق برده بعد اختبارات 

    مقصدش الغدر الغدر ..
    بس يعني بمسحه من حياتي باستيكة واذ فجأة أو علي موقف هايف  <_<

    السر السادس وليس الأخير ..
     
    عبيطة جدا ، مع اني ابان سوسة :D

    مش بعرف اركز ف الحاجة واستسوس من المرة الأولي ..
    دايما بقدم حسن النية لحد ما بستكشف الأحوال ..
    وبعد كدا تبدأ مرحلة التسويس بئة 

    وبرده من العبط اني بيتضحك عليا بكلمتين ..
    بس لما بيقفل المخ الصعيدي .. اجاركم الله 

    وبرده احيانا بيتضحك عليا بعد ما المخ الصعيدي بيتقفل :D :D

    -------------

    لازم ادبس 6 معايا .. محتارة جدا فيهم !
    - ابو علي سمع هوص 
    " هو كدا بئة لاقيت مدونتك ادامي قولت ابتدي بيك "

    - مدونة الشط التاني من نفسي 
    " انتيختي بئة اموه "

    - فكك مني .. كيكي عوووووو ..
    " نياهاها عووو "

    - بـهذا حدّثتني نفسي ..
    " معلش بئة عربون تعارف المدونات علي بعضيها "

    - يـ ألوناتك ! 
    " الفلسطينية الجميلة اتدبسي بئة ياحلوة ^_^ "

    - مش عارفة....بس نفسي اعرف  
    .. دكتورة ستيتة حسب الله الحمش .. " احبك في الله ^_^ "

     

    ج ــآري تنفيـــذ الشرط الأخير 








    واحدة كبيرة في السن .. الهم كرمش جلد وشها

    وغمق بشرتها ..وزرق جتتها

    بكت كأنها بتاخد علقة سخنة .. علقة الزمن ادهالها

    نظرة قوة وصرامة بعد لحظة دموع وقالت :

    مصر كانت أمي .. دلوقتي بقت بنتي

    بصرف عليها اكتر مابصرف علي عيالس !!


    اعذروني علي عدم الرد في البوستين اللي فاتو ..

    نفسيا ومعنويا ونتيا " احوال النت " ودراسيا وصحيا مش متظبطة خالص

    فـ دعـــوآتــكم


    وانا بذاكر التاريخ .. كتبت علي اسم مصر ..

    ومكنش القصد منها اطلاقا التعقيد او السلبية ولا انكار انجازات مصر في العصر الحديث !

    ولكن كان بين السطور كلام كتير .. قليل من فهمه

    --> دلوقتي وأنا في آخر اسرة في تاريخ مصر الفرعونية " الاسرة 30 " .. ووقوعها للتاني مرة تحت الاحتلال الفارسي " ايران " ..

    قريت جملة عجبتني اوي قالها الدكتور :

    سياسة تفريغ الدولة من عقلها البشري !!

    مكدبش عليكم ... كنت بقرأ الكلام بسرحان بعد قراري بان الاسرة دي هتتكروت " ال يعني جات عليها
    " ..

    بس لما قريت الجملة دي رجعت بالصفحة وقريت من الاول !

    عرفت ان لما الفرس هاجموا مصر للمرة التانية علي التوازي


    قال ديودور الصقلي :

    انهم دمروا الاسوار - نهبوا كنوز المعابد - امتهنوا الديانة والمعتقدات = نقلو كل ذي معرفة إلي فارس !

    يعني ايه الكلام دا بئة ؟


    يعني نقلو كل الكنوز والاثار والكتب .. حتي الكهنة والحرفيين .. رحلوهم لـ إيران !؟

    مش هما بس اللي عملو كدا .. لكن برده اثناء الغزو الاشوري الحديث والبابلي الحديث !

    احم احم .. ما علينا .. بلا جعلصة كلام


    المهم اني ربطت الكلام دا بالوضع الحالي في الوطن العربي عموما وفي مصر خصوصا


    • محاولة تضييق الخناق علي المتفوقين والبارعين عشان يرحلو برة وينجحو برة !

    فـ الاخر مين اللي صرف ومين اللي مول .. ومين اللي هيستفاد اكتر !!

    الاسم .. مصري او عربي .. لكن الاستفادة الاكبر للناس التانية !
    آه فخر للعرب .. بس ياسلام لو كان نجاحهم دا كان جوة بلدهم كمان .. 
    متخيلين الفرحة والفخر ؟

    دا كدا اللي بيحصل دلوقتي اسمه ترحيل العقول البشرية

    لكن تفريغ العقول دا له منهج تاني خالص


    - قعدة الشباب ع القهاوي .. بعدهم عن الثقافة والقراية والمعرفة .. السجاير والحشيش والتهييس .. الفضائيات وقنوات هشك بشك ولو مكنتش انت تشخلعني مين هايشخلعني !!


    سياسة جديدة مكنتش ايام الفرس


    يعني دلوقتي في سياستين .. ترحيل العقول البشرية .. وتفريغ وتخريب بقايا العقول النصف بشرية !

    والمشكلة ان دا بيحصل بايد حكامنا .. متعرفوش بئة بتحريض ايادي عاملة نفسها خفية ولا ايه ؟


    مــآ علينا

    استحملوني بئة .. شكلي هاطلع عنيكو وانا بذاكر

    آه .. استنو شوفو القرار دا بمناسبة نية خنقكم بمذاكرتي ^_^
    قرار رقم 1 لرئيسة جمهورية نفسها المدعوة ريمو ..

    انه في هذا اليوم السبت في تمام الساعه الثامنة الا عشر دقائق .. اكتفت بمذاكرة التاريخ إلي هذا الحد ..

    فيكفيها ويشرف الكلية والدكتور والطلبة والطالبات .. انها قامت بمذاكره الناحية التاريخية والسياسية ..


    اما عن القرار رقم 2 ..


    انه سوف يتم تأميم الجزء الحضاري
    احم احم
    اقصد تأجيل الجزء الحضاري الي ما قبيل الامتحانات والبركة في مزيكا " اسم المكتبة " وربنا يستر :D

    اما عن القرار رقم 3 :

    قررت أخد لمحة سريعة ومبتسرة " مش عارفة ايه مبتسرة دي " .. عن مادة فنون قبطية
    إلي الحصول علي ورق أي لغة من اللغات الخنيقة " احم احم اقصد القديمة " اللي عندنا السنة دي

    هذا واتمني لكل الطلبة والطالبات في كل الكليات والجامعات
    وخصوصا الطالبات " انحيازا لبنات جنسي " .. المرتاحات الدحيحات والمقهورات الفاشلات ..
    من معاميك كلبي بالتوفيك
    http://www.tgmacs.com/pp/img/up/original/1262218256.jpg

     
    علي اسم مصر التاريخ يقدر يقول ماشاء
    انا مصر عندي احب واجمل الاشياء


    حبيت ابدأ بالجملة دي عشان دا اللى حساه

    عاوزة اقول في البداية للي ميعرفش .. اني في كلية اثار الفرقة الرابعة " يعني إيسانس ياجماحة " .. قسم مصري

    وبما اني قررت اذاكر من فترة .. ولسة منفذة فعليا تقريبا انهاردة !

    قررت ابدأ بمذاكرة التاريخ

    وبما اني اخر سنة يعني باخد اخر مرحلة من تاريخ مصر القديم " العصر المتأخر "

    مسكت كتاب تاريخ مصر الفرعونية وانا بتفرج ع الغلاف وبقلب فيه !

    وافتكرت بطريقة سريعة اللى خدته في التلت سنين ونص اللى فاتو !!

    اولا .. لاقيت التاريخ بيعيد نفسه في حاجات كتيرة اوي !

    ثانيا .. لاقيت المنحني التاريخي بدأ في التدهور من اواخر الدولة الحديثة .. تحديدا بعد رمسيس التاني .. ولحد دلوقتي في النازل مش شيفاه في الطالع خالص !!

    افتكرت مصر .. الامبراطورية العظيمة اللى كانت بتمتد من اقصي الشمال لاقصي الجنوب .. ومن اقصي الشرق لاقصي الغرب !

    افتكرت ملك العراق لما طلب من امنحتب التالت " ابو اخناتون " انه يجوزه مصرية من البيت الحاكم
     
    فبعتله وهو متضايق " مبنجوزش بناتنا لغير مصريين "
     
    فبعتله قاله بلاش جوزني واحدة من رعايا البيت الحاكم المصري 
     
    بعتله بالرفض برده
     
    بعتله تاني قاله طب جوزني واحدة من عامة الشعب .. ولا خدامة حتي
    عاوز اتجوز مصرية ياجدع :D
     
    بعتله رساله فيها لهجة شديدة اوي .. وقاله ان مفيش مصرية تخرج من بلدها عشان تتجوز واحد غير مصري .. ولو عاود الطلب تاني مش هايحصله كويس !!!
    افتكرت رسايل حكام الشام لملوك مصر وهما بيقولوله :

    انا كـالكلب تحت قدمي سيدي ! .. اقبل التراب تحت قدمي سيدي !!

    افتكرت الرسايل اللي كانت بتتبعت للملوك المصريين من الممالك والامارات الاخري يطلبون من الملك المصري المساعدة .. او الاستنجاد .. او حتي اللجوء السياسي لعلمهم ان مصر محدش يقدر يهوب ناحيتها !!

