كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )

http://image.arabseyes.com/files/images/ba46907df.jpg

انا مبسوطة اوي

انهاردة شوفته !

كان بقالي كتير غايبة عنه

روحتله !!

كنت عارفة اني رايحاله .. بس الصدفة جمعتني بيه بدري اوي 

أول ما شوفته جريت عليه .. بعيني وقلبي لكن خطواتي كانت ثابتة .. 

لاقيته هــادي أوي .. ركزت ف ملامحه .. لاقيته حزين .. زعلان 

_ مــالك ؟

بصلي بحزن أوي .. او بمعني أصح مقمووص وزعلان !

_ يـــاه !! .. لسة فكراني ؟

_ ازاى بتقول كدا .. انت دايما ف بالي 

_ سنة وأكتر ولسة في بالك ؟

_ ظروف صدقني .. بس انا ساعات بشوفك بس مبعرفش اكلمك !

_ امممممم .. هانبكش وهتاكليني بالكلام زي كل مرة 

_ لا بجد بشوفك .. انت اللى مبتاخدش بالك .. ولا عشان بشوفك من بعيد لبعيد يعني !

_ اممممممم 

_ ماعلينا ياسيدي .. قولي مالك حزين كدا ليه ؟

_ حزين عليكي !! .. حاسك مش مظبوطة ؟

_ بالعكس .. انا تماموز وزي الفل .. وبجد وحشتني أوي 

_ وحشتك !! .. ماهو واضح 

_ آه والنحمة وحشتني 

_ اتدلعي يختي .. قوليلي .. ايه اللى هببتيه دا ؟

_ اممممم .. انت عرفت ؟

_ ايوة .. ليه مأخدتيش رائي ؟

_ سمعت كلام الناس ومشيت وراه !

_ ودا كان اتفاقنا ؟ .. مش قولنا كل حاجة بالعقل وبالقلب وتستخيري وتاخدي رأيي جايز كنت افيدك ؟

_ خلاص بقي ما علينا .. قفل ع الحوار .. المهم اني ناو معاك 

_ لا مش هاقفل .. انتي ندمانة ؟

_ لاء اطلاقا .. ولا اقولك الصراحة

انا ندمانة اني مفكرتش بعقلي كويس من الاول .. بس خلاص مش قولتلك بتعلم من اخطائي ؟

_ ماشي بس متتكررش ياهــانم 

_ حاضر .. تعرف انا نفسي في ايه ؟

_ ايـــه ؟

_ أحب حد زيك  .. انت جميل أووي ..

_ بس انا مفيش حد زيي .. دا مش غرور .. بس انا مشوه زي ما انتي شايفة !! 

_ لاء .. انت مشوه من برة بس .. لكن من جــوة أبيض أوي .. عايش جواك حاجات كتيرة اوي حلوة مش موجودة عند ناس كتير !

بجد ياريت في حد زيك !

اصل الناس بقت كدا .. من برة حلو اوي .. لكن من جوة .. وحش أوي .. أوي .. 

_ عارف وفاهم وحاسس كلامك .. ان شاء الله هتلاقي اللى بتتمنيه !

_ خلاص بقي ياعم .. هنقلبها دراما ولا ايه ؟ 

متزعلش مني وانا هابقي اسأل عليك 

بس أعرف ..

انا بشوفك كل يوم بنزل فيه وانا رايحة الجامعة 

اصل المكان اللى انا ساكنة فيه ومواصلاتي وطريقي بيعدي ع النيل 


فطبيعي اني بسلم عليك وبطمن عليك وببعتلك بوسة طياري 

بشوفك وبلاقيك حاسس بيا .. وانا زعلانة بلاقيك هادي ولونك غريب 

وانا مبسوطة بلاقيك بترقص وبتلمع 

بحاول اقولك انا اهو .!! شايفني !!

بس مش بعرف !!

بجد أنا بحبك أووووي 

بالرغم من إنك مشوه من برة زي مابتقول .. بس دا عشان الناس هي اللي بتشوهك !!

اصل دي عادة البني آدم يا نيل ..

الحاجة النقية لازم ايد حقيرة تلوثها 

لكن انت من جواك عايش حاجات كتيرة حلوة 

عايش حياة تانية نقية بجد

ياريتني كنت سمكة 

ياريتني !!
 




 سلام بقي بابا جه ولازم يوصلني للمتحف .. العيال اصحابي زمانهم مستنيني !!

هاعدي عليك وانا مروحة 

_ أوكي .. انا مبسوط بيكي أوي 

_ انا اكتر .. سلام 

_ سلام .. :)


وفعلا وانا مروحة عديت تاني .. وكنت ف حضن أحلي مكان في مصر 

 كنت في حضن النيـــل 

شمس وهوا ومية بترقص فرحانة بيا 

زي ما انا كنت فرحـــــــانة بالظبط

7 CoMeNTaToOoOoZ:

beautiful mind يقول...

ههههههههههه
عارفه وانا بقرا الموضوع عقلي
اخدني لحاجه تانيه خالص خالص
مكنتش اعرف اني بفكر وحش كدا
بجد موضوع روعه
تسلم ايدك
تشويق لاخر كلمة
تحياتي

سمع هوص (Abo 3li) يقول...

هتصدقيني لو قلتلك اني لو كنت اتكلمت عنه.. كن هقول نفس الكلام ال قلتيه البوست القديم ال حطالنا لينكه...

تخيلي اني كنت لسه امبارح بتكلم مع مدونة زميلة علي النيل... كنت بفهمها انا بحب النيل ليه اكتر من اي حاجة...

بصي لو زعل منك في يوم... قوليلي وانا هصالحكم... ده صاحبي اووووي...

gemy يقول...

بجد كلااام زي الفل انا فعلا دايما لما ببقي زهقان او مضايق او فرحان ومبسووط برووح اقعد قدام النيل بحس فعلا انه بيزعل لزعلي وبيفرح لفرحي ودايما بيبقي فاتحلي قلبه وبيسمع مني ودايما يخليني افضفض ليه من غير زهق ولا ملل تسلم ايدك يا ريمو

sony2000 يقول...

علي فكره
هقولك علي حاجه سر:انا دماغي راحت شماااال
هههههههههههههههه
لا بهذر
بجد هو فعلا الوحيد اللي بيريحني برده
تصدقي,وانا ريحه الجامعه لاذمن اعدي عليه:)
انبي وحشني دلوقتي واحنا قعدين بنجيب فسيرتو
بس ربنايستر وميشرقشي بس:)

مصري جدا يقول...

تفتكري ان فيه بني ادم ممكن نكلمه بالصراحه دي؟

ويرد علينا بنفس القدر منها؟

ما أظنش

كويس انك لقيتي

لسا بدور ومش لاقي

A32L MaGNoNa يقول...

التعليقات طارت في الهواء الطلق :D

سمو الامير يقول...

تحفة بجد

أسلوبك هايل ومشوق جدااااا

تسلم ايديكي

:)

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات