Blog Archive

كله يسلم نفسه ^_^

المتابعون

مهم .. قبل ما تقرا شوف الكلام دا .. اعقلها و تـوكل !

* ممنوع السرقة والنسخ بدون ذكر المصدر باللينك !
وقبل ما عقلك يوزك .. شوف اللينك دا ( دوووس )

* ممكن لو غبت عنكم فترة أو عرفتم أن ربنا توفني / تدعولي / وتشوفو دا ( المــوت !! )

 اقــــــرا الخـــــــبر ..

صورة مرسلة

طويل العمر يطول عمره ويزهزه عصره



عنخ وجا سنب < يعيش سالما معافيا >



والله للحظات تخيلت انه يموت



وتخيلت اني هاحزن عليه اوي



حاكم اننا شعب غلبان وعاتشفي اوي :D



ولو جراله حاجة هانحزن ونبكي عليه ونقول يا سبعي ياجملي يابغلي :no:



بس افتكرت عادل امام فـ الزعيم وهو بيقول



هو في رئيس بيموت ؟؟؟



استغفر الله العظيم طبعا بس عمر الشقي بقي <_<



وبعدين علقة سخنة ايه اللى بيتكلم عليها دا ؟؟

يالهوي .. انا هاسكت احسن بدال ما مرارتي انا اللى تتفقع <_<

أنـــا حبيت بس اسلم عليه واقوله من خلال هنا ..


حمد الله ع السلامة ياريس



صورة مرسلة



ودا الفيديو عشان حبايبه يطمنو عليه

12 CoMeNTaToOoOoZ:

سمع هوص (Abo 3li) يقول...

علقة سخنة.... عملية المرارة وبتتعمل في المانيا وعلقة سخنة...
اومال لو الباشا وقف في طابور طويل عريض علشان ياخد علاج ... هتبقي ايه؟؟؟ علقة مولعة؟؟
طب لو دخل القصر العيني وملقاش سرير فاضي وفرشوله علي الارض؟؟ هتبقي ايه علقة موحوحة؟؟

يلا ماعلينا

حمدالله علي السلامة ياكبيييييييييير...

Legendary Leader يقول...

هو انا طبعا رافض رفض قااااطع اسلوب السخرية اللى حضرتك بتتكلمى بيه ده بس الراجل ده لو حصله حاجة لاقدر الله هتعرفه قيمته كويس ومفيش دولة فى العالم مفيش فيها فساد

A32L MaGNoNa يقول...

يا ابو علي الريس يستاهل اكتر من المانيا بكتيرررررررر :D

منووور جدا جدا ^_^

A32L MaGNoNa يقول...

Legendary Leader ... او سكوفيلد زي ما انا متعودة
طبعا بلا شك نورت المدونة بوجودك
وليك الحرية في انك تترفض اسلوبي الساخر
وعارفة كويس جدا ان كل بلد فيها فساد
دا غير اني متأكدة ان لو الريس مات انا اول واحدة ممكن انهار من الزعل عليه
لاني واثقة انه حامينا من حاجات كتير
ودا لا يعني اننا نتغاضي عن سلبياته ؟ ومن اهمهــا انه يروح يعمل مرارة في المانيا
وابو علي كتر خيره جابلك المفيد

علقة سخنة.... عملية المرارة وبتتعمل في المانيا وعلقة سخنة...
اومال لو الباشا وقف في طابور طويل عريض علشان ياخد علاج ... هتبقي ايه؟؟؟ علقة مولعة؟؟
طب لو دخل القصر العيني وملقاش سرير فاضي وفرشوله علي الارض؟؟ هتبقي ايه علقة موحوحة؟؟

!!!!!!

ونوووورت جدا جدا جدا برده ^_^
واختلاف الرأى لا يفسد للود قضية :D

اصحى يا مصر : اسلام جاويش (ديو) يقول...

اولاً مبروك النجاح
ثانياً مبروك على مجاح عملية الريس اللى كانت علقة سخنة ..وكفاية انه شافها هههههههه
ثالثاً ودا الاهم ... المدونة تحفة ، وسعيد انى عرفتها
تقبلى حياتى ومرورى
إسلام

A32L MaGNoNa يقول...