    يااااااااااااا الله .. ايه القوة والعظمة دي يامصر ؟

    هوبا .. رمسيس التاني مات

    حصل صراع وخلاف بين ولاده ع الحكم ومؤامرات واشتغالات ..

    عادي ما بين كل فترة وفترة بيحصل الحاجات دي .. بس بترجع مصر تاني لقوتها وطبيعتها !!

    لكن .. ايه دا ؟

    السنة دي انا اتقهرت !!

    ايه اللي حصلك يامصر ؟

    المنحني التاريخي ف النازل كدا ليه

    فين مكانة مصر ؟ بتروح فين ؟

    ايه دا ...

    لما كاهن مصري يروح يسافر لبنان عشان يجيب خشب يعمل بيه المركب المقدسة للاله امون اللي كانت كل الممالك بتقدسه لمجرد انه اله مصري !!

    في طريقه يتسرق !! .. وهو معروف انه مصري ؟؟

    ولما يروح لبنان حاكمها يسخر منه ومن الهه ويقوله معاك فلوس تاخد الخشب مش معاك متلزمنيش ؟

    مصري بيتعامل كدا ؟؟؟؟؟؟؟

    لما ملك مصري " سيا امون " في الاسرة الـ 21 يزوج ابنته للنبي سليمان !

    عليه السلام .. نبي آه .. بس مش مصري !!

    مكنش في مصرية بتتجوز اجنبي مهما كان

    وبعدين الجواز مكنش في صالح الدين خالص ؟

    دا كان لاسترضاء اليهود اللي كان حاكمهم في الوقت دا هو النبي سليمان

    اممممممم

    ايه دا كمان مصرررر احتلها قبائل ليبية وحكموها ؟

    بعدها قبائل نوبية ؟ .. دا النوبة والسودان طول عمرهم تحت حكمك يامصر .. ايه اللي حصل ؟

    والاشوريين " العراق " كمان .. وايران بعدها ؟

    واليونان والرومان !!

    كل دا بفتكره وانا ماسكة الكتاب اللي بقرأ في الفهرس بتاعه .. ولاقتني لا اراديا بقول كلام عمنا صلاح جاهين :

    أحسنت في القول صحيح ياولد يامتنبي
    جبت اللى جوة الفؤاد عن مصر متعبي
    وحكمت بالعدل لكن بعضنا انظلموا !
    يا أمة ضحكت من جهلها الامم
    العلم كان عندنا من صغره متربي
    لكن هاجر وعدي البحر متخبي
    لما الايران هجموا ثم اليونان هجموا
    ثم الرومان دمروا ثم التتار هدموا
    ثم الجميع كل واحد جه مسح قدمه
    علي اسم مصر !!


    آآآآآه يامصر !!

    ثم الجميع كل واحد جه مسح قدمه علي اسم مصر !!!

    من الوقت دا لحد دلوقتي والمنحني في النازل يامصر ؟

    كرامتك وكرامة ولادك في النازل يامصر

    كل دا بسبب ايه ؟

    بسبب ولادك في الاول

    صارعو واتخانقو وانشغلو عن مصلحتك بمصلحتهم وبعرش مصر

    لحد ماضاعت من ايديهم مصر

    مابقت سجادة ادام شقة .. واللي داخل واللي خارج يمسح رجله فيها

    ولادك يامصر وقت ما رضيو علي نفسهم المهانة .. والضعف والذل

    زاد ذلهم .. وضعفهم .. وقلت كرامتهم

    ياتري في امل يامصر ترجعلك كرامتك ؟ وكرامة ولادك ؟

    ياتري في أمل المنحني يزيد بدال ماهو في النازل كدا ؟

    معرفش يامصر

    بس اللى اعرفه


    اني علي اسم مصر بكتب الكلام دا من قلب جواه حب مصر
    https://blogger.googleusercontent.com/img/b/R29vZ2xl/AVvXsEg-f5MNGOa-S74wg-m-8xa7u-1EreMSmD3IBL3j4gcGLNao1KBVZpP5xbFFhqE0qH-205lUoct6OE7JsKWokRP3ijSESS5H9bWIqlUhMK7KEwtCJoVZL5nzBE7y4B3-NFYv00gt87Ymnyba/s320/%D8%AD%D8%A8+%D9%85%D8%B5%D8%B13.jpg

    نكــتة قريتها وعجبتني أوي !!
     

     
    كان ياما كان .. واحد راح اتقدم لواحده  

    ابوها لاقاه شاب كويس .. اتساهل معاه في كل شئ  

    لدرجة انه خلي مهرها 2,5 جنيه !  

    " متسألوش اشمعني يعني .. هو كدا "  

    تم الزواج  

    وبعد فترة من الزمن .. كل ما يصادف وجود " كانز بيبسي "  

    يقول الزوج للزوجة :  

    مهرك تمن علبة بيبسي !  

    انتي وكانز البيبسي واحد  

    أنتي خسرتيني اللي خسرته وانا بشتري الكانز دا !!  

    ويناديها دايما بـ " يا كانز البيبسي "  

    زهقت البنية ياعين أمها وراحت اشتكت لابوها  

    وقالتله : أرخصتم مهري .. فـأرخص هو قدري !!  

    فكر الأب شوية .. وطلب من الزوج انه يخلي مراته عنده ويجي بكرة هو اهله لانه عازمهم علي عزومة جامدة اوي !  

    تاني يوم جه الزوج ومعاه اهله  

    وهما ع السفرة .. لاقوها فاضية .. عليها كانز بيبسي واحد !!!  

    استغرب الاهل !!  

    ولكن الزوج ابتدا يحس بالملعوب  

    زاد الاب علب البيبسي وخلاهم تلاتة  

    وقاله : اخدتو بنتنا بكانز بيبسي .. ودلوقتي عاوزين نرجعها لينا بـ 3 !!  

    طلع الزوج عنده دم واتكسف واتحرج جدا !!!  

    واهله لسة مش فاهمين !  

    فهمهم الاب وشرحلهم الموقف .. وغضبو جدا منه  

    وقالوله : دا جزاء من أكرمك !!  

    " ناس عندهم ضمير بصحيح .. مقالوش جوزها ويقول اللى هو عاوزه " 

      
    قاله الاب : مرضتش اعمل زي معظم الناس ويسرت عليك زواجك .. لكن دلوقتي مش هاتاخد بنتي الا لما تدفع مهرها من الاول 30 الف جنيه !!  

    وللاسف عشان بيحبها .. وافق ودفع  

    ومن يومها وهو بيقولها  

    يا مصنع البيبسي








     
    دي نكتة .. لاقتها في اماكن كتيرة  

    بس نكتة نرفزتني !!  

    عشان دا الواقع دلوقتي  

    ليه معظم الشباب مش بيقدرو التيسير اللى بيعمله اهل البنت ليه !  

    فـ الاول بيفرحو .. ولكن بعد كدا  

    " يافرحة ماتمت خدها الغراب وطار "  

    تلاقي العرق الواطي طلع  

    ويبتدي يذل  

    ويحسسها انها رخيصة !  

    ويحسسها اد ايه هي متساويش .. وانها اقل من اللى دفعه فيها !  

    تلاقي اللي مش عاوز يتعب ويجيب شقة .. مايعيش ف حضن ابوه وامه .. وبالمرة اجيب خدامة ببلاش 
      
     
    --> هايوفر تمن شقة .. شوية من مصارف الاكل والشرب .. صحة الست الوالدة .. زن السيد الوالد ..  

    تلاقي اللي عشان يتجوز ياخد من ابوه وامه معظم مصاريف الزواج  

    --> يكتفي بالمجهود مع ما يتيسر من المال الموجود معه وليس ما سوف يحاول كسبه !  

    تلاقي عاوز البنت علي شروطه وبمزاجه .. ولو عاجبك يابنت الناس عاجبك مش عاجبك ابئي قابليني لو اتجوزتي  

    --> علي اساس انت يامعفن احسن واحد ف الدنيا .. روح اتنيل  

    الاجمد بئة .. تلاقي اللي يعمل من البحر طحينة وهو أخره يغمس فول  

    --> نهارك بلاك مطين بطين .. غور ياض


     
    ييييييييييه

    في امثلة كتيرة اوي

    وفـ الاخير .. تلاقي عدم التقدير .. وحب الاستسهال 
     

    عشان كدا رخامة بئة وان شالله نعنس

      لآ للتسهيل مع أى بني ادم فـ بطاقته مكتوب عليها ذكر 

      عاوز يتجوز يكون اد الجواز ان شالله يتجوز فـ الاربعين


    عاوزين رجالة يابشر كفاية ذكوووووووووووووووور 



    تحديث × سؤال سألته فـ الكومنتات وعاوزة اجابة ليه من الشباب تحديدا
      
    علي سبيل المثال ..
    لو اتقدمتو لواحدة وطلع اهلها متساهلين جداااااااا معاكم 

    هاتحسو بــإيه ؟

    مش هتشكو اذا كان البنت دي فيها حاجة ومعيوبة !!


    أشك .. ان محدش هايشك ؟ وهايقول يبقي فـي إنـــّا ؟

    عارفين ليه ؟


    عشان دا طبعكو

    وكفاية كدا بئة
     
     O_o 

    لايك ماي بيدج ع الفيس

    ديلفري اعقل مجنونة

    حط ميلك هتوصلك المواضيع لحد عندك ^_^:

    Delivered by FeedBurner

    أج ـمل مدونـات