كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )



كــان ياما كــان ..

يا سعد يا إكرام ..

متبصوش كدا .. مش هحكيلكو حكاية قبل النوم ..

اسمعو ووعو يامعشر البني آدمين

كان في واحد مدمن ومروج للمخدرات .. اتقبض عليه واتحكم عليه بحكم المؤبد

بعدها بشوية .. دخل ابنه السجن بنفس جريمه ابوه

وكان ليه أخ تاني .. ولــكن .. كان ليه مكانة مرموقة في شركة من الشركات الكبري

لما اتسأل الابن الاول ..

ايه اللى خلاك توصل لهنــا !!

جـاوب زي اللمبي .. باستثناء علي علوكة

وقال .. ابويا مدمن ومروج وتاجر مخدرات ومحكوم عليه بالمؤبد .. متوقعين مني انا اعمل ايه ؟؟

أما التــاني فـ اتسأل نفس السؤال

وللغرابة .. جاوب بنفس الاجابة



امممممم

نفس السؤال .. بنفس الاجابة .. ونفس الحدث .؟؟

ولكــن النتيجة مختلفة

هنا جات دور البرمجة والايجابية عند كل بني آدم

مش المهم الحدث ايه بس المهم طريقة الاستجابة ليه ..

يعني ..

الاولاني شاف ان ابوه تاجر ومدمن مخدرات ..

مفيش ادامه الا طريق واحد وهو انه يكون زي ابوه

اما التاني .. فـ شاف برده ان ابوه تاجر ومدمن مخدرات

لكــن ادامه طرق كتيرة الا طريق انه يكون زي ابوه



في جملة عجبتني أوي لـ أنتوني روبنز

قال فيها

" الماضي لا يماثل المستقبل ، الماضي شيء ، والمستقبل شيء آخر ، الماضي انتهى ، والمستقبل جاهز للتفصيل حسب المقاس الذي ترغبه "

فاللي حصلك ف المــاضي .. لازم ميحصلكش ويتكرر ف المستقبل

زواجك او تجربتك السابقة مش نجحت .. يبقي لازم اللى جاي هاينجح

لان الماضي مش زي المستقبل

اي موقف فشلت فيه ف السابق .. لازم تنجح فيه ف المستقبل

" مهما طالت مرات الفشل .. لان الفشل بيتبعه نجــاح ودا عند كل الناس الا السلبيين "



هديلكو مثال مثلا..

انا جبت ف ثانوية عاملة 93,6 % .. لو عدت ثانوية عامة دلوقتي وبعد اربع سنين .. واثقة اني هاجيب 100 %

ليــه ؟

عشان اولا دخلت التجربة قبل كدا وعارفة ايه هي نقط ضعفي فيها

ثانيا .. عشان امكانياتي العقلية حاليا غير امكانياتي العقلية زمان

وعشان الشئ اللى مبنقدرش نحققه زي ما احنا عاوزين في المــاضي .. ممكن نقدر نحققه زي ما احنا عاوزين في المستقبل



نصيحة مني ..

متخلوش تجاربكم في المـاضي .. تأثر عليكم ف المستقبل

ومتحاسبوش نفسكو في الحــاضر .. علي امكانيتكم في الماضي

النــاس ممكن تحاسبكم كدا ..

لكن انتو لاء

ملكش دعوة بالنــاس

كل واحد مبيهتمش بميول اللى ادامه وبرفع روحه المعنوية

فالناس هاتحاسبك بفشلك السابق وتسود مستقبلك وتكرهك ف نفسك

عــادي .. طنش تعش

ملكش دعوة بحد

لو موقفتش مع نفسك محدش هايقف معاك

وافتكر الجملة دي كويس اوي

أنا زمــان .. مش أنا في المستقبل

أنا في المستقبل .. لازم أكون أحسن من زمان و دلوقتي

واكتبها ادامك ف كل حتــة ..



المـوضوع طويل .. بس ان شاء الله يعجبكم

الفكرة منقولة والعرض من تقديمي أنا

يارب تعجبكم

27 CoMeNTaToOoOoZ:

مشخبطاتي يقول...

سلام عليكِ..

كلام مظبوط جدًا..ودي مشكلة يقع فيها الكثيرون..أنا أصلًا وحش..أنا عمري مانجحت..أنا لما مسكت مسئولية فشلت..وهكذا !

وبيني وبينكم أنا كنت كده والدنيا كانت عقد ع الآخر..دلوقتي الحمد لله في تحسن..ولما قرأت التدوينة وشي احمر والدم غلي في غروقي وهاين عليا أقوم أكسر البلد باللي فيها !

بعيدًا عن المزاح التدوينة رائعة وصياغة جميلة لاتدعوا إلى الملل..

فشكرًا جدًا :)

A32L MaGNoNa يقول...