ياااااااه

مستر اسلام جاويش ديو بذات نفسه عندنا ؟؟

اهلا وسهلا والله يبارك فيك يا افندم
نورت جدا جدا جدا ^_^
ويارب نشوفك معانا كتير ان شاء الله :)

Legendary Leader يقول...

شكرا لسعة صدر حضرتك والف الف مبروك على النجاح

هى متاخرة شوية بس اعذرينى نيجى لتعليق الاخ ابو على

مفيش دولة فى العالم مفيش فيها سلبيات ده اولا ثانيا الرئيس مبارك لم يقم بعملية المرارة بل استئصال ورم من المرارة وبالتالى فهى عملية خطيرة واؤكد ان مصر بها من الدكاترة البارعين الكثير والكثير ولكن من حق اى شخص ان يعالج فى اى مكان وده رئيس اهم بلد فى الشرق الاوسط اما بخصوص ماذكرته عن القصر العينى وخلافه فهقول حاجة صغيرة هو احنا ليييييييه على طول مش بنتكلم غير على سلبيات ليه مش بنتكلم على ايجابيات خالص ليه مش بنتكلم على مستشفيات كتير فى البلد ولها اسمها وليكن مثلا اى مستشفى تابعة للقوات المسلحة ياجماعة السلبيات لا تناقش بالطريقة دى ولا بالمنظر ده الرئيس مبارك من حقه ان يعالج فى اى مكان بصرف النظر كان رئيس البلد او مواطن عادى وهذا ليس عدم ثقة فى مستشفيات ودكاترة مصر اطلاقا هو لما الاهلى يروح يجيب مدرب زى جوزيه وياخد 64 الف دولار فى الشهر هل ده معناه مفيش مدربين مصريين على كفء ؟

A32L MaGNoNa يقول...

الله يبارك فيك يا رب :)

مبدأ الاستغناء عن قدراتنا او الحاجة اللى في ايدينا واللجوء الي للاستيراد حتي في المدربين وحتي في معالجة المرض دا مرفوض ع الاقل بالنسبة ليا

انت بتقول مستشفي القوات المسلحة واكيد في مستشفيات غيرها كتيرة محترمة .. بس دي اغلبيتها مش للشعب الغلبان اللى بيلاقي لقمة عيشه بالعافية

ايا كان لما حد من اللى بيجرو ورا العلاج علي نفقة الدولة وهما محتاجينه اوي وبيموتو كل يوم الف مرة يلاقو مرات مش عارف مين بتعالج ايه بكام مليون .. ويلاقي فلان بيتعالج ع نفقة الدولة بكام مليون كمان
وريسهم رايح يعمل عملية في المانيا ..

شعور الغلابة دول غير شعورنا خالص .. وزي ما في مثل بيقول

اللى ايديه في المية مش زي اللى ايديه في النار

وانا مهما اتكلمت برده وقولت ايديا في المية

ومع ذلك انا من اشد المؤيدين اننا منبصش ع السلبيات وبس

بدليل اني كاتبة بوست من فترة بالمضمون دا

http://a32l-magnona.blogspot.com/2010/03/blog-post.html

ياريت حضرتك تشوفه وتديني رائيك .

بس مش معني كدا اننا يعني نلحق مرارتنا قبل ما تتفقع :D

نورت وميرسي جدا ع المتابعة

Legendary Leader يقول...

يافندم يعنى حضرتك بتقارنى الفقير واللى بيجرى ورا
العلاج على نفقة الدولة بعلاج رئيس الدولة ؟
انا بس عايز اعرف راى حضرتك فى اكبر رؤساء العالم اللى بيتعالجوا فى المانيا وفى مدينة هيدلبرج بالذات ؟ هل ده تقصير فى مستشفياتهم واطباءهم فى مشااااكل كتير فى مصر والمشاكل دى عمرها ماهتتحل فى يوم وليلة وسفر الرئيس لالمانيا لاجراء عملية جراحية انا شايف انه شىء عادى جدا ومعتقدش انه ينفع نقارنه بعلاج نفقة الدولة

A32L MaGNoNa يقول...

يافندم يعنى حضرتك بتقارنى الفقير واللى بيجرى ورا
العلاج على نفقة الدولة بعلاج رئيس الدولة ؟

---------

يا افندم الرسول عليه الصلاة والسلام ساعات مكنش بياكل عشان يأكل الفقرا

يا افندم عمر بن الخطاب مكنش بينام الا لما بيطمن ان كل رعيته مش ناقصهم حاجة او ع الاقل مرتاحيين وراضيين ومفيش ظلم ليهم لا منه ولا من رجاله

يا افندم عمر بن عبد العزيز كان بيخاف يلبس الحرير عشان الفقرا بيلبسو خيش ..

ولا يفضل الله قوم عن قوم ولا بني ادم علي بن ادم تاني الا بالتقوي

لا رئيس جمهورية ولا فقير ولا وزير ولا اي حاجة

وكل راعي مسئول عن رعيته

يعني مبارك او غيره هيتسألو عن كل بني ادم في عهدهم وتحت رعايتهم ولم تصله الرعاية الكاملة او ع الاقل المطلوبة

************

انا بس عايز اعرف راى حضرتك فى اكبر رؤساء العالم اللى بيتعالجوا فى المانيا وفى مدينة هيدلبرج بالذات ؟ هل ده تقصير فى مستشفياتهم واطباءهم فى مشااااكل كتير فى مصر والمشاكل دى عمرها ماهتتحل فى يوم وليلة وسفر الرئيس لالمانيا لاجراء عملية جراحية انا شايف انه شىء عادى جدا ومعتقدش انه ينفع نقارنه بعلاج نفقة الدولة

هرد عليك رد رديته عليك في الجمعاوية :d

ابتديت احس بانك يا من الحزب الوطني يا من قرايبه يا من رجالته :P :P :P

Legendary Leader يقول...

يافندم الرسول صلى الله عليه وسلم كام واحد من المسلمين الان يتبع سنته بلاش دى الصحابى الجليل عمر بن الخطاب لو واحد بس من المسلمين كلهم فعل نص اللى كان بيفعله هذا الصحابى لن يكون هناك حاجة اسمها اسرائيل ولا اى ديانة اخرى على الارض غير الاسلام زمان ايام الصحابة كان الاسلام اكبر قوة على الارض الغرب اخد تعاليم تعاليم الاسلام واشتغل بيها واحنا للاسف ضعفنا قدام هيافاتهم وبقينا بنقلدهم فى المسخرة والكلام الفاضى علشان مخرجش عن الموضوع دا زمن ودا زمن تانى خالص ودوام الحال من المحال وانا عارف ان مبارك مسئول عن كل واحد فى البلد بس المقياس صعب صدقينى

وانا والله لا من رجالته ولا من قرايبه ولا حتى من الحزب الوطنى بس الحكاية كلها ان انا قعدت قدام ناس كبيرة جدا زى جمال الغيطانى وعلاء الاسوانى والدكتور يحيى الجمل وصورتى معاه على الفيس بوك وغيرهم واتناقشنا فى ندوات ودورات وانا ضربت نموذج باكبر 3 معارضين مثقفين للحزب الوطنى فى مصر وجهة نظرهم وصلتنى بسهولة لكن انا مش عارف اوصلها كويس وهاكد ده انه لغاية دلوقتى من اسماء المرشحين للرئاسة ولا واحد يصلح فيهم لان يكون رئيس جمهورية لدولة مثل مصر

A32L MaGNoNa يقول...

عموما .. اختلاف الرأى لا يفسد للود قضية

مع اني مقتنعة ان مبارك احسن من غيره

ولكن يجوز ان ممكن يكون غيره افضل

ومع اني مقتنعة ان زمننا دا غير زمن الصحابة والرسول والعمريين ..

ولكن مقتنعة مليون المية ان الحساب هو هو

وان كل راعي مسئول عن رعيته

وان مبارك مسئول عن الحكومة اللى مبهدلة الشعب

ومسئول عن الاهمال اللى في كل حتة وكل حاجة في البلد

وربنا يهدينا جميعا ونغير من انفسنا عشان نقدر نغير من بلدنا

إرسال تعليق



WelCome To

~ A32l MaGNoNa ~

About Me

صورتي
أع ـقل مـ ج ـنـونــة
بنت مصرية مجنونة بس بعقل وعاقلـة بس بجنان
عرض الملف الشخصي الكامل الخاص بي

لايك ماي بيدج ع الفيس

ديلفري اعقل مجنونة

حط ميلك هتوصلك المواضيع لحد عندك ^_^:

Delivered by FeedBurner

أج ـمل مدونـات