مشخبطاتي ..
مفيش مشكلة الا وليها حل بس الاقتناع ان دي مشكلة ف الاصل :)

هههههه قوم كسر البلد باللي فيها بس متجيش جنبي الله يخليك :D

بجد ردك فرحني جدا
الحمد لله ان الصياغه لا تدعو للملل لاني كنت قلقانة من كدا اوي وانا بكتبها :)

شكرا لحضرتك بجد علي زيارتك وردك ومتابعتك ليا

جزاكم الله كل خير :)

sony2000 يقول...

بجد كنت محتاجه جدا الكلام ده
شكرا ليكي:)

A32L MaGNoNa يقول...

العفو ياسوني

الحمد لله ان كلامي جه ف وقته

ويارب بفايدة ليكي وللجميع يارب

اللهم اجعلنا ممن يسمعون القول فيتبعون احسنه :)

نورتيني ياقمراية

إمرأه من ثلج يقول...

فعلا كلامك كلة صح
انا اتعلمت حاجة ان التجربة الفاشلة بجد انك لو متعلمتش منها اما لو اتعلمت وخرجت منها اقوى يبقى عمرها ماتبقى تجربة فاشلة

وانا لما فشلت فى تجربة جبت ورقة وقلم وطلعت نقط ضعفى وقوتى علشان المرة الجاية ابقى اقوى

تحياتى لك فى مرور اول اتمنى ان يدوم تواصلنا

ضكـــــتور جدا يقول...

لو موقفتش مع نفسك محدش هايقف معاك

وافتكر الجملة دي كويس اوي

أنا زمــان .. مش أنا في المستقبل

أنا في المستقبل .. لازم أكون أحسن من زمان و دلوقتي

واكتبها ادامك ف كل حتــة ..
.....................................
كلمات جميلة
تحياتي على المدونة الرائعة
ودي أول زيارة للمدونة الرائعة
وان شاء الله مش هتكون الاخيرة
تحياتي

انسان عادي يقول...

احم احم
سلامو عليكو
حلو قوي قوي الكلام ده
علي فكرة انا حصلتلي تجربة قبل كده كانت كافية انها تعقدني بجد واخسر بسببها حاجات كتير
انا في هندسة دلوقتي يعني الي حد ما طول عمري كنت متمير شويه في الدراسة المهم بعد ما دخلت الكلية عديت اعدادي عادي وبعديها اولي برضو نجحت
وجيت في تانية بقي بدأت اشتغل في الانشطة جامد قوي ودخلت الاتحاد وانا اصلا مكنتش بعمل اي انشطة قبل كده
الموضوع شدني جامد وعجبني اديته كل وقتي
وللاسف كانت نتيجة ده اني فضلت 3 سنين في تانية
وبجد كانت كسره جامدة قوي ليا
وصدمة خرجت منها بالعافية
بس مخرجتش منها غير لما قولت لنفسي فعلا ان اللي جاي احسن من اللي راح
وقلت لنفسي كفاية اللي خسرته وابدأ من الاول واديني دلوقتي الحمد لله كلها كام شهر واتخرج


سوري طولت ورخمت
بس البوست جميل وحسيته شويه

A32L MaGNoNa يقول...

إمرأه من ثلج..
اولا انا معجبة جدا جدا جدا باسمك
بيدل علي مدي القوة والضعف الانثوي في وقت واحد

عجبني ردك ..
شرفني مرورك ...

واكيد لازم يكون بينا تواصل دايما

تحياتي ^_^

A32L MaGNoNa يقول...

ضكتور جدا
ههههههه عجبني اسمك برده ^_^

وياريت نكون علي تواصل دايما .. :)
ومرورك شرفني بجد وحقيقي ^_^

A32L MaGNoNa يقول...

انســــان عـــادي

يااااااه علي ردك

يمكن لمس حاجات كتيرة مكتبتهاش في البوست

بس اوعي تفتكر انك كدا وقعت .. لاء قوم واقف

وان شاء الله تنجح بتقدير عالي وتكون اشهر واعظم مهندس ف الدنيا

تحيــاتي :)

ومنورني والله ^_^

ماجد العياطي يقول...

شكرا جدا على التدوينه الجميله دي

ربنا يبارك فيكي

Bent Men ElZaman Da !! يقول...

كلامك تحفه والله
الطبيعى ان الواحد يتعلم من اللى عدى عليه
سواء بقى حصله بطريقه مباشره او حصل لحد قدامه
يعنى يتعلم من اخطائه واخطاء غيره كمان
العيب ان الواحد مننا يسمح ان نفس الغلط يتكرر تانى
عجبتنى اوى جمله ماتحاسبش نفسك دلوقتى على قدراتك فى الماضى
احنا كل يوم بنتعلم حاجه جديده اكيد بتغيرنا
وبتغير قدرتنا او حتى تفكيرنا
وده بيخلينا احنا نفسنا شخصيات مختلفه تماما عن قبل كده

تسلم ايدك على البوست :)

A32L MaGNoNa يقول...

ماجد العياطي ..
ميرسي يا افندم
الحمدلله انها عجبتك
نورتني ^_^

A32L MaGNoNa يقول...

بنت من الزمن دا ..

اضافتك روعة بجد بكل المقاييس
مش عارفة اقولك ايه
ميرسي جدا جدا جدا لمرورك ياقمر ^_^

طالبة مقهورة ..درجة أولى يقول...

ايه ده بقى

شكلنا كده هننافس ابراهيم الفقي ^_^

موضوع فوق الممتاز..بس تعرفي الاجمل من كده ان حتى لو ماضينا سيء نبص للجانب المشرق واي حاجة فيها جانب مشرق..ساعتها عمرنا ما هنندم ولا نتشاءم

عجبتني اوي جملة انتوني

دمتي بكل ود :)

P A S H A يقول...

جميل جداً البوست ده
:)
بجد فيه شحنة معنوية إيجابية عالية
عجبني بصراحة

تسلم إيدك

خالص تحياتي وعميق تقديري

:)

سلام

A32L MaGNoNa يقول...

رضــوي ..
ابراهيم الفقي ايه بس
دي مجرد تجربة والله والفكرة منقولة كمان مش من دماغي :D

انا بحب اوي المقولة اللى بتقول بص لنص الكوباية المليان متبصش للفاضي

وربنا سبحانه وتعالي بيقول ان معالعسر يسر

معني كدا ان اليسر بيجي مع العسر مش بعده بفترة كبيرة

نورتيني ياقمراية ويارب اشوفك دايما

A32L MaGNoNa يقول...

بـــــاشـــا

البوست فيه شحنه ايجابية من فترة صعبة بمر بيها

حبيت اشحن نفسي وغيري بشاحن واحد ^_^

نورتني ويارب البوست يكون عجبك وشحنك زي ما شحني ^_^

سمع هوص (Abo 3li) يقول...

معاكي حق... ال يبص وراه يتشنكل ويقع علي وشه...

تحياتي علي الشحن المعنوي ده...

Sad Angel يقول...

كلامك جه فى وقتو
كان لسالى تكة واوصل للمرحله دى

A32L MaGNoNa يقول...

ابو علي

نورتني

وفين حق الشحن ؟

A32L MaGNoNa يقول...

ســاد أنجل

الحمدلله اني لحقتك

جايز ربنا بيبعتلنا رسايل من حيث لا نحتسب عشان يلحقنا بيها .. ويرحمنا من تعبنا وتفكيرنا ويأسنا

متنسيش .. ان مع العسر يسرا

نورتيني ياقمر

وحـدي يقول...
أزال المؤلف هذا التعليق.
مشخبطاتي يقول...

في حاجة نسيت أقولها..

هو لما أنا أفشل في حاجة معناه إيه الكلام دا؟!

-معناه إن مش هاعمل الحاجة دي تاني..يعني أنا كده نجحت في معرفة إحدى طرق الفشل..فلن أقوم بها مرة ثانية وأيضًا سأخبر من حولي بها..

تمام زي أديسون بتاع اللمبة..!

A32L MaGNoNa يقول...

تمام يامشخبطاتي ..
زي الحصبة بالظبط :d
لما بنتعب منها مرة بناخد منها مناعه
وكذلك طرق الفشل ..
في كل مرة بنفشل " او بلاش نفشل نخليها نقع " .. بناخد حصانة جديدة من الطريقة دي فمش بنعملها تانى

ميرسي اوي ع الاضافة القيمة دي
جزاكم الله كل خير

beautiful mind يقول...

بما ان دي اول مرة ليا هنا فانا بقول السلام عليكم
انا منبهر من حاجه ومش عارف هي صح ولا لا
انا لما قريت عنوان مدونتك في مجلة ميكانو استغربت كتير واتمنيت ان استغرابي يبقي فعلا مش صحيح
لان كان فيه مدونة من فتره كدا تقريبا سنه وكانت نفس اسم المدونة دي بالظبط
لكن صاحبتها اختفت فجأة ومحدش يعرف عنها حاجه
كل اللي اعرفه ان اسمها كان ايمان
ارجوكي تصححيلي اللي حصل
وان شاء الله مش هتكون اخر زيارة ليا للمدونة الجميله دي
تحياتي

A32L MaGNoNa يقول...

اهلا اهلا يامليون مرحبا :d

والله يامستر بيوتيفول مايند انا مش ايمــان دي خــآلص

واول مرة اعرف ان كان في مدونة بالاسم دا :(

شرفتني بمرورك ويارب دايما نفضل علي تواصل :)

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات